Endamê Komîteya Rayberdişî ya PKKyî Duran Kalkanî ajansê ma rê qala Komployê Mîyanneteweyî, sîstemê tecrîd û îşkenceyî yê Îmraliyî û têkoşîno ke vera nê yeno dayene kerd. Beşê yewinî yê roportajî wina yo:

Ma hê kewenê serrgêra 24. ya Komployê Mîyanneteweyî yê 15ê Sibate. Wexto ke hetê tarîxî ra yeno ercnayene hêrişê hêzanê mîyanneteweyîyan ê vera Rayber Apoyî resenê serranê 90an. Çira nê hêzan hêrişê xo yê vera Rayber Apoyî zêdînayî? Peyê nê planî de çi esto?

Ez komployî reyna şermezar kena, xoverdayîşê Îmraliyî selam kena. Ez pêro şehîdanê nê xoverdayîşî yad kena. Komployo mîyanneteweyî bi armancê îmhakerdişî ame kerdene. Komplo hêrişêko plankerde û rêxistinkerde bi. No komplo pabesteyê hişmendî û sîyasetê vera meseleyanê kurdan o.

Seba ke Rayber Apoyî çareserîya meseleya kurdan de israr kerdêne no komplo vera ci ame kerdene. Bi komployî ame waştene ke qirkerdişê kurdan bêro temamkerdene. 5 hezar serran kurdan û Kurdîstanî rê çinbîyayîş ame ferzkerdene. Kurdîstan verî seserra 17. de bi Peymana Qesr-i Şîrîn mabênê Osmanîyan-Îranî de bi di parçe. Şerê Yewinî yê Dinya de bi 3 parçe. Nê dewletan ge getê kulturî ra ge hetê fîzîkî ra xîret kerd ke kurdan qir bikerê. Nê dewletanê serdestan Îran-Iraq-Tirkîya vera kurdan tim hêrişê hemparî kerdî. Têna nê ney dewletanê dinya yê sey Fransa, Amerîka, Îngilîstanî ûsn. zî kurdan rê qirkerdiş ferz kerd. Sîyaset û hişmendîya ke wazeno kurdan qir bikero sîstemo kapîtalîst o. Yanî qirkerdişê kurdan têna pabesteyê dewletanê îşxalkeran nîyo. Coka têkoşînê seba çareserîya meseleya kurdan zî ganî vera sîstemê dewlete, îqtîdar û kapîtalîzmî bêro kerdene.

Rayber Apo nê esasî ser o têgêra û PKK nê esasî ser o ronîya. Rayber Apoyî, koma Apogîran, PKKyî hetêkî ra vera hişmendî û sîyasetê qirkerî têkoşîn kerd û hetê bînîr a zî seba awankerdişê azadî û demokrasî sey sîstemêkê alternatîfî vejîyayî ver. Dewleta tirke xîret kerd ke Zîndanê Amedî de têkoşînê ma asteng bikera. La PKKyî Hemleya 15ê Tebaxa 1984î daye destpêkerdene. Dewleta tirke dima ke nêeşkaye PKK tasfîye bikera pê hemkarîya Amerîka û NATOyî vera Kurdîstanî hêrişê qirkerî dayî destpêkerdene. NATO 1985 de kewt dewre. Serranê 87-88î de bi îlanê Rewia Îstîsnayîye vera PKKyî planê îmha û tasfîye dîya destpêkerdene. Şerê Îran û Iraqî zî naye ser o ame vindarnayene. Îran û Iraq bîyî tirs, dewleta tirke bîye çakûç Hamnanê 87-88î de hêrişê barbarî ameyî kerdene. O çax Almanya Hafiz Esadî rê teda kerd ke Rayber Apoyî teslîm bikero. Seba ke Rayber Apo bêro muhamekerdene hetê Almanya ra dewaya Dusseldorfî ya Almanya ameye kerdene. Sîstemê globalî waşt Rayber Apoyî mekhum bikero. Dusseldorf de PKK nê êyê ke waştêne PKKyî muhakeme bikerê ameyî muhakemekerdene. Meclîsê Fedaralî yê Bonnî de birêka sîyasîye vejîyaye la bire Mehkemeya Heqanê Merdiman a Ewropa ra agêraye. Bi nê hawayî hêrişê xorinî ameyî pûçkerdene.

Plansazîya diyîne na bîye ke 1992 de Amerîka-Tirkîya-PDK-YNKyî pîya Xakûrkê ra heta Heftanînî yanî Herêmanê Pawitişî yê Medya de vera gerîlayan hêrişê teşrîna verêne dayî destpêkerdene. Nê hêrişî destpêkê komployî bi. Dima PKKyî xo apey ant. 1993 ra dima adirbirnayîş ame îlankerdene. O çax PKK gêrîya binê ablûqa. Amadekarîya seba planê neweyî dest pêkerde. Înan verî waşt ke Rayber Apoyî û PKKyî fam bikerê, bizanê ke nê çita yê. Xora 1993 ra dima hêrişê vera warê Rayberîye zêdîyayî. Îstîxbaratê Almanya û Amerîka seba arêdayîşê agahîyan xîret kerd. Netîceya nê cigêrayîşan de Komployo Mîyanneteweyî vejîya werte. Hînî hedef Rayber Apo bi. Vera ey hêrişî dîyayî destpêkerdene. Şahîn Donmez û Şemdîn Sakik bêguman xayîn ê. Înan zî MÎTî rê vato ke seba çinkerdişê PKKyî ganî verî Rayber Apo bêro çinkerdene. Peynîya cigêrayîşanê 93an de komplogeran wina vat ke eke Rayber Apo bêro çinkerdene zî yeno çinkerdene, eke PKK bêro çinkerdene şarê kurdî zî yeno çinkerdene.

Plan dîya destpêkerdene; verî 1ê êlula 1998î de adirbirnayîş ame îlankerdene. 17ê êlula 1998î de Celal Talabanî û Mesûd Barzanî şîyî Washington û bi peymanêke îlan kerd ke PKK rêxistinêka terorî ya û ganî Başûrê Kurdîstanî biterikno. Înan têkoşînê vera Rayber Apoyî rê raya tesdîqî daye. Wextê amadekarîya Kongreya 6. ya PKKyî de kadroyî şîyî kongre û Rayber Apo seba ke tewrê kongre nêbîyêne têna mend. Înan amadekarîyê 93î vistî dewre û kerd ke Rayber Apo Şamî ra vejîyo. Amerîka Hafiz Esadî rê teda kerdêne ke Rayber Apoyî vejo teberê Sûrîye. Amerîka Tirkîya hişyar kerde ke wa îdareyê Esadî rê gef biwano, Serekkomarê Misirî Husnu Mubarek vist dewre ke mabênê Tirkîya û Sûrîye bikero. Demîrelî îdareyê Sûrîye rê gef wend. Amerîka dima Yunanîstan vist dewre. Yunanîstanî venga Rayberîye da ke wa şêro uca. Rayberîye naye ser o 9ê teşrîna verêne de bi teyarayêke Sûrîye ra vejîya û şi Yunanîstan.

Înan plan kerdbi ke teyaraya Rayberîye debikerê mîyanê okyanûsî. Wexto Rayber Apo şi Rûsya no plan bikew kewt. Komployo Mîyanneteweyî Komployê 9ê teşrîna verêne bi. No komployê roja îmha bi. Rûsya de zî vera Rayber Apoyî teda ameye kerdene. Rayber Apo Rûsya ra şi Îtalya-Roma. Amerîka, Wezîrîya Karanê Teberî ya Amerîka komplo îdare û koordîne kerd. O reyna Roma ra ame berdene bi Rûsya û dima zî Yunanîstan. Înan waşt Yunanîstan de Rayberîye çin bikerê. La Rayber Apoyî planê înan pûç kerd. Dima ey verê xo da Kenya. Dima ke ê Kenya de zî nêeşkayî planê xo bîyarê ca CIA û MÎTî pêkerd. 15ê sibate de Rayber Apo Kenya ra ame remnayene û ame berdene bi Îstanbulî. 4 mengan rayberîya Amerîka de komployêko winasên ame îdarekerdene. Komployê 15ê Sibate bi nê hawayî qewimîya. Sîstemê îşkence û tecrîdî yê Îmraliyî bi nê hawayî vejîya werte.

Do dewam bikero...