Endamê Komîteya Rayberdişî ya PKKyî Duran Kalkanî bernameyê taybetî yê Medya Haber TVyî de rojdem ercna.

Qiseykerdişê Kalkanî ra tay noqtayê girîngî wina yê:

''Rayber Apoyî ra 27 mengî yo xeberêke zî çin a. Dişmenîye zî heta yew cayî yo. Huqûqê dişmenîye û huqûqê şerî est o. Tecrîdê Îmraliyî pêro dişmenîyan ser de yo. Îmrali de huqûq qetî çin o. Cezayê dîsîplînî yê ke dîyenê Rayber Apoyî zî bahaneyê tecrîdî yê. Rayber Apo goreyê huqûqî û heqê hêvî ganî hînî biameyêne veradayene. Yewîya Ewropa û Neteweyê Yewbîyayeyî pê bêvengîya xo tecrîdê Îmraliyî tesdîq kenê. Sere de CPT û Konseya Ewropa ganî pêro dezgehê Ewropa vera tecrîdê Îmraliyî têbigêrê, nêbê hemkarê ci. 

AKP-MHP weçînayîşan de Vakurê Kurdîstanî de bin kewt. No yeno a mana ke qerarê hukmatê neweyî yê AKP-MHPyî zî do hetê kurdan ra nêrê tesdîqkerdene. Çunke kurdan bi zelalî weçînayîşan de no îqtîdar red kerdo. No îqtîdar vera kurdan dişmenîya xo do pîlêr bikero. Tecrîdê Îmraliyî zî îsbatê ney o. Ganî vera tecrîdê Îmraliyî têkoşîno huqûqî û sîyasî hîna bi xurtî bêro kerdene. 

Xoverdayîşê gerîlayan prosesê verê ma de do hîna pîlêr bibo. Seke zanîyeno ma wextê erdlerzî ra nata pozîsyonê pawitişî de bîyê, bira çalakînêkerdişî ardêne ca. La rixmê na bira ma zî dewleta tirke hêrişanê xo rê dewam kerd. Dewlete hêrişê Licê, Botan, Vakur, Xakurkê, Şingal û Rojawanî kena. Hêrişî vera zêdîyenê. Coka bira ma ya çalakînêkerdişî zî hînî bêmana ya. No îqtîdar û dewleta tirke do barbarîya xo tûj bikerê. Ganî ma zî cewab bidê hêrişanê înan, tedbîranê pawitişî bizêdînê. Wa her kes ganê xo bipawo û AKP-MHPyî ra çîyêk nêpawo. 

Ganî ma bi hawayêkê topyekûnî xo ver bidê, derban bidê dişmenî ro. Ganî ma firsend nêdê hêrişanê dişmenî. Ez venga pêro kesan dana ke bitedbîr bibê, hîsger bibê, asayîşê xo bîyarê ca, vera sîyasetê faşîst û dişmenî şer bikerê. Erdoganî bi fekê xo vat ke ê do hêrişanê leşkerîyan bizêdînê. Coka ganî ma têkoşînê xo de metodanê neweyan aver berê. Erdogan nika wazeno kurdan bikero terefgîranê Hîzbullahî. Erdogan çekan dano Hîzbullahî-HUDA PARî. Erdogan pê nê çeteyan kurdan rê gef waneno. 

Hêzê demokratîkî mîyanê prosesê rexnedayîşî de yê. Ma girîngîye danê nê prosesî. Nê prosesî de ganî her kes rexneyanê xo bido û rexneyan bikero ke ma hîna bi xurtî têkoşîn bikerê. Seba ke komelî bivurnî, ganî ti hêverî xo bivurnî. No zî pê raştkerdişê xeletîyan û kêmasîyan beno. Ma zî prosesê rexnedayîş-rexnekerdişî de yê. 

Cepheyê sîyasetê demokratîkî zî mîyanê heman prosesî de yo. La sîyasetê kurdan ganî lezî bikero. Çunke faşîzm bi tempoyêkê berzî têgêreno. La ganî rexneyan de sîyasetmedarî bi baldarî qisey bikerê. Ganî pêro beşê komelî û sîyasetê demokratîkî zî tewrê nê prosesî bibê. Prosesê weçînayîşan de sey HDK, KCD û DBPyî tay beş, dezgeh û partîyan erkê xo ram nêardî ca.  Ma eşkenê vajê ke HDP her ca de eşka rolê xo bîyaro ca. Seke mi vat nika Kurdîstan de bi destê Hîzbullahî kontrayî yenê rêxistinkerdene. Nê kontrayî hetê îdeolojîkî ra hêrişê PKKyî, gerîlayan û sîyasetê kurdan kenê. Coka sîyasetê kurdan erey nêkewo, cade rexneyanê xo bido.

Weçînayîşan ra dima aseno ke Tirkîya de krîzo ekonomîk, şerê zere û teberî û polîtîkayê faşîzanî bi destê AKP-MHPyî bizêdîyê. Bi AKP-MHPyî tehlukeyê şerê zereyî zêdîya. Erdogan seba ke payan ser de vindero Tirkîya teslîmê kaosî do bikero. Nê prosesî de ganî cinî, ciwan, hêzê şorişgêr-demokrarîkî, pêro kurdî, kedkar û karkerî pîya têkoşînê hemparî bikerê. 

Menga hezîrane menga fedayîtîye ya. Embaze Sema, Gulane û Zîlane hezîrane de şehîd bîyî. Ganî ma zî xeta fedayîtîye de têkoşîn û xoverdayîşê xo aver berê. Xeta fedayîtîye bingeyê azadîya cinîyan û felsefeya 'Jin, Jiyan, Azadîye' yo zî. Prosesê rexnedayîş-rexnekerdişî zî do ma hîna fedayî bikero. Ganî ma xeta fedayîtîye ser de xo newe bikerê, erkanê xo zî dewr bikerê. Ma menga fedayîyan-fedayîtîye de bi rexneyan têkoşîn, xoverdayîş, têgêrayîşê xo hîna xurt bikerê; tecrubeyanê xo bizêdînê. Ma do vera Erdogan û Îtîfaqê Cumhurî yê faşîstî bi hawayêkê topyekûnî xo ver bidê û qetî ser bikewê. Ez her kesî rê serkewtiş wazena.''