Endamê Komîteya Rayberdişî ya PKK’yî Dûran Kalkanî qismê peyênî yê pêvînayîşê xo yê seba ANF’yî de bale ante serê îşxalkarîya dewleta Tirkî ya hemverê Başûrê Kurdistanî û role PDK’yî yê îşxalkarîye.

 Kalkanî nê vatî: 

 “Tayê embazî vane ‘Başûrê Kurdistanî bîyo kolonîya Tirkîya.’ Hukmê TC’yî Başûr de esto, çi çîyê xurde û xirabî estê roşenê Başûrê Kurdistanî. Xeylî leşkerê TC’yî Başûr de estê. Hetê polîtîkî ra zî nêeşkenê hemverê TC’yî de çîyêk vajê. TC se vajo ê vane temam. Azadîyêka winayêne nêbena. Vat ma do dewlete awan bikerê, rasta ci eke bibîyêne zî dewletêka winayêne do bibîyêne dewletêka hemkar û teslîmbîyayî. Xora serra 1992 ra nata dewlet a. ma do hendî senî bo? Çîyo muhîm o nêyo ke merdim bibo dewlete, ganî fikrê merdiman azad bo, merdimî tewirêkê demokratîkî ramojnê û hawilan averşîyayîşê cimatî rê bikerê. PDK her tim hemverê TC’yî de halêkê zihîfî de bi. Serra 1985 de tîfaqê bi PKK’yî dir xira kerd û no tawîzêko pîl bi. Dima ra serra 92 de zî kewtî mîyanê xetayêka winayêne. Prosesanê serra 95 û 97’î de hêrişanê dewleta Tirkî dir bîyî hempar.

 Xulasa 92, 95, 97 û 98 de înan operasyonî kerdî. Qaşo ê wextan mutefîkê Tirkîya bî û hemverê PKK’yî de şer kerdêne. La wa biewnîrê vîrameyîşanê generalanê Tirkan ra û do nê çîyî bivînê. Xeylî generalî vanê ‚No operasyon tena hemverê PKK’yî de nêbî. Ma hem hemverê PKK’yî de operasyon kerd û ma hem zî waşt ke PDK’yî xo ra girê bidê. Ma PDK’yî ser o kontrol viraşt û ma hêrişê PKK’yî kerd.’ PDK nê çîyî nêzano, fam nêkeno. DYA û TC çi vajê ê çîyî qebûl kenê.

Dima ra şerê DAÎŞ’î dest pêkerd. Şerê Dinya yo 3’in ame destpêkerdene. Hemverê Seddamî de teşebusê şerî ameyî destpêkerdene. Naye ser TC kewt xeylî cayan û xo xurt kerd. Qismêkê zêdeyî yê Behdînanî de hêzo leşkerî yê Tirkan esto. Tayê cayan de zî kontrol binê destê PDK’yî de yo. Serê rayîran de PDK esto la koyan de kontrol destê TC’yî de yo. PDK’yî tîfaqêkê menfaatî awan kerdo, verî domananê Seddamî dir tîcaret kerdêne û nika zî domananê Erdoganî dir tîcaret kenê. 

 PDK vano ke ‚Ma neçar ê, eke ma Tirkîya dir têkilî nênê ro dorê ma gênê û ma vêşan manenê.‘ No rast nêyo, eksê nê de TC muhtacê Başûrê Kurdistanî yo. Hetê sîyasî, leşkerî û ekonomîkî de no wina yo. Eke PDK tewirêkê rastî ramotêne do TC’yî hêrişê Efrînî, hêrişê Şengalî, Xakurkê yan zî Bradostî nêkerdêne. Do nêeşkayêne Cizîre, Sûr û Nisêbînî bivêşno. Efrîn rah eta Bradost hêrişî yenê kerdene. Hetê îdeolojîk, stratejîk, rojaneyî û polîtîkî yê hêrişan estê. Ma heme hetan ra ê ercnayî. Hetê ci yo îdeolojîk qetîyen seba qirkerdişî yo. Yo dîyin, hetê êyo stratejîk o. wazenê Kurdistanê Osmanîyî newe ra kontrol bikerê. Wazenê erdo ke sey Mîsakî Mîllî name kenê bifînê dest. Amacê hêrişanê Efrîn ra heta Bradostî no yo. Hetêna ra zî wazenê sîyasetê rojaneyî ra îstîfade bikerê. Tîfaqê AKP-MHP’yî yo faşîst wazeno ke xo biseperno nê şerî û bi nê hawayî dîktatorîya xo ya faşîste derg kero, xo payan ser o verdo.

 PDK’yî qilê ke Kanîmasî de yê leşkeranê Tirkî rê verdayê. Kanîmasî qasê 15 kîlometreyî başûrê sînorî de yo. Yanî sînorî ser o nêyo. Verî serra 1998 de zî PDK’yî no dorme teslîm kerdibi. Artêşa Tirkî tabûra Ertûşî berdebî ûca û dima ra ûca bica bîbî. Metodê PDK’yî yê şuxulnayîşî şaş o. Kurdan keno zihîf, beno hemparê qirkerdişê Kurdan, beno sûcdarê qirkerdişî. Azadîperwerîye hetêk verdê, bi nê hawayî Kurdîtî zî nêbena. 

 Nê wextanê peyênan de reyna sivîlan qetil kenê, no Bradost û Qendîl de yeno kerdene. Îdare û çapemenîya PDK’yî vane, ‘Seba ke PKK ûca esto no yeno kerdene. Mîyanê şerê PKK’yî de sivîlî merdê.’ Qendîl de kamcîn leşkerê Tirkî esto, kamcîn şer qewimîyayo ke sivîlî bimirê!? Şerêko bi nê hawayî çino, zûran kenê. Dewleta Tirkî bi teyareyanê keşfî, bi teyareyanê şerî dana wesayîtanê sivîlan ro û înan kişena. Verê çimanê merdiman de  Kurdan ê sivîlan kişena. Hemverê sivîlan de qirkerdişan kena, hemverê PKK’yî de zî qirkerdişan kena. PKK’yijî zî merdim ê, ê zî Kurd ê, bêguman ganî merdimî hemverê nê hêrişan de zî vejîyê.

 Rast o, beno ke mucadele de kemasîyî estbê, şaşîtîyî zî estbê labelê hêrişê dişmenî rîyê şaşîtî û kemasîyanê ma ra nêyê. Şaşîtî û kemasîyê ma beno ke binfînayîşê înan de benê sebebê zihîfîyan. Naye ra ganî ma verê her çîyî rastîya dişmenî nas bikerê. Dişmenê ma qirkerdox, faşîst û kolonyalîst o û wazeno ke ma çin bikero. Ganî her kes nê fam bikero. Eke wina nêbo ma do senî estbîyayîşê xo bipawê? Ganî ma xo bi zanakerdişî, organîzekerdişî, xoverdayîş û şerî bipawê. No seba her çar perçeyanê Kurdistanî wina yo.

 Xusûsen hemverê hêrişanê TC’yî de ganî hendeyê Vakurî Başûr û Rojawan de her hîrê perçeyanê Kurdistanî de şar, ciwan, kokim, karker û kedkarî, pîya bi hêzanê azadîye û sîyasîyan hemverê hêrişkarîya faşîst ya qirkerdoxe de xover bidê.

 Naye ra ma eşkenê vajê ke heta wextêk hêrişê TC’yî hemverê Vakurê Kurdistanî de bî. Labelê nika her kes vîneno ke hendeyê Vakurî hemverê şarê Başûrî de yo zî, hemverê şarê Rojawanî de yo zî. Dewleta Tirkî Efrîn îşxal kerd, vana ke do rojakewtena Firatî zî îşxal bikero. Vana ke do heme çeteyanê xo, dişmenanê Kurdan ûca bica bikero. 5 ra heta 10 kîlmoetreyan kewta zereyê Başûrê Kurdistanî û vana ‚ez do hemeyê ci bigêrî, Şengalî bigêrî, Kerkûkî bigêrî, Silêmanîye bigêrî.‘ Amacê xo no yo, ganî her kes nê bivîno.

 Ganî merdim, îdarekar û kadroyê PDK-YNK’yî xo biresnê dereceya famkerdişî. Ganî xo halê tena menfaatê xo yê teng û qijkekan fikirîyayîşî ra bixelesnê. Eke nêeşkenê bibê serkêş, cesaretê înan ê seba fedakarîye çino a game qe nêbo wa nêbê asteng.

 Na çarçewaye de ez veng dana sîyasetê Kurdan ke wa ê ke TC’yî dir mîyanê têkilîye de yê teşhîr bikerê, bikerê ke na têkilîye ca verdê û hemverê hêrişkarîya faşîste-qirkerdoxe ya TC’yî de tewirêkê hemparî ramojnê. Ez veng dana şarê Kurdî ke rastîyan rind bivîno, xeta azadîye ya Rayber Apoyî de bibo yew, xo aver bero, organîze bikero, dorê Mucadeleyê Azadîye yê PKK’yî de bibo yew, hemverê sîyaset û zihnîyeto ke wazeno ma qetil bikero, asîmîle bikero bi hawayêkê yewîye Vakur, Başûr, Rojawan de, her hîrê perçeyanê Kurdistanî de xover bido û bi ser bikewo.”