Şaristanê Kerkûkî yê Başûrê Kurdîstanî de serkêşîya sîyasetmedar, aktîvîst, roşnvîr û huqûqnasan de seba ke PKK mîyanê lîsteya terorî ra bêro vetene û azadîya Abdullah Ocalanî bêra caardene Kampanyaya 'Kurdan rê Edaletî' dîyaye destpêkerdene

Kombîyayîşê çapemenîye yê kampanya de venga her kesî ame dayene ke tewrê kampanya bibo.

Çimdarê sîyasîyî Letîf Fatîh Ferecî kombîyayîş de qisey kerd û vat: ''PKK rêxistinêka terorî nîya. La ame dekerdene mîyanê na lîste. Dewleta tirke bi xo terorîst a. Dinya ser de xeylêk senator û parlamenterî wazenê PKK lîste ra bêro vetene û Abdullah Ocalan bêro veradayene. Ganî kurdî zî seba ney vengê xo berz bikerê û na kampanya de rolêkê pîlî bîyarê ca.''

Pisporê huqûqê mîyanneteweyî Hêjar Kakeyîyî zî kombîyayî de qisey kerd û ard ziwan ke ê paştî danê na kampanya. Kakeyîyî vat: ''Na kampanya seba kurdan zaf girîng a. Ma rê Birêz Ocalan têna lîderêkê partîye nîyo, o lîderê pêro kurdan o. Apogîran vera DAÎŞî şer kerd. Êyê ke qala demokrasî kenê hemkarê DAÎŞî yê. Ma hêvî kenê ke şarê ma hîna zêde paştî bido na kampanya. Ma venga hemwelatîyanê xo ke îmza bidê na kampanya.''

Mela Ferman Mihemedî zî pare kerd ke eke PKK mîyanê lîsteya terorî ra bêro vetene Tirkîya zî do ney ra îstîfade bikera. Mihemedî vat: ''Hukmatê Iraqî zî wextêş waştbi ke şorişgêrê kurdî çin bikerê la nêeşka. Ganî Tirkîya ney ra ders bigêra. Qederê Tirkîya do ê Baasî ra xirabêr bibo.''