Endamê Konseya Rayberdişî ya KCKyî Mustafa Karasuyî roportajê xo yê ANFyî de rojdem erjna.

Karsuyî derheqê şewatê Amed û Mêrdînî de nê vatî: ''Amed û Mêrdîn de qirkerdişêko bîn ame ciwîyayene.  No eşkeraya qirkerdişêkê dewlete yo. Senî ke KJKyî zî eşkerayîya xo de vat na afatêka hetê dewlete ra ameye afirnayene. Dewleta ke semedê bajaranê Tirkîya  bikewo erey zî heme îmkananê xo fînena dewre gama ke Kurdîstan de beno çîyêk nêkena. Wazena ke wa kurdî cuyeya xora aciz bibî û herra xo caverdî. Coka şewatê Amed û Mêrdînî de zî eynî tewir ame mojnayene. Berpirsîyarê şewatî DEDAŞ o, bi vatişê bînî dewlet a. Coka seba ke sûcê xo binimnê cadê berpirsîyarîya şewatî eşt milê şarî. Şahîdê şewatî çend bigêrî vajî şewat şirîtanê ceyranî ra vejîya  zî selahîyetdarê dewlete û medyaya ci vanê şewat hêgayan de vejîya. Çapemenîya muxalîf zî wina vat. Çunke tersê îqtîdarî ra çew nêeftano qalê şahîdan bikero, goreyê eşkerayîya fermî têgêrenê. Ma reyna dî ke qewimîyayîşê Kurdîstanî çapemenîye de senî xelet yenê parekerdene.

No DEDAŞ Kurdîstan de şarî rê zext keno. Pîya bi leşkeran têgêreno. DEDAŞ bi seyan reyî pîya bi leşkeran eşt dewan ser.  Şar tim vano bi DEDAŞî ci rê zext yeno kerdene. DEDAŞ bîyo belayê sereyê şarî. Tirkîya wina yew dezgeh çîn o. Eke bibîyêne şar vera ci serewedaritêne. Sera 80 ceyran û enerjîyê Tirkîya Kurdîstanî ra vejîyenê. Şarê kurdî hem nê ra feynda nêvîneno hem zî rîyê nê ra raştê zextî yeno. Kurdîstanî ra hende enerjî vejenê la kurdan kenê feqîrê enerjî. Cayê nê  ne ehleq, ne wijdan ne zî edaletî de est o. Ganî şar enerjîya herra xo ra feyde bikero, ceyran bêpere bêdo dayene.

Şarê kurdî wa  nê hol bizano ke dewlete ci rê têna zulm kena, wazenê şarî qir bikero. Coka ganî dewlete ra çîyêk mepawo. Kurdî ganî xo bikerê komelê rêxistinkerdeyî, bi hêzê komelî erjan biafirnê û hewcedarîyanê xo bîyarê ca. Şewatê Amed û Mêrdînî de her hetî ra vînîbîyayîşo gird ê şarî est o. Ganî şarê kurdî bi yewîye û paştdayîşî birînanê xo bipêşo. Şar wa muhtacê na dewleta qirkere mebo.  Wext wextê ramojnayîşê welatperwerîye yo.''