Endamê Konseya Rayberdişî ya KCKyî Mustafa Karasuyî beşdarê Bernameyê Taybetî yê Medya Haber TVyî bi û rojdem ercna. Qiseykerdişê Karasuyî ra beşêk wina yo:

''Rayber Apo 23 serrî yo binê tecrîdî de yo. Mabênê dewleta tirke û Rayber Apoyî de têkoşînêk esto. La Rayber Apoyî bi serran xo ver da û payan ser de mend. Şarê ma 23 serrî yo bi çalakîyan vera tecrîdî vejîyeno. Şarê dinya zî seba azadîya Rayber Apoyî têgêreno. Îngilîstan de sendîkayî, Fransa de hêzê demokrasî ûsn kampanyaya vera qedexeyê PKKyî rê dewam kenê. Ganî kurdî û dostê înan serra 24. de zî bi xurtî wayîrê Rayberîye vejîyê. Hem azadîya Rayberîye hem zî azadîya kurdan qetî do bêra caardene.

Dewleta tirke pê paştdayîşê hêzanê mîyanneteweyîyan Efrîn îşxal kerd. Efrîn de teda, zulm û qirkerdişî estê. Dinya vera ney bêveng a. Xora kurdê xayînî yê sey ENKSî îşxalî meşrû vînenê. Şar seba Efrînî bi hawayêkê pîlî xo ver dano. Şarê Efrînî nêvejîya teber têna koçê Şehba kerd û xoverdayîşî rê dewam kerd. Wayîrvejîyayîşê Efrînî erkê pêro kurdan o. Ganî şarê kurdî bi temamî paştî bido şarê Efrînî, paştî bido têkoşînê xelisnayîşê Efrînî.

Zîndanê Sinaa de QSDyî cewabo musbet da hêrişê DAÎŞî. Hêzê QSDyî do peynî de DAÎŞî tasfîye bikerê. Wa şorişgêrê Rojawanî bizanê ke DAÎŞ dewleta tirke û hêzanê bînan ra paştî gêno, coka goreyê ney tedbîranê xo bigêrê. Vera hêrişanê DAÎŞî ganî pê xurtkerdişê Şorişê Rojawanî cewab bêro dayene. No hêrişê vera îtîfaqê ereb û kurdan zî bo. Eke no hêriş biresayêne armancê xo DAÎŞ newe ra do xurt bîyayêne. Eke înan Hesekê bivistêne destî hêrişê pêro Rojawanî kerdêne. Hêzanê QSDyî bi temamî verê nê planî girewt. Ganî têkoşînê vera DAÎŞî dewam bikero. Dewleta tirk wazena pê destê DAÎŞî Rojhelatê Mîyanênî îşxal bikera.

Dewleta tirke reyna hêrişê Şingalî kerd û çend endamê YBŞyî şehîd kerdî. Ça de kurdî wayîrê destkewteyan bibê dewleta tirke hêrişê uca kena. Dewleta tirke coka hêrişê sîstemê Şingalî kena. Hêrişê dewleta tirke yê vera Şingalî ganî sey hêrişêkê DAÎŞî bêro dîyene. Dewleta tirke zî sey DAÎŞî wazena êzidîyan qir bikera. PDK zî dewleta tirke rê Şingal de zemînê hêrişî amade keno. Iraq zî tedaya PDK û dewleta tirke ra vera hêrişan bêveng o. Êzidîyî ganî vera nê hêrişan tim mîyanê pawitişî de bibê. Eşkera yo ke nê hêrişî do dewam bikerê. Êzidîyî zî wa statuyê xo ra fek vera medê. Êzidîyî wa bi tewirê xo yê qerardarî û têkoşînê xo xoser bibê.

Seba ameyoxê şaranê Tirkîya ganî AKP-MHP bêro rijnayene. Muxalefet eke meseleya kurdan de samîmî bibo eşkeno nê îqtîdarî bin bikero. La mîsal înan zî tewr peyên vat ke fezlekeyê vera Semra Guzel tesdîq bikerê. Tirkîya de têna HDP têkoşînê raştikênî dano. Hêzê çepgîr-sosyalîst û demokratîkî ganî vera îtîfaqê faşîstî îtîfaqê xo ronê û ey birijnê. Ganî hêzê demokrasî dormeyê HDPyî de bêrê pêser. Nê hetî ra girîng o ke 8 partîyî pîya roniştî. La hema zî îtîfaq nêronîya. Ganî her kes na babete de mesuldarîya xo bîyaro ca. Ma pê bawer ê ke îtîfaqêk do virazîyo û vera îqtîdarî têkoşîn do bêro kerdene. Xora ma seba demokratîkkerdişê Tirkîya hê têkoşîn kenê. Ma do Tirkîya demokratîk, Kurdîstanî azad bikerê.''