Endamê Konseya Rayberdişî ya KCK’yî Mûstafa Karasûyî qalê endamê Komîteya Merkezî ya PKK’yî Huseyîn Mahîrî kerd ke 1’ê Tebax a 2012’î de cuya xo vînî kerdebî. Karasûyî vat, “Têgêrayîş xeylî çîyan deyndarê Huseyîn Mahîrî yo.”
Endamê Komîteya Merkezî ya PKK’yî Huseyîn Mahîrî 1’ê Tebax a 2012’î de Fermandarîya Herêma Botanî de gama ke xebata pratîkî kerdêne Kato Jîrka de pay dabi serê mayîne û şehîd bibi. Bi wesîleya serrgêra şehadetê Mahîrî endamê Konseya Rayberdişî ya KCK’yî Mûstafa Karasûyî qalê ê kerd.
Her Ca de Her Wezîfeyî Bica Ard
Karasûyî vist vîrî ke Huseyîn Mahîr xeylî wezîfeyê muhîmî bica ardê; endamê Komîteya Merkezî ya PKK’yî, endamê Komîteya Rayberdişî ya PKK’yî û yê Konseya Leşkerî bi û vat ke Mahîrî fermandarîya Eyaletê Amedî kerde û gama ke şehîd bi fermandarîya Eyaletê Botanî de bi. Karasûyî vat verî zî Botan de şer kerdo, fermandarîya Hêzanê Taybetan kerda, Komîteya Pawitişê Şarî de xebetîya; yanî her wareyê mucadeleyî de wezîfeyî bica ardî û bale ante serê şexsîyetê ê û vat: “Bi şexsîyetê xo ramot ke PKK partî û têgêrayîşêko senên o. Ez partî mîyan de ê kesan ra yew a ke destpêk de Huseyîn Mahîr nas kerd. Gama merdim prosesê dimayî zî biercno a game zî keso ke destpêk rao nas kerdo ez a.”
Karasûyî da zanayene ke ê Huseyîn Mahîr Enqere de nas kerdo, a game sempatîzanêk bîyo, la sey kadro xebetîyayo.Karasûyî vat ke Huseyîn Mahîr dimayê 12’ê Êlule tewrê têgêrayîşî bi û vat, “Bi rastî rastekênanê partîye ra yew bi, fedaî bi. Embazêk ma bi ke bi her hawayî xo fedayê partî û şarî kerd. Kerd ke wezîfeyê xo bi hawayê tewr rindî bica bîyaro. Bi rastî zî emazêko ma yo kedkar bi.” Karasûyî vat ke bi mutewazîyîya xo zî Huseyîn Mahîr hetê her kesî ra ameyêne heskerdene.
Bi Israr Waşt ke Tewrê Şerî Bibo
Karasûyî ard ziwan ke Mahîrî tim kerdêne ke xebata tewr girane bikero. Karasûyî vat ke înan nêwaştêne ê bieşrawê Botan û vat, “Embazêko kan bi. Emrê ê 50 ra ravêrtibi. Loma ma nêwaştêne ê bieşrawê Botan, Amed, Dêrsim. Ma ra waşt ke ma ê bieşrawê Dêrsim. Ma ra waşt ke ma ê bieşrawê Amed. Peynî de zî seba ke Botan heremêka hîra bîye embazan dir pêkerd û şi Botan. Do bişîyêne Botan labelê do çewî nêzanayêne ke şino Botan. Şerê serra 2012’î şerrêko xeylî giran bi. Îqtîdarê AKP’yî serra 2011 de seba tasfîyekerdişê têgêrayîşê azadîye hêrişêko giran kerd. Ci ra modelê Srî Lanka vatêne. Seba tasfîyekerdişê têgêrayîşî hêriş kerd. Ê zî vatêne, „Demêkê winayênî de nêbeno ke tîya bimanî. Ganî seba nê têgêrayîşî çîyêk bikerî. Ganî ez tecrubeyê xo wareyê şerî de rayra berî. Bi nê hawayî şi Botan.“
Karasûyî herişê demê peyênî yê seba tasfîyejerdişî vist vîrî û vat, „Ma nika zî şer kenê, şehadetî virazênê. Ganî heme embazê ma, şarê ma, her kes bi tewirê embaz Huseyîn Mahîrî bizano, sey nimûne bivîno. Gama ke dişmen hêrişê giranî keno tewirêko senên eşkeno bêro ramotene? Îradeyêko senên eşkeno bêro ramotene? Embaz Huseyîn Mahîr nê pêro ramotî. Ez ê bi hurmet û minet bi vîr ana. Têgêrayîş xeylî deyndarê ê yo. Ê nasname û şexsîyetê têgêrayîşî xeylî kerd xurt. Ê erc aferna. Tena şer nêkerd yan zî tena rayberî nêkerde. Heman wextî de bi tewir û şexsîyetê xo afernayîşê kulturê PKK’yî de rolêko pîl bica ard.“
