Endamê Komîteya Rayberdişî ya PKKyî Murat Karayilanî bernameyê taybetî yê Stêrk TVyî de hêrişê îşxalî yê dewleta tirke û stratejîya kurdan ercnayî.

Karayilanî vat: ''Erdoganî bire daye ke îqtîdarî sîstemê xo bi dişmenîya kurdan dano dewamkerdene. Saddam Huseyîn qetilkarêko zulmkar bi la Erdogan ey ra hîna xirabêr o. Saddam Iraq de hêrişê kurdan kerdêne la Erdogan hîna stratejîk nêzdîyê kurdan beno. Erdogan wazeno estbîyayîşê şarê kurdî werte ra wedaro. Erdogan dişmeno tewr pîl ê kurdan o.

Şerê 3. yê Dinya ra dima herême do newe ra bêra dîzaynkerdene. Ma sey kurdan zî goreyê nê dîzaynê neweyî herême de ca bigêrê. Dewleta tirke seba ke nê prosesî ra fayde bivîna armancê stratejîkî dayî xo verî. O verên wazeno ke kurdî nê dîzaynî de ca nêgêrê. Naye ser o wazena bi konseptê Mîsak-i Mîllî herême îşxal bikera û nêverda ke kurdî bibê wayîrê statuyêkî. Na stratejîya pêroyî ya dewleta tirke ya. Armaco diyîn zî no yo ke Rojhelatê Mîyanênî  de îqtîdarê Îhvan-î Muslîmîn bêro awankerdene. La no esas armancê AKP-MHPyî yo labelê dewleta tirke no qebul kerd. 

Armancê dewleta tirke parçekerdişê Sûrîye û kontrolkerdişê Sûrîye yo. Erdogan bi paştdayîşê xo kenoke Lîbya de Sarac payan ser o vindero. Çimê ey zî petrolê Lîbya de yo. Erdogan wazeno ke bi xeyalê Osmanijan Îhvan-î Muslîmîn herême de newe ra serdest bikero û welatanê ereban îşxal bikero. Dewleta tirke Îdlîb de se kena? Uca erdê Sûrîye yo. No yew uslubê dewleta tirke yo; leşkeran erşawena ke ê uca ra nêvejîyê. Sûrîye kewte Îdlîb û uca de serdest a. La dewleta tirke çira hema zî uca de ya? Aseno ke no bibo semedê meseleyanê pîlan û şer do giranêr bibo. Dewleta tirke herême de bîye bela.

Vanê Artêşa Mîllî ya Sûrîye! Çi artêş a. Cerganê na artêşe Serêkanîyê, Girê Sipî, Efrîn de dest na keyeyê merdiman ser, tecawuz kerdêne, qirkerdiş kerdêne. Na rastîya dewleta tirke baş vejena werte. Kerdişê înan ê Efrîn û Serêkanîyê qet ma vîrî ra do nêşorê. Ganî kurdêk zî kerdişanê înan xo vîrî ra mekero. Kamo ke xo vîrî ra keno xayîn o. Erdogan wazeno herême de ca bido cerganê xo. Eke wina bibo hînî kurdan rê ca nêmaneno. Zaf leşkerê tirkî yenê kiştene la kesêk nêrazîbîyayîşê xo vera naye nêmojneno û nêvano 'To çira ma berdî eştî mîyanê şerê Sûrîye?' Dewleta tirke vana qey ê kewtî mîyanê şerê Sûrîye la ê kewtî mîyanê gemarê Sûrîye. Dewleta tirke nêeşkena uca de netîceyêke bigêra. Herême de Şorişê Rojawanî wayîrê pozîsyonê tewr başî yo. Eke Rojawan çeperanê xo xurt bikero û sîyasetêkê rastikênî bikero nê şerî ra zerarêk do nêvîno û hîna zaf destkewteyan bivisno xo destî.''