Endamê Komîteya Rayberdişî ya PKKyî Murat Karayilanî ke Radyoya Dengê Gelî de qisey kerd, çalakîya Zeynepe Kinaci (Zîlane) erjnaye ke Têkoşînê Azadîye yê Kurdîstanî de rolê ci zaf gird o.

Qiseykerdişê Karayilanî ra qismêk wina yo: ''Menga hezîrane menga şehîdan a. Ez şexsê fedayîyanê pîlan hermrayanê ma Zîlane, Sema û Gulane de heme şehîdanê ma yê fedayîyan heme şehîdanê menga hezîrane bi hurmet û minetî yad kena û sozo ke ma dayo înan newe kena. Menga hezîrene de zaf şehîdê ma est ê la şehadetê hemrayanê fedayîyan ê ke serkêşîya embaze Zîlane de ameyî kerdene vejîyenê verî.

Fedayîtîye eslê xo de vernî ra têgêrayîşê ma de est a. Verî nameyê welatê ma vatiş zî qedexe bi. Çew nêekayêne qalê kurd Kurdîstanî bikero. Wextê winayênî de vejîyayîşê Rayber Apoyî çarçewaya xo fedakerdişî de vejîyayîşêko tarîxî bi. Erjê bimbarekî yê sey azadîye û heqîqetî heta fedayîtîye nebo têkoşînê ci nêeşekno bêro rayraberdene. Wexto ke zîndanan de şexsê hemrayanê esîran de ame waştene ke partî bêro tesfîyekerdene sere de embaz Mazlûm Dogan dima Ferhat Kurtay û embazê ci û ûca ra zî çalakwananê 14ê Temmuze Mehmet Hayrî Durmuş, Kemal Pîr, Alî Çîçek û Akîf Yilmazî semedê xelisnayîşê partîye xo feda kerd. Reyna koyan de şexsê Egîd (Mahsum Korkmaz) de eynî ruhî têkoşîn da rayraberdene.

La cayê çalakîya hemra Zîlane zaf taybet o ke 30ê hezîrana 1996 de ameye kerdene:

A yewine; çalakîya embaze Zîlane wina yew wextî de ameye kerdene ke têgerayîşê ma hetê taktîkî ra tengayî de bi. Aye çalakîya xo bi xo hazir kerd û bi hewayêkê serkewteyî arde ca. Na çalakîye yew taktîk vejîyayîş û metodo newe bi. Xora çarçewaya ê metodî de quwetê taybetî ameyî pê û no metod bi xetêka têkoşînî

A dîyine 6ê gulana 1996î de vera Rayber Apoyî hêrişêk amebi kerdene. Dişmenî waştbi vera Rayberîya ma suîkast bikero. Çalakîya hemra Zîlane vera nê yew vejîyayîş bi. Yanî semedê pawitişê Rayber Apoyî xo feda kerd. Xora hemra Zîlane mektubê xo de vana 'Eke teberê ganî mi de yewna çîyê bibiyênî mi o zî dayêne.' Bi na çalakîye na raştîye zî fînena çiman ver. Bi qala kilme hemra Zîlane hetê îdeolojîkî ra zî bi nêzdîbîyayîşê 'Semedê pawitişê Rayber Apo û têgêrayîşî ganî merdim her çîyê xo bido'  ruho fedayî temsî kerd.

Hetê ci yo muhîm ê hîrêyine zî; na çalakîye hêz da artêşbîyayîşê cinîyan. Bitaybetî hemra Zîlane sey cinîya kurdsîtanije û azadwaştoxe bi çalakîya paştî daye pêro embazan. Dima ra pede pede  heme komelî  rê bîye hêz. Na çalakîya mojna ra ke cinîye senî eşkena bibo îrade, senî bibo jîhat û senî eşkena çalakîya tewr pîle bikero. Na çalakîye bîye îlham, cesaret da û verê artêşbîyayîşê cinîyan akerd. Na çalakîya ver zî têkoşînê embazanê cinîyan bibi. Mesela xoverdayîşê zîndanî yê hemra Sakîne Cansiz, çalakîya hemra Bêrîtane û  yê xeylêk embazanê bînan. La çalakîya hemra Zîlane wextêkê zaf muhîmî de rolo zaf gird kay kerd û verê cinîyan ê kurdan akerd.

Çalakîya hemra Zîlane semedê hêz û îradebîyayîşê cinîyan rolo gird kay kerd. Ma reyna aye yad kenê û na çalakîya tarîxî selam kenê. Ewro refanê ma de Zîlanbîyayîş bîyo xurt. Ma ewro bi nê ruhî têkoşîn kenê.Gerîlayê Modernîteya Demokratîke bi ruhê fedayî yê Apoyî û çarçewaya Zîlanbîyayîşî de têgêrenê û kenê ke bi nê tewirî wezîfeyanê dewrî rê bibê cewab. Ma pê sereberz ê ke xeta xoverdayîşî ya Zîlanan de têkoşînî bi xurtkerdişî danê rayraberdene.''