Endamê Komîteya Rayberdişî ya PKKyî Murat Karayilanî bi wesîleya serrgêra Komployê 15ê Sibate û serrgêra hêrişê vera Garê yê 10ê sibate  veng da Hêzanê Pawitişê Şarî.

Karayilanî sere de şehîdî yad kerdî û vat: ''Armancê Komployê Mîyannetweyî o bi ke xeta kurdê/a azadî/e çîn bêro çînkerdene, vera Kurdîstanî sîyasetê qirkerdişî bêro kerdene. No komplo şexsê Rayber Apoyî de vera kurdan ame kerdene. No çîyo newe nîyo. Sîyasetê wînayên wextê Lozanî ra yenê kerdene. Rîyê nê sîyasetî ra şarê ma zaf dejê pîlî ante. Rayber Apoyî vera nê sîyasetê qirkerdişî têkoşînêk da destpêkerdene. Bi derbeya leşkerî ya 80yan ame waştene ke verê nê têkoşînî bêro girewtene. Zîndanan de serkêşîya Mazlûm, Xeyrî, Kemal û Ferhatan de têkoşîno ke ame dayene dişmen qelayê înan de bin fîna û planê ci pûç vetî.

Rayber Apoyî na çerewe de serkêşîya embaz Egîdî de Hemleya 15ê Tebaxe ya 1984î organîze kerde. Bi na hemle Kurdîstan de dewrê serewedaritişê neweyî û averşîyayîşê gerîlayan dîya destpêkerdene. Hêzê serdestê ke nê têkoşînî ra tersayî cade dest pê sîyasetê komployî kerd. Gama verêne zî 1985î de ameye eştene. Serekê Swêdî Olof Palme ame kiştene û sucê ci erzîya milê PKKyî.  Dima ra Başûrê Kurdîstanî de şerê xayînîye ame organîzekerdene. Nê demî de dewleta tirke 17 hezaran ra zafêr şarê ma binê nameyê kiştoxê ci nînê zanayene de qetil kerdî ya zî birîndar kerdî. 5 hezar dewê ma veng kerdî. Înan se kerd nêkerd nêeşkayî gerîlayan tesfîye bikerê.  Coka reyna hêzê serdestî kewtî dewre û 9ê Teşrîna Verêne ya 1998î de Rayber Apo dîrek hedef girewt. Xora o prosesî ra heta nika zaf çî bîyî. Rixmo ke ma adirbirnayîş îlan kerdî hêrişanê vera dewam kerd.

15ê Sibate ya 1999î de zî Rayber Apo ame remnayene û dewleta tirke rê ame teslîmkerdene. Vera nê komployî şarê kurdî her cade wirişt payan ser û bi çalakîyanê fedayîyan wayîrê rayberê xo vejîya. Rayber Apoyî zî bi vindertişê biheybetî planê komplokeran pûç kerdî. Hetê bînî ra  bi paştdayîşê hêzanê serdestan 2001î de Yewîya Ewropa PKK girewt lîsteya terorî ke verê têkoşînê ma bêro girewtene. Gama ke ma şerkerdênê PKK nêgirew liste gama ke şer vindarna waşt bi metodanê demokratîkan meseleya kurdî çareser bikerê ,o wext gerîya lîste. Haştîye kurdan zî nêwazenê, semedê karanê xo kurdan xerc kenê. Teroro tewr pîl îşxlakerdişê Kurdîstanî yo.

Pê perspektîfanê Rayber Apoyî têgêrayîş û şarê ma heme planê dişmenî pûç vetî û pê hemleyanê cîya cîyayan têkoşînê her roje pîlêr kerd û heta ewro ard. Nê demî de xeylêk operasyonê qirkerdişî vera hêzanê ma û şarê ma ameyî kerdene. Dewleta tirka ke rixmê heme hêrişanê xo nêeşkayê vera têgêrayîşê ma bigêro 2008 de mecbur mend ke Oslo de têgêrayîşê ma reyde masa de ronişo. Nê pêvînayîşan hîrê serrî kerd derg. 2011 de netîceyê pêvînayîşan de protokolo hempar ame amedekerdene. Têgêrayîşê ma protokol qebul kerd la xeylêk wext hukmatê Erdoganî ra veng nêvejîya. Dima ra 16ê temmuze  pê îlankerdişê şerî cewab ame dayene û konseptê hêrişî kewt dewre.

AKPyî verî pêvînayîşî kerdî dima nişka hêriş kerd. Prosesê nê şerî de gerîlayan vînîkerdişê pîlî dayî. 2012 de têgêrayîşê ma prosesêkê hemlekî da despêkerdene û peynîya serre de dewleta tirke hetê gerîlayan ra ameye binfînayene. Sereyê 2013î de dewleta xorî ya tirke û hukmatê AKPyî rojdemfînayîşê adirbirnayîşî qebul kerd û Newroz de adirbirnayîş dest pêkerd. La eşkera bi ke înan semedê çareserî nê semedê amedekerdişê şerî adirbirnayîş qebul kerd. Badê pêvînayîşan verî fermandarê eyaletê Amedî embaz Nûman zî tede des hemrayê ma ameyî qetilkerdene û dima ra Paris de embazî Sara, Rojbîne û Ronahî ameyî şehîdkerdene.

Vakur de şer ameyêne kerdene hetê bînî bi destê çeteyan hêrişê vera destkewteyanê şarê ma kerdêne. Yanî pêvînayîşê prosesê çareserî‘ semedê AKP projeyê şerê taybetî bi. Hetêkî ra bi heyetê HDPyî û selahîyetdaranê dewlete pêvînayîşê Îmraliyî ameyêne kerdene hetê bînî ra 'Planê Çokdayîşî' ameyêne amdekerdene. Xora NATO zî paştî dayêne ci. Sey prosesê Osloyî Erdogan û hukmatê AKPyî badê îmzakerdişê protokolê Qesra Dolmabehçeyî reyna masa qeldaye û 24ê temmuza 2015 de şerêko newe dîya despêkerdene. Nika  nê şerdî 7 serrî xo dima verdayî. Dewleta tirke rixm heme hêrişanê xo ke bi metodanê cîya cîyayan kerdî vera têkoşînê kurdan ser nêkewt. Rayber Apoyî Îmrali  de têkoşînê bêhempa dano. Şarê ma rixmê heme zextan hêrişan sereberz têkoşînî rê dewam keno. Sîyasetê kurdan payra yo û demokratê Tirkîya xover danê. Nê pêro xeyrê têkoşînê xorî yê Rayberîya ma bîyî.

Dişmenê ke rixmê heme hêrişan ser nêkewt planê komployî yo bin fîna dewre. 10ê sibate ya 2021 de vera Garê hêrişêko xurt ame kerdene. La serkêşîya hemra Şoriş Betuşşebapî de fedayîyaynê Apoyîyan têkoşîno xur kerd û dişmen bin kewt. Şexsê şehîdanê Garê de reyna ame çiman ver fînayene ke ruhê çalakwananê 'Şima nêeşkenê tîja ma tarî bikerê' qerardar vera komployî  têkoşîn keno. Na çarçewe ma şexê hemrayan Şoreş, Rojhat û Seyfî de şehîdanê Garê yad kenê û sozê ke ma dayo înan newe kenê.

Hêrişê Garê têna semedê xelisnayîşê esîran nêbi. No hêrişêko pîl bi, sey komployê dîyinî amebi amedekerdene. Xeylêk hêzê ke engişta înan Komployê 15ê Sibate bibî nê plan goreyê qezencanê xo qebul kerd. Iraq zî paştî dayêne ci. Komployê dîyinî zafêr Başûrê Kurdîstanî ser o amebi plankerdene.  Badê Sadamî dewleta Iraqî reya verêne pîya bi Tirkîya plan kerd û ci rê warê hewayî akerd û sey fermî destûr da ke ê heme hêriş û operasyonanê xo tîya ra bikerê. PDKyî zî no konsept goreyê qezencanê xo dî û qebul kerd, tewrê ci bi.

Xora hesabê cîyayî yê Amerîka, Îngîlîstan û hêzanê serdestan bibî. Înan sey verî çînkerdişê PKKyî nê zehîfkerdişê ci waştênê. Waştêne endamanê îdareyî tesfîye bikerê ke PKKyî bifînê binê kontrolê xo. Coka 6ê kanûna 2018î de Amerîka derheqê hîrê embazanê ma de yê ke îdarekarê têgêrayîşê ma yê qerarê tepiştişî girewt. Sey nê hêrişê Garê zî pabesteyê komplo yê. Înan waştêne ke Garê de Merkezê HPGyî îmha bikerê. Verî Garê dima ra xeta Zap, Metîna û Avaşîn û tewr peynî de zî Qendîl. Înan wina plan kerdbi game bi game aver şirê û merkez û koordîne îmha bikerê. Planê înan o bi ke bi nê serkewtişî bikewê vîjnayîşî ke îqtîdarê xo bidomnê. Xora destkewteyê Başûr û Rojawanê Kurdîstanî zî hedefê înan de yê. La xoverdayoxanê ke Garê planê înan serûbin kerdî.

Nika ma serrgêra têkoşînê pîlî de yê. Bi na wesîle ez şehîdanê qehreman ê Garê hemra Şoreş, Cudî, Bawer, Erdal, Argeş, Avareş, Rojhat, Xeyrî, Delil, Xabûr, Rêber, Seydo, Seyfi, Arhat û Gelhatî bi hurmet yad kena. Nê qehremanan sey xoverdayoxanê 14ê Temmuze bi şehadetê xo verê serkewtişê dişmenî girewt û têkoşînê prosesî rê serkêşîye kerde. Têkoşînê Garê maneyê dişmenî şikit, sîstemê înan qelişîna. Reyna prosesê nê şerî hêzanê mîyanneteweyî ser o zî tesîr kerd.  Nê reyna heme dinya de fîna çiman ver ke çew nêeşkeno wina rehet têgêrayîşê ma tesfîye bikero. Her çî ra wetêr têkoşîn Garê semedê şarê kurdî Gerîlayanê Azadîye yê Kurdîstanî bi sebebê moralê pîlî.

Badê Garê Avaşîn, Zap û Metîna de gerîlayan têkoşîno xurt kerd. Dewleta tirke 23-24ê nîsane de pê helîkopteran leşkerê xo cayo ke tede ca kerdî ê hema eynî cade yê. Tesîrêko winayê ê têkoşînê Garê-Siyanê esto. Netîceya nê şerî de krîzê Tirkîya zî vejîya çiman ver. Bi qala kilme şerê 2021î ke Garê de dest pêker dû heta Werxelê dewam kerd eynî wextî de şerê demokrasî yê Tirkîya û têkoşînê azadîye yê şaran o. Kam vano se wa vajo 1980yan ra nata têkoşînê Gerîlayanê Azadîye yê Kurdîstanî û Rayber Apoyî têkoşînê azadîye û demokrasyîyî yê Tirkîya de zî rolo pîl kay keno.

Rixmê binkewtişî rejîmê AKP-MHPyî nêvindeno.  Mesela 20ê çeleyî de bi destê DAÎŞî hêrişê Hesekê kerd. Senî ke verî roja 20ê çeleyî de hêrişê Efrînî kerd reyna wina hêriş kerd la mîlîtananê YPG-YPJ-QSDyî bi ruhê Kobanê cewabê çeteyanê AKP-MHP-DAİŞî da. Badê şerê yew hewteyî 121 kesî şehîd bîyî û çeteyî bin kewtî. Şexsê Şehîd Cemal Kobanê de ma şehîdanê xo yê qehremananê ke Hemleya Gurzê Şaran resna serkewtiş bi hurmet yad kenê. Reyna demo peyên de Şingal, Mexmûr û Dêrik de hêrişî ameyî kerdene. Îşxalkerê ke hêrişanê xo ra netîce nêgênê hêrişê kampanê multecîyan kenê. Dişmen polîtîkaya fatisnayîşe ya ke verê Vakur de rayra berdene nika heme Kurdîstanî ra vila kerde.

Îmkan esto ke emser semedê têgêrayîş û şarê ma bibo serra serewktîye. Dişmen zehîf û bêmoral o. Seba ke merijîyo heme îmkananê xo şuxulneno .Dişmen zehîf bo zî ganî çirey wirde nêro vînayene. Têgêrayîşê ma xo rind amade kerdo.  Tewr peynî de kombîyayîşê Komîteya Merkezê PKKyî de analîzê hîrayî ameyî kerdene, her hetê ra karê ma gerîyayî dest û perspektîfê têkoşînê dewrî vejîyayî werte.

Tayîp Erdogan çend rey o qala Rayber Apoyî keno. No zî ramojneno ke tecrîd pûç ameyo vetene. Eşkerayo ke ê muhtacê Rayber Apoyî yê. Erdogan çend bi armancanê bînan eşkerayîyaynê bêehleqan bikero zî hetêkî ra hêzê Rayberîye îtîraf keno. Rayber Apo hêzo xurt o ke çew nêeşeno verê ci bîgêro.  Erdogan qisey keno la tecrîdî nêdareno we. Eşkera yeno vînayene ke Rayberîye û şarê ma ameyoxê welatê ma û Tirkîya de wayîrê rolê pîl ê.

Ma wazenê ke emser Komployê Mîyanneteweyî bi temamî wedarê. Têna pûçvetişê komployî qîm nêkeno, ganî bi temamî bêro wedaritene. No zî têna bi azadîya Rayberîye û Kurdîstanî mumkun o. Hedefê ma zî no yo. Gerîlayê Azadîye yê Kurdîstanî bi ruhê Apoyî eke têkoşînî aver bêrê qet hêzêk nêeşkeno verê ci de vindero.  Na çarçewe de serra 2022 do biba serra muhîme ya semedê azadîya Rayberîye û Kurdîstanî. Bi nê bawerî heme hemrayan bi heskerdiş û hurmetî selam kena serkewtişê pîlî wazena.''