Fermandarê Qerargeyê Merkezê Pawitişê Şarî Mûrat Karayilanî yo ke programê taybetî yê Radyoyê Dengê Welatî rê qisey kerd vat, “Seke marşê Ey Reqîbî de zî yeno vatene ‘Kamî vato Kurdî mirenê, ma nêmirenê, gane benê û estê.’ Çalakîya embaze Zîlane no peyam da. Na çalakîya ke merkezê Dêrsimî de amî viraştene adeta bîye rovanşê Terteleyê Dêrsimî.”

 

Qiseykerdişê Fermandarê Qerargeyê Merkezê Pawitişê Şarî Karayilanî yo ke Zeynep Kinaci (Zîlane), Sema Yuce û hemeyê şehîdanê şorişî bi vîr ardî wina yo:

“Ewro 30’ê Hezîrane yo, serrgêra çalakîya fedaîye ya hemraye Zîlane ya. Tîya 23 serrî verî hemraye Zîlane bi çalakîya xo ya fedaîye ya ke Dêrsim de viraşte bîye sebebê averşîyayîşêkê pîlî. Verê heme çîyî ez çalakîya ercayî ya hemraye Zîlane silam kena. Menga Hezîrane sey ‘Menga Fedaîyan’ yena zanayene. Çunke 6’ê Hezîrane de fermandar Gulan, 17’ê Hezîrane de hemraye Sema Yuce resaye şehadet. Xora 30’ê Hezîrane de zî hemraye Zîlane bi çalakîya xo na menge kerde menga fedaîyan.

Ganî kes çalakîya hemraye Zîlane sey çalakîyêka alelade ya leşkerîye nêvîno. Manaya ci ya pîle esta. Hemraye Zîlane bi çalakîya xo ramote ke ganî mîlîtanêka partî hemverê hêrişanê serê Rayberîya xo de senî cewab bido, canê xo senî bikero mertal û senî Rayberîye bipawo.

Yo dîyin têgêrayîşê ma de ruho fedaî her tim estbi. Xora vejîyayîşê Rayber Apoyî bi fedaîtîye yo û fedaîyo tewr pîl Rayber Apo yo. Çalakîya fedaîye ya ewilêne Zîndanê Amedî de hetê Mazlûm Doganî ra amî viraştene. Dima ra embazan bi rojeyê mergî û çalakîyanê bînan no hîna aver berd. Gerîla û fermandarê ma yê sey Egîd (Mahsûm Korkmaz) û Celal Hoca (Ramazan Kaplan) yo ke serê koyanê Kurdistanî de bî zî ruho fedaî aver berdibi. Labelê hemraye Zîlane ramot ke kes bi plan û amadekarîye senî eşkeno çalakîya fedaîye virazo. Naye ra hemraye Zeynep Kinaci fedaîtîye de bîye tîtik.

Manaya hîrêyine ya çalakîya Zîlane zî Dêrsim de virazîyayîşê ci yo. Zîlane bi viraştişê Dêrsimî cewabo tewr bitesîr û manîdar da dişmenî. Seke marşê Ey Reqîbî de zî yeno vatene ‘Kamî vato Kurdî mirenê, ma nêmirenê, gane benê û estê.’ Çalakîya embaze Zîlane no peyam da bi dişmenî. Na çalakîya ke merkezê Dêrsimî de amî viraştene adeta bîye rovanşê Terteleyê Dêrsimî.

Dimayê Xoverdayîşê 200 Rojan ra Dêsê Tecrîdê Qetîyî Derezîya

Grevê vêşanîye û rojeyê mergî yê ke netîceyê hemleyêk ê xo rê ruhê Zîlane û xoverdayoxanê 14’ê Temmuze esas girewt. Bi na wesîle ez heme xoverdayoxan silam kena, heminan rê serkewtiş wazena. Nê dewrî de averşîyayîşê ke hetê hemleya grevê vêşanîye yê 200 rojan ra ameyê afernayene bi sebeb ke dêsê tecrîdê qetîyî de lanî a bibê. Tîya ra vengê Rayber Apoyî vejîya û resa ma. Tîya de qezenco tewr pîl û muhîm no yo ke dimayê 4 serran ê tecrîdê giran û qetîyî ra vengê Rayber Apoyî resayo teber.

Nê 5 serranê peyênan de Îmrali de, koyanê Kurdistanî de, Şengal de û Kobanê de hêrişê pîlî yê dewleta Tirkî û DAÎŞ’î virazîyayî. Bi na wesîle ez şarê ma yê sivîlî yê ke 25’ê Hezîrane de Kobanê de bi hawayêkê barbarî hetê MÎT’ê Tirkî ra û DAÎŞ’î ra ameyî qetilkerdene zî bi vîr ana. Bêguman tewirê Rayber Apoyî yo ke eşkera kerdo seba ma peyam o û çimeyê hêzî yo. Çunke Rayber Apo şertanê tewr zehmetan de zî wayîrê çareserîye yo. Ganî heme mîlîtanî û şarê ma yê welatperwerî fam bikerê ke Rayber Apo senî bi tewirêkê nêşaşî, bi îradeyêkê poladî û bi sebrêkê pîlî xover dano.

Do Gonîya Şehîdan Erd de Memano

Sere de ez 3 merdimanê ma yê ke Kortek de şehîd kewtê û ancî merdimê ma yo ke vizêr Goşine de şehîd kewt bi minet bi vîr ana. Rejîmê AKP-MHP-Ergenekonî yê dişmenê Kurdan ê bisondî ê şehîd kerdê. Do gonîya înan erd de memano û qesasê înan bêro girewtene. Sere de ma keyeyanê nê şehîdan rê, şarê Qendîlî rê, şarê Başûrê Kurdistanî rê û hemeyê şarê ma rê serweşîye wazenê. Ancî ez birîndaran rê zî şîfaya lezgîne wazena.

Birastî zî no hal şerm o. Vizêr Hukmatê Herême yê Kurdistanî eşkerayîyêk daye ma nêwazenê aye şîrove zî bikerê. Bi nê cewabê dewleta Tirkî xora her çî vejêno werte. Biraştî zî hetê Kurdan ra no şermêko pîl o. Ganî hukmatê herême û selahîyetdarê PDK’yî dewleta Tirkî rê hende ware nêkero a. Na şaşîyêka pîl a. MÎT’ê dewleta Tirkî rê dayîşê îstîxbaratî şaşîyêka pîl a. No xizmetê şarê Kurdî nêkeno. Netîce de ewladê ercayeyî yê şarê Kurdî û mîlîtanê êyê fedaîyî hetê teyareyanê Tirkan ra yenê şehîdkerdene. Yan zî şarê ma yo sivîl yeno şehîdkerdene. Çimê dewleta Tirkî de heme Kurdî terrorist ê û kişîyayîşê înan helal o.

Sîyaseto Xelet Şarê Ma yê Başûrê Kurdistanî rê zî Xizmet Nêkeno

Ez nêwazna tîya vatişanê zaf giranan bişuxulnî. Çunke ma, sey Kurd wazenê problemanê mabênê xo bi dîyalogî hal bikerê. Hewna zî ma pawenê ke ê do kemasîyanê xo bivînê û sîyasetê xo bivurnê. No sîyaseto xelet şarê ma rê xusûsen zî şarê ma yê Başûrî rê xizmet nêkeno. Ma pawenê ke ê na xeletîya xo ra agêrê û sîyasetê xo bivurnê. Çi problem esto ma wazenê bi dîyalogî hal bikerê. Dewleta Tirkî bi nê kerdişanê xo wazena ke Kurdan vera bido pê û bikero zihîf. No amacê ci esto, la tena no nêyo! Hetêna ra zî wazena ke Başûrê Kurdistanî îşxal bikero, heme dinya de zî vajo ke miletêk, neteweyêk sey Kurd çino, dereceyêka înan a winayêne çina, tena komalêkê eşîre yê. Nînan pêrune MÎT keno.

PKK Hemverê Hêzanê ke Dest Erzenê Qezencanê Şarê Kurdî Şer Keno

Her kes zano ke ma hemverê dewleta Tirkî ya kolonyalîste û qirkerdoxe de şer kenê. Wa her kes bizano ke ma do tîya tepîya zî şer bikerê. Ma Dêrsim, Amanos, Botan û Amed de şer kenê. La dewleta Tirkî hurzena yena sînorê ci ra 120 kîlometre dûrî hêrişê şarê ma yê Kortekî kena. Tayê zî vejênê vanê ‚Rîyê şerê mabênê PKK’yî û dewleta Tirkî ra wina beno.‘ Waye û birayê mi wina nêyo! Ma Vakurê Kurdistanî de şer kenê. Labelê gama hêzêk sey DAÎŞ’î hêrişê qezencanê şarê ma yê Başûrê Kurdistanî bikero hêzê ma bi lezgînî yenê şirawitene bi Şengal, Mexmûr yan zî Kerkûk ma şehîdanê danê û pawenê. Bi nê hawayî gama ke dewleta Tirkî zî hêrişê Başûrê Kurdistanî kena ma qerardar ê ke heta peynî xover bidê û ma nika zî xover danê. Ma do heme qezencanê şarê xo yê Başûrê Kurdistanî bipawê. Nê bingeyî de ma soz dayo şarê xo. Ma do qezencanê şarê xo her ca de bipawê, çunke ma fedaîyê nê şarî yê.

Ma wazenê ke ma sey Kurd yewbînan fam bikerê û nêkewê xetayan mîyan. Dayîşê îstîxbaratî dewleta Tirkî rê xetayêka pîl a û ganî nêro kerdene. Birnayîşê dîyalogî çareyêk nêyo. Çareyê her çîyî esto. Ganî ma pêro mesuldar nizd bibê. Ma hetê xo ra wazenê ke bimesuldar nizd bibê.

Dewleta Tirkî bi Tewirê Xo yê Detroyî Rîyê Xo yo Rastekên Ramot

Sere de ez şarê dewa Dertoyî û heme dewijanê Xelfetî bi rêz silam kena. Dewleta Tirkî ya faşîste û hukmatê AKP-MHP’yî rîyê xo yo rastekên dewa Dertoyî de û dewanê dormeyî de ramot. Ganî heme şarê ma yê Dertoyijî û Xelfetîyijî bizano ke eke dişmenî ûca bicaardişê barbarî hemverê cinî, doman û camêrdanê ma kerdê, no yeno manaya tersayîşê dişmenî. No rayîr rayîrêko pîroz o, rayîrê azadîya şarê Kurdî yo û yê heme şaran o, dewaya ma ya cewherî ya. Ma çende nê rayîrî de ezîyet biancê heta şehîd bibê zî nê rê ercêno. Fedakarîyê şarê ma veng a nêşîyê û do nêşirê.

Hetêna ra rastîyêka bîne esta ke Rayber Apo nê cayî de vejîyayo werte. Dewê ke ûca yê nizdê yewbînan ê, demêk ma zî şîyî a herême, ma ê doran nas kenê û zanê. Ha dewa Amara, ha dewa Dertoyî her diyî zî heman ê. Naye ra dişmen ûca ra zaf terseno. Çunke ûca cayê vejîyayîşê Rayber Apoyî yo. Helbet do hesabê kerdişanê înan bêro persayene. Do hesabê barbarîya ke dişmenî Xelfetî de kerda hem wareyê mîyanneteweyîyî de bêro persayene û hem zî bîzat bi mîyanê pratîkî de bêro persayene. Do qesasê mayan, keynayan û birayanê ma yê camêrdan erd de memano.

Di Embazanê Fedaîyan Heta Peynî Xover Dayo

Wina fam beno ke ûca di fedaîyî estbîyê. Ma sey Qerargehî se ra se nêzanê ke kam ê. La destê ma de tayê daneyî estê, seba ke hewna nêbîyê zelal ma eşkerakerdişê înan rast nêvînenê. Di hemrayê fedaîyî seba ke hemverê dişmenî de şer bikerê nê, seba ke mîyanê şarî de xebate bikerê şîyê ûca. Qaso ke ma fam kerd nê di hemrayê bianor û şerefî seba ke teslîmê dişmenî nêbê bi yew di sîlehanê qijkekan xover dayo. No xoverdayîşê înan zaf pîroz û ercaye yo. Hayîdarîyê bidetayan ser o kes eşkeno dima qisey bikero. Pratîk de çîyo ke aseno tewiro bianor ê di hemrayanê ma yê qehremanan o. Xoverdayîşê înan seba ma peyamêk o û munasibê Xelfetî û herême tewirêko ercaye yo. Tewirê hem di hemrayanê ma yê ke xover dayo û hem şarê ma yo ke xover dayo manîdar o. No tewirê înan seba ma peyamêk o, ma do zî cewabo ke lazimî bi ci esta bide. Do vîrameyîşê şehîdan bêro ciwîyayene, qesasê şarê ma erd o nêro verdayene û dişmenî ra rew yan zî erey hesab bêro persayene.”