Endamê Komîteya Rayberdişî ya PKKyî Murat Karayilanî Bernameyê Taybetî yê Stêrk TVyî de rojdem ercna.

Tecrîdo giran ê serê Rayberê Şarê Kurdî Abdullah Ocalanî dewam keno. Vera tecîrdî şarê kurdî zî tim çalakîyan keno. Şima merheleya ke ameya senî ercnenî?

Vera Rayber Apoyî hêrişo giran est o. Nê hêrişî bi metodê îşkenceyê psîkolojîk û tecrîdê giranî yenê kerdene. Ma tim vanê no tecrîd têna vera şexsî nê vera şarî yeno kerdene. No tecrîd vera azadîya şarê kurdî, ameyoxê şarê kurd û vera demokrasî, huqûq û edaletê Tirkîya yeno kerdene. Reyna vera şaranê herême yo. Pê nê tecrîdî Kurdîstan de sîyasetê qirkerdişî yeno rayraberdene. Xora şar û dostê ma zî nê zanê. Coka demê peyênî de nêrazîbîyayîşî giranî yenê mojnayene. Hem Kurdîstan de hem teberê welatî de vera tecrîdî çalakîyî yenê kerdene la nê çalakîyî qîm nêkenê. Xora nê çalakîyî ganî rewna biameyêne kerdene, zaf kewtî erey. Seba ke sîstemê îşkenceyî yê serê Rayber Apoyî bêro şiktene ganî çalakî û aktîvîteyî dahîna xurt bêrê kerdene.

Zap de şerêko giran est o. Dişmen tay cayan ra ancîya, xeylêk waran de çekanê kîmyewîyan şuxulneno. Zap de rewşa peyêne senîn a?

Dewleta tirke seba ke binkewtişê xo binimo programan û eşkerayîyan kena, muneqeşeyan rayra bena. Hetê kurdan ra zî rewşe yena ercnayene. Ma vînenê ke rewşe hole nîna famkerdene. Vatişê dişmen Zapî ra rema şi raşt nîyo la vatişê dişmen her hetê rÊ bîyo hekîm zî xelet o. Raşt oyo ke inkey şerêk est o û no şer dewam keno. Şer nêqedîyayo. Raştîyî nînê famkerdene û her kes rehet têgêreno. Beno ke na kêmayîya ma bo. Ma rewşe hole nêda famkerdene. Ez verî nê vajî. Ewro şerê Vakurî her  eyaletî de yeno ciwîyayene. Inkey Zap, Metîna û Avaşîn de yeno ciwîyayene.

No şer hetê dewleta tirke ra ame destpêkerdene. Ma vera şerî xoverdayîş kenê. Ma çareyê sîyasîyî wazenê la dewleta tirke masaya çareyî qelda û hêrişê ma kerd.  2012yî ra nata Başurê Kurdîstanî ra guleyêk zî nêerzîyayo Tirkîya. Dewleta tirke seba ke destkewteyanê kurdan îşxal bikero 2015-2016î ra nata hêrişê Başûr û Vakurê Kurdîstanî kena. Vera ma hêrişo yewhet est o û şerê ma şerê xopawitişî yo, şerê pawitişê herra Kurdîstanî yo, şerê pawitişê herra bimbareke yo.

Seke yeno zanayene 2020 de Heftanîn de şer dîya destpêkerdene û serrêke dewam kerd. 2021 û 2022 de zî dewleta tirke Avaşîn, Zap û qismêkê Metîna de hêrişê îşxalî da destpêkerdene. Ma vera nê xover da. Ma pê nê xoverdyaîşî herra Başûrê Kurdîstanî pawenê.  Eke ma mepawitêne, Garê ra heta Mexmûr û Şingalî herra Kurdîstanî do biameyêne îşxalkerdene. Dewleta tirke waşt leşkeran û hêzanê xo yê Başîka biresno pê. Plan no bi. Inkey qey Başîka ra nêancîyena? Rixmo ke dewleta Iraqî çend serrî verî waşt zî nêancîyena. Bi hewyêkê mîyanî MÎTî Kerkuk de ca kena. Planêkê ci est o. Binê nameyê 'têkoşînê vera terorî' de nê planê xo rayra bena.  Ma nê têkoşînî de zaf bedelê giranî dayî. Ganî her kes nê bivîno. Şer hema dewam keno. 2022 de dişmenî waşt bi temamî Zapî îşxal bikero. La rojawanê Zapî de dişmen nêeşka mewzîyêkê gerîlayan zî îşxal bikero û tunelêkî zî biqefilno. Coka tîya nêeşka ca bido xo.

Girê FMyî ke peyê dewa Zêvê de yo dewleta tirke inkey wazena hêzê xo ûca ca bikero. Rayîrî ard, tanq  zî ard. Wazena ûca de ca bido xo. Hîrê tumî tepiştî. La ûca ma zî est ê, embazê ma est ê. Tumê Şehîd Mûnzûr de şer est o ke dişmen wazeno xo tede ca bikero. Embazê ma destûr nêdanê. Dewleta tirke vera ê embazanê ma her qeyde çekan şuxulnena. Girê FMyî de têkoşîno xurt est o. Yanî rojawanê Zapî de dewleta tirke bêtesîr a. Hetê rojawanî de Metîna est a. Metîna û Girê Hakarî qefilnayî la embazê ma zî nêzdîyê ûca yê. 25ê teşrîna peyêne de embazan hemleyêke daye destpêkerdene û derbeyê girdî dayî dişmenî ro. Demê kilmî de do bewlî bibo ke dişmen eşkeno ûca vindero ya nê. Ûca zî bin kewtî la şer hema dewam keno. Rojhelatê Zapî zî nêeşkayî bigêrê. La dişmenî inkey heme giranîya xo daya xeta ke kiştê Avaşînî de ya.  Çemço û dewa Sîda de inkey şero giran est o. 290 rojî yo gerîla destûr nêdano dişman tîya ca bido xo. Ma soz dayo ke ma do her hetê Kurdîstanî bipawê. Her cayo ke dişmen wazeno îşxal bikero, ma do têkoşîn bikerê.

Binateyê zimistanî de dewleta tirke ser nêkewt û operasyonê xo qedîna. Vanê ey Zap de ser kewtê la no raşt nîyo. Girê FM û Avaşîn de şero giran est o. Dewleta tirke û hukmatê AKP-MHPyî şarî xapîneno. Bi vatişê qedîyayîşê operasyonî wazenê merdeyanê xo binimnê la tim leşkerê înan mirenî. Zap de cenazayê leşkeranê xo vêşnayî û remayî. Bi qala kilme dewleta tirke bin kewte la şer dewam keno. Tay cayî qefilnaye yê. Ma hema leşkeranê tirkan reyde têmîyan de şer kenê. Rewşe wina ya. Gerîlayî bi îradeyê xurtî şerê tarîxî kenê. Seba ke no şero tarîxî ser bikewo ganî sere de şarê  Başûrê Kurdîstanî şarê çar parçeyanê Kurdîstan wayîrê nê têkoşînî bivejîyo.

Besta de şerêke est o. 6 gerîlayê cinîyî şehîd bîyî. Kontra Nimet Encu zî ame cezakerdene. O konra raştîya Kurdîstanî de çi îfade keno? Kamî temsîl keno?

Yew raştîya komelê Kurdîstanî est a. Yewca de çend çîyêko rind û erjîyaye est o, çîyêko xirab zî est o. Yanî xîyanet zî est o. Bêşik ma pêro qoricîyan sey xayînan nêvînenî la mîyanê qoricîyan de kesê ke raşta xayînîya şarê xo kenê est ê. Nimet Encu zî înan ra yew o.  Roboskî û  Bêceh di dewê  ke yewbînan ra nêzdî yê. Badê qirkerdişê Roboskî ma nê pawitêne ke çew dewleta tirke rê ajanîye bikero. Beno ke çeka ti bibo la ajanîye mekerê. Embazî nê kesî ser vindetî, waşto wa ajanîye caverdo la canêverdayo. Hem zî zafêr xîyanet kerdo. Nê şexsî zaf xizmetê dewleta tirke kerdo. Nimet Encu hem operasyonan de vernîya dişmenî de ca girewtêne û hem zî ajanîye kerdêne. Şehadetê hemra Savaş Maraş û çar embazanê fedayîyan û fermandarê Metîna Têkoşer Şemzînanî pê destê ey bi. Başûrî ra zî tay kesan mîyanê nê xîyanetî de ca girewt. Wa şarê ma yê Goyî û Bêcehî na raştîye bizano. Encuyan ra 18 şehîdê ma est ê. Yew eşîrî ra hem wina qehremanî vejîyenê, hetê bînî ra xayînî vejîyenê. Ma nê bizanê ke dişmen têna nêeşkeno ma. Eke kurdê xayînî paştî medê ci dişmen nêeşkeno hêrişê ma bikero. Ganî kurdî hinda şarê xo rê xayînîye mekerê. Ganî ma hinda yewîya xo ya neteweyî  ronê.