Endamê Komîteya Şaran û Bawerîyan a KCKyî Mîrxan Karkerî Roşanê Qurbanî yê  şarê kurdî alemê îslamî bimbarek kerd.

Mîrxan Karkerî ard ziwan ke roşan sembolêko muhîm û nê vatî: ''Mesele têna birnayîşê heywanêkî nîya. O wext zaliman, kralan her çîyê însanan girewtbi, nê zî qîm nêkerdbi vatêne qijanê xo semedê ma bibirnê.Vatêne eke şima qijanê xo mebirnê şima do poşman bibê, cuye şima rê do biba herim û şima do bierzîyê cehenemî. Hetêkî şar tersnayêne hetê bînî ra hêvî dayêne. Vatêne eke şima sey ma bikerî şima do şirê cenetî, eke sey ma mekerî şima do şirê cehenemî. Hz. Îbrahîm vano ganî hinî însanî semedê menfeatî, îqtîdarî memirê û sembolêkê bînî vîneno.

La roja ma de êyê ke nameyê Hz. Îbrahîmî şuxilnenê kerdişanê zalimanê ê rojan kenê. Semedê menfeatê xo  bi nameyê dewlete, dînî, beyraqe, sinorî însanan verdenê pê, însanan qetil kenê, sereyê înan birnenê, însanan vînî kenê, îşkence kenê. Yanî sey Nemrutan têgêrenê. La Hz. Îbrahîmî no qebul nêkerd. Zalimanê roja ma zî seba ke însanî raştîyanê dînî memuse xeylêk dezgehî nayî ro. Mesele butçeya girde dîyena dîyanetî, xebatkarê ci wesayîtanê bi modelê peyênî şuxilnenê, bi hezaran endamê ci est ê. Camîyanê girdan virazenê ke di kesî nêşinê ci. Biewnî Kabe senî sade yo yew zî biewnê nê sekenê. Nê seba ke dizdîye û zûranê xo binimnê vanê 'Mi qesre semedê xo viraşt, mi keyeyê Hûmayî zî sey qesre viraşte.' Bi mîlyonan kesî şinê Kabe la sade yo. Eke destê înan ra bêro Kabe zî bedilnenê.

Îqtîdar dim dînî şuxilneno. Vano feqîrî dahîna lez şinê cenetî. Eke wina yo ti qey qesranê xo, mal û milkê xo feqîran nêdanî. Nê munafîqî, bêdînî, bêîmanî bi komelî kay kenî. Nê însanê ke dînî şuxilnenê vatişê înan cîya, cuyeya înan cîya ya. Ganî nê dişmenî kede hol bêrê naskerdene. Coka ganî şarê ma, malayî, kesê wayîrê zanayîşê dînî nê munafiqan wa teşhîr bikerî. Bi na wesîle ma reyna Roşanê Qurbanî yê şarê xo yê xoverdayoxî, Rayberîya xo û alemê îslamî bimbarek kenê.''