Komîteya Ekolojîyî ya KCKyî derheqê şewatê mabênê Amed û Mêrdînî de eşkerayîye daye û nê vatî:

''Ma dejê şarê xo yê Şemrex  û Çinarî yê qirkerdişê ke bi destê DEDAŞ û dewlete ame kerdene, bare kenê, kesanê ke qirkerdiş de dinyaya xo bedilnaye ma înan rê rehmet, merdimanê ci û şarê Kurdîstanî rê serweşîye û birîndaran rê şîfa wazenê.

Îfadeyê şahîdan mojneno ke qirkerdiş eşkera hetê DEDAŞî ra ame kerdene. Rixmo ke şar bi serran o muracat keno û wazeno wa şirîtê ceyranê bêrê tehmîrkerdene ê tehmîr nêbîyî. Coka berpirsîyarê nê qirkerdişî DEDAŞ o. Sey her wextî îqtîdarê AKPyî narey zî wazeno ke berpirsîyaranê qirkerdişî bipawo. Îqtîdaro ke pîya bi DEDAŞî berpirsîyarê  nê qirkerdişî yo keno sûcî binimno, îdîa keno ke şewat hêgayan  de vejîya ke berpirsîyarî bierzo şarî ser.

DEDAŞ hîrê qirkerdişî pîya kerdî. Şemrex û Çinar de merdimî merdî, zirar dîya xoza û bi seyan heywanî merdî. DEDAŞo ke bi serran o bi hewayêkê sîstematîkî  û plankerdeyî   polîtîkaya dişmenîye vera kurdan rayra beno, narey eşkera dişmenîya xo mojna ra. DEDAŞ tim kurdan bêawe û bêceyranî verdeno, herinda xizmetî de kurdan rê zulm keno. Bi polîtîkayanê dişmenîye Kurdîstan de qirkerdişo ekolojîk û şero taybet rayra berdî. Cografyaya Kurdîstanî ya ke tede awbendî ameyî ronayene ke eşkenê xizmetê awe bidê heme Rojhelatê Mîyanênî bi destê dewlete û DEDAŞî bêawe û bêceyranî yena verdayene ke wa citkarî û heywankarîye biqedîyo. DEDAŞî vengkerdişê Kurdîstan de zî rol girewt.

Pîya bi DEDAŞî îqtîdarê AKPyî zî berpisîyarê nê qirkerdişî yo ke mudaxaleyê şewatî nêkerd. Bi nê qirkerdişî reyna ame vînayene ke felaketê pîlî yê vera şar û xoza bi destê dewlete yenê kerdene. Dewleta tirke teyara û helîkopteran û cendirmeyanê xo semedê qirkerdişê kurdan, çînkerdişê xozaya Kurdîstanî şuxilnayî. Ma sey şaranê Kurdîstan û Tirkîya û têgêrayîşê ekolojî berpirsîyarê ke xoza û heywanan vera felaketanê dewlete bipawê. Ganî vera polîtîkayanê dewlete bêro vejîyayene.

Ganî vera caardişanê ke daristan, herre û awe xesp kenê û ameyoxê ma tehdît kenê bêveng mero vindetene.Qewimîyayîşan mojna ra ke ganî merdim dewlete ra hetkarî mepawo, tira hesab biperso û vera felaketanê ci tedbîran bîgêro û têkoşînî xurt bikero. Ma têna bi têkoşînê topyekunî eşkenê polîtîkayanê dişmenîye yê vera kurdan û xoza vindarnê. Ganî têkoşîn bêro xurtkerdene ke semedê qirkerdişan dewlete û DEDAŞî ra hesab bêro persayene. Ma têna bi têkoşînê ekolojîkî yê hemparî eşkenê nê zîhnîyetê faşîst û qirkerî vindarnê. Bi têkoşînî ma eşkenê verê felaketanê îqtîdarî bîgêrê.''