Hemserekîya Konseya Rayberdişî ya KCKyî bi eşkerayîya nuştekîye cewab da eşkerayîya Mesûd Barzanîyî.

Hemserekîya Konseya Rayberdişî ya KCKyî vat ke: ''Komîteya Rayberdişî ya PKKyî û Konseya Rayberdişî ya KCKyî bi eşkerayîyanê xo da zanayene ke yew meseleya înan bi PDKyî û hukmatê Başûrê Kurdîstanî çin a û têna îfade kerd ke PDK têkilîya xo ya bi TC û ferkerdişanê TCyî ra semed vera Têgêrayîşê Azadîye yê Kurdan tewiro negatîf mojneno.''

Barzanîyî îdîa kerdbi ke pêşmergeyan wexto ke vera DAÎŞî şer kerdêne PKKyî tay herêmî îşxal kerdê. Hemserekîya Konseya Rayberdişî ya KCKyî cewab da nê îdîayan û vat: ''Gerîlayan Şingal DAÎŞî ra xelisna. Bi nê hawayî înan PDK seba ke nêbo berpirsîyarê qirkerdişêkê pîlî xelisna. Nê mudaxeleyê gerîlayan her çî ra verî rûmetê PDKyî pawit. Wexto ke referandumê Kurdîstanî yê 2017î ra dima Kerkûk de pêkewtişî vejîyayî gerîlayan heta peynî Kerkûk pawit û tewr peyên zî gerîlayan uca terikna.

Embaz Murat Karayilanî ard ziwan ke PDK sewqîyatê hêz û çekan keno û bi nê hawayî wazeno dormeyê gerîlayan bigêro. Embaz Karayilanî pare kerd ke no amadekarîya şerî û ferzkerdişê şerî yo û venga rayaumûmîye û şarê kurdan da ke wa hîsger bibê. Karayilanî Serekê Pêroyî yê Mesûd Barzanîyî ra zî waşt ke wa verê na rewşe bigêro. La Mesûd Barzanîyî tay eşkerayîyî dayî ke pê nînan xîret keno bira şerê xo meşrû bikero. Mesûd Barzanîyî raştîyî vurnayî û xîret kerd ke rayaumûmîya kurdan rê zanayîşanê şaşan bido.

Eşkerayîyê ci mojnenê ke ê pê qerardar ê ke vera PKKyî şer bikerê

Serekê PDKyî Mesûd Barzanîyî eşkerayîya xo da sebebê sewqîyatê hêzanê xo yê seba herêmanê gerîlayan û ablûqaya gerîlayan eşkera kerdî. Bi nê hawayî ey îsbat kerd ke nîyetê înan esto ke vera PKKyî şer bikerê, seba naye bire girewte û hê pabeyê zemîn û firsendê musbetî yê. Rayaumumîya kurdan tewirêko hîsger pawitêne la eşkerayîya Barzanîyî venga gerîlayan dana ke herêmanê xo biteriknê û têkoşînê estbîyayîşê kurdan ê vera dewleta tirke ra fek vera bidê. Bi nê hawayî eşkera bi ke çira dormeyê herêmanê gerîlayan ame girewtene.

Meseleya PDKyî bi PKKyî esta

Komîteya Rayberdişî ya PKKyî û Konseya Rayberdişî ya KCKyî eşkerayîyanê xo de ard ziwan ke yew meseleya înan bi PDK yan zî hukmatê Başûrê Kurdîstanî çin a û têna îfade kerd ke PDK têkilîya xo ya bi TC û ferkerdişanê TCyî ra semed vera Têgêrayîşê Azadîye yê Kurdan tewiro negatîf mojneno. Eqsê eşkerayîya Mesûd Barzanîyî wina yew meseleya PKKyî çin a û PKKyî qey yew ferzkerdişo leşkerî nêkerd. Eqsê ci bi xo PDKyo ke dewleta tirke reyde têkilîye nano ro û bi ablûqaya herêmanê gerîlayan ferkerdişê leşkerî keno, PKK xo rê mesele keno. Pêro dinya zanena ke heta ke şima dişmenîya vera PKKyî nêkerê nêeşkenê dewleta tirke reyde têkilîye ronê.

Qestî ra bi rayaumûmîya kurdan rê zanayîşê xeletî dîyenê û wina yeno mojnayene ke qaşo PKK statuyê Başûrê Kurdîstanî xo rê mesele keno û zerar dano kurdan. Bi nê hawayî ê hêrişkerîya xo kenê meşrû û heqdar. Eke heta ewro Başûrê Kurdîstanî û parçeyanê bînan de kurdî bibê wayîrê destkewteyan destvistiş û pawitişê nînan de barê PKKyî zî pîl o. Eke PKKyî têkoşînê xo yê 50 serran de bi hezaran şehîd, gazî û esîranê xo reyde parçeyanê Kurdîstanî û dinya de warêkê sîyasî yê kurdan awan nêkerdêne mumkîn nêbîyayêne ke nê destkewteyî bêrê destvistene û pawitene. Coka destkewteyê Başûrî têna ê PDKyî nîyê; ê partîyan ê bînan û têkoşînê çar parçeyanê Kurdîstanî yê. Bêguman berpirsîyarîya ma ya ke ma destkewteyanê xo bipawê. Pêro şarê kurdî zî zaneno ke ma çend reyna pê tewir û pratîkanê xo na berpirsîyarîya xo arde ca.

PKK do heta peyêne destkewteyanê kurdan bipawo

Tewr zaf DAÎŞî û dewleta tirke ya kolonyalîste destkewteyanê kurdan rê gefî wendî. DAÎŞî Rojawan, Başûr û Vakur de hêrişê hêzanê azadîye û destkewteyanê kurdan kerd. Peyê nê hêrişan de zî dewleta tirke ya dişmena kurdan estbî. Wexto ke DAÎŞî hêrişê Başûrî kerd îxtîmalê tehlukeyê vînkerdişê destkewteyan estbi. Gerîlayan vera nê tehlukeyî bêşik Başûrê Kurdîstanî pawit. Gerîlayan berê Hewlêrî tepişt û seba ke Kerkûk nêkewo destê DAÎŞî pêşmergeyan reyde mil bi mil şer kerd. Hêzanê sîyasîyan ê Başûrê Kurdîstanî seba pawitişê Başûrî bi zanayîş û tesdîqê PDKyî venga gerîlayan dabi. Mesûd Barzanîyî seba ke gerîlayan rê sipas bikero şibi Kampa Mexmûrî û Fermandarê HPGyî Şehîd Têkoşer Geverî ra bi xo sipas kerdbi. Serekê Pêroyî yê PDKyî Mesûd Barzanîyî semedo ke hetkarîye nêkerde û hêrişê DAÎŞî têna seyr kerdî dewleta tirke rexne kerdbi. Raştîyî wina yê. Vatişê 'Wexto ke DAÎŞî hêriş kerd PKKyî tay cayî îşxal kerdî' pê vîr û hîsgerîya kurdan yarîkerdiş nîyo?

Şingal de PKKyî rûmetê PDKyî xelisna

PDK nika kesanê ke verê Hewlêrî tepişt îlegal îlan keno û vera ê kesanê ke Şingal de rûmetê PDKyî xelisna dişmenîye keno. Goreyê Mesûd Barzanîyî wexto ke PDKyî vera DAÎŞî şer kerdêne gerîlayan Şigal îşxal kerdo! Pêro dinya zanena ke wexto ke gerîlayî pê vazdayîşî şîyî Şingal û înan mudaxeleyê DAÎŞî kerd uca de ne Iraq ne zî yew hêzê PDKyî nêmendbi. Gerîlayan Şingalî destê yew hêzê bînî ra nêgirewt, gerîlayan Şingal DAÎŞî ra xelisna. Bi nê hawayî gerîlayan PDK berpirsîyarîya qirkerdişê pîlî ra zî xelisna. Nê mudaxeleyê gerîlayan her çî ra verî rûmetê PDKyî pawit. Wexto ke referandumê Kurdîstanî yê 2017î ra dima Kerkûk de pêkewtişî vejîyayî gerîlayan heta peynî Kerkûk pawit û tewr peyên zî gerîlayan uca terikna.

PKKyî û gerîlayan ciwanê êzidîyê ke vera DAÎŞî têkoşîn kerdêne perwerde kerd; hetkarîya înan kerd ke ciwanî hêzê xopawitişî awan bikerê û dima zî Şingalî ra vejîyayî. Nika mîyanê YBŞyî de tay ciwanê erebî estê la YBŞ domananê şarê êzidîyan ra yeno meydan. Têkoşînê vera DAÎŞî de ciwananê kurdan ê elewî û sûnnîyan xo resna hewarê kurdan ê êzidîyan. Heta ereban û gerîlayanê enternasyonalîstan zî êzidîyan reyde mil bi mil vera DAÎŞî şer kerd. Coka ê vatişê seba Şingalî raştîyan ra dûrî yê. Êyê ke nika Êzidxan pawenê û îdare kenê şarê êzidîyan û domanê êzidîyan ê.

Gerîlayî hêrişanê DAÎŞî ra verî kamca de bîyî nika zî uca de yê. Serranê 1980,1990 û 2000an de zî heman cayan de bîyî. Coka îdîaya ke wexto ke DAÎŞî hêriş kerd gerîlayan tay cayî vistê destî bi temamî raşt nîya, bêbinge ya. Na îdîa armanc kena ke şerê vera gerîlayan bibo meşrû û rayaumûmîya kurdan pê bixapîya.

Gerîlayan çirey verê dewijan nêgirewt

Îdîayêkê PDKyî zî wina yo ke PKKyî verê dewijan girewto û nêverdayo ke dewê ke ameyî vengkerdene de xo newe ra ca bikerê. No vatişêko xelet o ke rayapêroyîye bêro xapînayene. Dewê ke bîyî veng wextê îqtîdarê Saddamî de ameyî vengkerdene. Waranê gerîlayan de xeylêk dewî estê û hûmara dewijanê nê dewan zêdîyena la rîyê hêrişê dewleta tirke ra tay dewan de şar nêeşkeno biciwîyo. Ya zî PDK nê dewijan sey paştgêrê PKKyî vîneno coka destûrê nê dewam nêdano. PKK û gerîlayan qet verê yew dewe nêgirewto. Reyna vatişê gerîlayî dewan rê zext kenê û bacî arê danê zî raşt nîyo. Qendîlo ke semedê gerîlayan û Têgêrayîşê Azadîye bîyo sembol de serranê peyênan de zaf banî ameyî viraştene û şar tede ameyo cakerdene. Dewleta tirke timûtim dewijan ser o bombayan varnena, dewijan qetil kena, bax û bexçeyanê înan vêşnena. Herinda vera nê hêrişan vejîyayîşî de sûcdarkerdişê PKKyî pawitişê hêrişkarî yo.

Vera hêrişê leşkeranê tirkan nêvejîyeno

PDK gerîlayê ke 40 serrî yo çar leteyanê Kurdîstanî de têkoşînê azadîye danê sey îşxalkerî îlan keno la cayê tewr stratejîkî yê Başûrê Kurdîstanî dewleta tirke îşxal kerdî. Dewleta tirke ya ke referandûmê 2017 de eşkera dişmenîya xo ya vera kurdan reyna ramojna bi desan baregehê ci herême de estê û tim şarê herême rê hêriş yeno kerdene. PDKyo ke înan rê qet çîyêk nêvano estbîyayîşê nê hêzê dişmanê kurdan sey meşro vîneno û tesdîq keno.

PKKyî bi hêzêkê leşkerî yê serdestan hemkarîye nêkerdo la PDKyî zaf rey pîya bi dewleta tirke hêrişê waranê gerîlayan kerdo. 20 serran ra zafêr o ke mabênê PKK û PDKyî de pêkewtiş nêvejîyayo la serranê peyênan de PDKyî semedê hêrişê waranê gerîlayan amadekarîye kerd û hêriş kerd. Reyna rixmo ke ame vatene ke mabênê hêzanê kurdan de do şer mevejîyo rîyê îstîxbaratê ke dîya dewleta tirke bi seyan gerîlayî şehîd bîyî.

PDK vera polîtîkaya qirkerdişê vera kurdan a leteyanê bînan tewir ranêmojna

Nika dewleta tirke têna vera şarê Vakûrê Kurdîstanî polîtîkaya qirkerdişî û şerî rayra nêbena. Rojawan de hêrişê îşxalî estî, Şingal de şarê êzidîyan tim binê hêrişanî de yo. Sere de rayberê êzidîyan  sey Zekî Şingalî û Zerdeşt Şingalî xeylêk şerwanê êzidîyî ameyî qetilkerdene. PDK polîtîkaya qirkerdişî yê vera kurdan ê leteyanê Kurdîstanî meşru vîneno û teşvîk keno. Wezîfeyo welatperwer têna pawtişê îqtîdarê PDKyî yo?! PKK û gerîlayî her tim hela tenge de Başûrê Kurdîstanî pawinê la PDK vera polîtîkaya hêrişkare ya vera kurdan ê leteyan bînan tewri ranêmojneno. Na welatperwerîye ya?

Îdîayê PDK û Tirkîya eynî yê

Dewleta tirke vana PKK wazeno ke  Hewlêr û Silêmanî bifîno dest û bi nê vatişî hêrişanê xo kena meşrû.  PDK zî wina îdîa keno. Îdîaya winayên raşt nîyo. Reyna bi xeberanê zûran ê  PKK waşto ke îdarekaranê ma bikişo zî propagandaya reşe ameye kerdene ke verê şerî bêro akerdene. Serekê Pêroyî yê PDKyî bi eşkerayîyanê xo wazeno ke polîtîkaya xo ya şerî bikero meşrû. Vejîya meydan ke propagandaya reşe zûr a. Eşekrayîya Serekê Pêroyî yê PDKyî Mesûd Barzanî zî dimayê na zûre ameye kerdene. PDKyî rîyê têkilîya ci ya bi Tirkîya demo peyên de vera gerîlayan dişmenîye û hêrişê xo zêdînayî û bi şerî wazeno ke problemanê xo yê Başûrê Kurdîstanî binimno.

Ma nêwazenê şerî bidê destpêkerdene

Ma nê wazenê vera PDK ya zî hêzêkê kurdî şerî bidê destpêkerdene. Wina yo nîyet, tewir û qerarê ma çîn o do çînêbo. PDK Zînê Werte de xo cayê gerîlayan de ca kerd û bi paşgêraya ci gerîlayî bi teyarayanê şerî yê tirkî ameyî pirodayene. Rixmê naye ma dejê xo eşt zereyê xo seba ke şer mevejîyo têgêrayî. Reyna Xinêre û Behdînan de vera tewirê pêkewtiî yê  PDKyî, tewirê ma wina bi.  La nika PDKyî warê gerîlayan girewtî binê ablûqa û wazeno teslîm bîgero. Xora dewleta tirke zî bi hêrişanê hewayî paştî dana nê gamanê PDKyî. PDKyî wina qerarê xo yê şerî pratîk de ano ca. No tewirê PDKyî heme kuran eleqedar keno. No tengijîn têna mabênê PKK û PDKyî de nîyo. Coka ganî heme kurdî vera tewirê PDKyî yê vera PKKyî vengê xo berz bikerê ke na xeletîye ra bêro agêrayene.''