Komîteya Tekîlîyanê Teberî yê KCKyî bi eşkerayîyêke veng da hukmatê Îraqî semedê Tirkîya hîşyar kerd.

Eşkerayîye de nê ameyî vatene: Bi nameyê Tirkîya û Iraqî  Anqara de Kombîyayîşê 'Mekanîzmaya Asayîşê Berzî' yê çarin ame kerdene. Seba ke wezîrê pawitişî yê Iraqî û wezîrê karanê zereyî yê PDKyî tewrê kombîyayîşî bîyî zelalo ke kombîyayîş bi kam yew rojdemî û waştişî ame kerdene. Badê kombîyayîşî Wezîrê Karanê Teberî yê Iraqî Fuat Huseyîno ke PDKyij o, qiseykerdişê xo de name ci medo zî vat ê PKKyî sey tehlukeyî vînenî.

Xora PKK çirey vera qanûnanê Iraqî nêvejîyayo û tim pawitiş û menfeatê dewlete û şarê Îraqî muhîm dîyo. Şar û dewleta Iraqî zî nê zanê. Gama PKKyî bi bedalanê girdan vera çeteyanê DAÎŞî şer kerd. No tewr nêzdî ra şar û dewleta Iraqî dî. Coka şarê Iraqî PKKyî sey dostî vînenî û dewleta Iraqî zî semedê têkoşînê ci PKK selam kerdbi.  Raşîtîye na ya. Nika sebi ke PKK nişka bi têgêrayîşêko asayîşê Iraqî tehdît keno.

Eşkera yo ke hukmatê Iraqî mîyanê xeletîya pîle de yo. Dewleta tirke ya îşxalkere bi xo herra Îraqî û îşxal û îhlak kerda. Cografyaya Başûrê Kurdîstanî û Iraqî vêşnena, talan kena û xozaya ci qir kena. Şarî bi zorî erdî ci ra vejena, şarê herême ra nasname persena mudaxaleyê her çîyê ci kena. Dewleta AKP û Erdoganî Musul de DAÎŞî kena weye û verdena Sûrîye û Rojawanî. Dewleta tirke bê qebulkerdişê Iraqî hêzê xo yo leşkerî şawit Beşika ûca ca da xo hema zî hêzê xo tîya zêdînena ke tede mende bo.

Bandorîya Iraqî hetê dewleta tirke ra ameye binpaykerdene. Hukmatê Iraqî herinda vera îşxalê dewleta tirke vejîyayîşî de hema Bexdad de 'Odayê opersyonê hemparî yê vera terorî' nano ro. Qerarê ke kombîyayîşê peyênî yê Anqara de ameyî girewtene yenê manaya qebulkerdiş û hemkarîya îşxalê dewleta tirke. Eşkera yo ke hukmatê Iraqî pîya bi dewleta tirke PKK û Gerîlayê Azadîye yê Kurdîstanî kerdî hedefê xo.

Xora eke vernî ra Iraqî destûrê hêrişê dewleta tirke yê vera Başûrê Kurdîtanî û ronayîşê bi desan baregehan medayêne dewleta tirke ya îşxalkere rixmê huqûqê mîyanneteweyî hende cesaret nêkerdêne hêriş bikero. Polîtîkaya esasî ya dewleta tirke aya ke Rojhelatê Mîyanênî de kaosî biafirno û  menfeatê xo bipawo û aver bêro. Semedê nê heme metodanê bêehleqan şuxulnena. Ma veng danê hukmatê Iraqî ke wa mebo hemkarê polîtîkayanê leyminan ê dewleta tirke, wa giranîye bido tekîlîyanê dotane ke menfeatê şaranê Iraqî esas genê.''