Hemserekîya Konseya Rayberdişî ya KCKyî derheqê hêrişê vera Rojawan, Şingal û Mexmûrî de eşkerayîye daye. KCKyî kesê ke hêrişî de şehîd bîyî yad kerdî, nêweşan rê şîfa waşte.

KCKyî vat: ''Nê hêrişanê dewleta tirke reyna dişmenîya înan a vera kurdan fîna çîman ver. Dewleta tirke vînenê ke eke Rojawan de îdareyo xoser bibo serdestîya înan a Vakurê Kurdîstanî nêeşkena dewam biekro. Coka ça de destkewteyê kurdê/a azadî/e esto hêrişê ci kena. Sebebêkê hêrişî yo bînî zî oyo ke îqtîdarê AKP-MHPyî wazeno xo payra verdo.  Rîyê dişmenîya vera kurdan û tersê vînîkerdişê îqtîdarî ra nê hêrişî bi fermanê Erdoganî yenê kerdene. Xora Erdogano faşîst tim dişmenîya xo ya vera kurdan ano ziwan. Hetê bînî ra Komîteya Merkezê PKKyî nê rojan de kombîyayîşê xo kerd. Hêrişî badê nê kombîyayîşî ame kerdene. Îqtîdaro fasîto ke tim vano ey PKK qedînayo badê nê kombîyayîşî bîyo gej.''

KCKyî bale ante xoverdayîşê kurdan ser û vat: ''Rixmê heme hêrişan şarê ma her ca de payan ser o. Hêrişê vera gerîlayan zî raştê xoverdayîşê fedayîkî ameyî û şikiyayî. Pîya bi nê xoverdayîşan kombîyayîşê PKKyî zî ame kerdene. Coka îqtîdarê faşîstî hîşê xo vînî kerd. Goreyê xo Mexmûr, Şingal û Rojawano ke bêpawitiş vînenê hêrişê înan kerd. Warê sîvîlan ameyî pirodayene. Wazenê ke şarî bitersnê û ci rê çok bidê dayene. PDKyî zî tam sey waştişê dewleta tirke têgêreno, vano sîvîl nê hêzê leşkerî ameyî pirodayene. Seba ke PDK tim propaganda ci keno dewleta tirke her roje hêrişê waranê sîvîlan kena.''

KCKyî vîst vîrî  ke hêrişê badê vînîkerdişê DAîŞî ame kerdene û ,vat: ''Têkoşînê vera DAÎŞî de Rojawan de 12 hezar, Şingal bi seyan û Mexmûr de bi desan şehîdî ameyî dayene. Bêşik têkoşînê Rojawan, Şingal û Mexmûrî yê çeteyan de gerîlayanê HPG û YJA Starî zî ca girewt û destûrê îşxalî nêda. Bi nê têkoşînî verê DAÎŞî ame girwtene ke Iraq, Sûrîye û Rojhilatê Mîyanênî dest bifîno û belayê sereyê dinya bo.Rojawan, Şiganl û Mexmûr de hêzê xopawitişî şar bi xo yo. Hêrişê vera nê hêzan hêrişê vera şarî yo. Pirodayîê QSDyî pirodayîşê şarî yo. Coka hêzê Şingal, Mexmûr û Rojawanî meşrû yê û vera hêrişanê ke înana rê benê ganî bêveng mero vindetene.''

KCKyî vat: ''Sere de Amerîka hêzanê koalîsyonî destûr danê ke teyarayê şerî yê dewleta tirke hêrişê Rojawan, Şingal û Mexmûrî bikerê. Hêrişanê vera nê cayan de heta nika xeylêk qirkerdişî bîyî. Seba ke Amerîka, Rûsya û hêzê koalîsyonî vera nê qirkerdişan bêveng ke ê hemkarê nê hêrişan û cînayetan ê. No tewirê înan bêehleqîya sîyasîye ya. Rojawan, Şingal û Mexmûro ke vera DAîŞî têkoşîn kenê hetê dewleta tirke ra yenê pirodayene û hêzê ke vanê ê  vera DAÎŞî yê bêveng ê. Ganî înan rê bêro persayene şima kişta înanê ke vera DAÎŞî têkoşîn kenê de yê yan ê ke mutefîkê ci yê.''

KCKyî semedê vervejîyayîşê hêrişan veng da û vat: ''Vera nê hêrişan ganî têna kurdî û dostê înan nê heme şarê dinya tewirê xo ramojnê û wirzê payan ser. Eke wina nêbo hêzê ke paştî danê Tirkîya do xo binêmnê û hêrişî bêrê domnayene. Reyna ganî vera PDKyî zî tewir bêro girewtene ke hêrişanê dewleta tirke meşrû keno.  Dewleta tirke se kena wa bikero nêeşkena şarê kurdî rê çok bido dayene û waştişê Kurdîstanê Azadî çîn bikero. Şarê ma do rîyê nê hêrişan ra hersbîyaye têkoşînê xo pîlêr bikero. Ma sey Têgêrayîşê Azadîye yê Kurdîstanî tim kişta Rojawan, Şingal û Mexmûr de yê û înan rê serkewtiş wazenê.''