Hemserekîya Konseya Rayberdişî ya KCKyî bi wesîleya Qirkerdişê Halebçe eşkerayîya nuştekîye daye û  vat: ''Ma sey Têgêrayîşê Azadîye yê Kurdîstanî Qirkerdişê Halebçe yo ke 16ê Adara 1988î de hetê rejîmê Iraq-Baasî ra ame kerdene, şermezar kenê û êyê ke qirkerdiş de ameyî qetilkerdene yad kenê. Şarê kurdî do Qirkerdişê Helebçe xo vîr a nêkeno û hesabê ci biperso.''

KCKyî vat: ''Qirkerdişê Halebçe qirkerdişanê tewr pîlan ê tarîxî ra yew o. Bado ke Kurdîstan ame letekerdene hêzanê serdestan vera şarê kurdî dest pê hêrişî kerd. Seba ke estbîyayîşê kurdan werta ra wedarê vera kurdan qirkerdişan kenê. Qirkerdişê Halebçe zî aye ra ame kerdene. Rejîmê Iraq-Baasî pê gazê kîmyewîyî bi hezaran kurdî kiştî. Qet yew kurd do nê qirkerdişî xo vîr a nêkero. Qirkerdişê Halebçe verê çimanê pêro dinya de ame kerdene la qet çewî vera nê vengê xo nêvet.  Eke dinya vera naye bivejîyayêne qirkerdişê winayên nêameyêne kerdene. Saddamî zanayêne ke qet çew do ey ra çîyêk mevajo, coka qirkerdiş kerd.  Xora welatanê kapîtalîstan çeka kîmyewîye daye Saddamî. Hêzanê mondernîteya kapîtalîste çeke daye Saddamî û goreyê mefaatê xo şuxulna. Çoka hêzê kapîtalîstê hemkarê sûcê qirkerdişî yê. Têna Qirkerdişê Helebçe nê hemkar û wayîrê  heme qirkerdiş û sûcanê vera kurdan ê.

Rîyê hêzanê modernîteya kapîtalîste ra dewletanê îşxalker û kolonyalîstan zî paştî girewt û hêriş û operasyonê vera kurdan dayî destpêkerdene.  Qirkerdiş û hêriş û operasyono ke vera kurdan nêame kerdene nêmend. Qet dewletêka dinya zî vera naye nêvejîyaye. Hêzanê modernîteya kapîtalîste her qeyde çekî daye dewleta tirke. Ê zaf hole zanê ke nê çekî vera kurdan yenê şuxulnayene. Mîyanê nê çekan de çekê kîmyewîyî zî estê. Îqtîdaro faşîst ê AKP-MHPyî vera şar û têgêrayîşê ma çekanê kîmyewîyan şuxulneno.  Dewleta tirke sere de Werxelê, Zendura, Mam Reşo û Girê Sor de  vera gerîlayan çekê kîmyewîyî şuxulnaye. Senî ke vizêr vera Qirkerdişê Halebçe çewî vengê xo nêvet, ewro zî bêvengîye esta. Şuxulnayîşê çeka kîmyewîye qedexe yo. Caverd şuxulnayîşê ci esbîyayîşê ci zî qedexe yo la gama ke qala kurdan yena kerdene qedexe xeymê çewî de nîyo. Kam ke wazeno wayîrê Halebçe vejîyo ganî vera şuxulnayîşê çekanê kîmyewîyan ê dewleta tirke vejîyo. Şarê Kurdî do hesabê Halebçe û qirkerdişanê bînan biperso. Hesabpersayîşo tarîxî hema nêqedîya. Têgêrayîşê Azadîye yê Kurdîstanî do têkoşînê xo biresno serkewtiş û qirkerdoxan ra hesabê tewr pîlî bipersê.''

KCKyî qetilkerdişê hewt ciwananê sosyaslîst û şorişgêran ê 16ê adara 1978î yê Beyazitê Îstanbulî zî  şermezar kerd û vat  pê yewîya şaran û têkoşînê înan ê hemparî do hesabê qirkerdişan bêro persayene.