Hemserekîya Konseya Rayberdişî ya KCKyî bi eşkerayîyêke Şêx Seîd û embazê ci yad kerdî ke 29ê hezîrana 1925î de ameybî dardekerdene. Eşkerayîye wina ya:

''Dewleta tirke ya kolonyalîste  bi dardekerdişê Şêx Seîd û embazanê ci qirkerdişêko pîl kerd. Şexsê Şêx Seîdî û embazanê ci de ma şehîdanê şoriş û demokrasî bi rêzî û minetî yad kenê. Ma reyna soz danê ke ma do perwerê înan bibê û têkoşînê înan bi serkewtişî tacîdar bikerê.

Şêx Seîd û embazanê ci vera înkarkerdişê kurdan, neheqî û xayînîye seba azadîya kurdan têkoşîn kerd. Ê heta peynî zî erjanê têkoşînî rê girêdaye mendî. Înan vera gefê dardekerdişî yê dişmenî tewir girewt û mojna ke ê perwerê dewaya Kurdîstanî yê. Têkoşînê Şêx Seîd û embazanê ci seba şarê Kurdîstanî zaf manadar û ercîyaye yo. Şarê kurdî do ked û fedakarîya înan qetî xo vîr a nêkero.

Bi Peymana Lozanî se serrî verî dewletêka newîye Tirkîya ronîyaye, Kurdîstan ame parçekerdene û vera şarê kurdî projeyê înkar û îmha dîya destpêkerdene. Dewleta ke tirkbîyayîşî ser o awan bîya, qirkerdişê kurdan xo rê kerd armanco verên. Bi nê armancî Kurdîstan de polîtîkayê asîmîlasyon û qirkerdişî vistî dewre, nasname, ziwan û kulturê kurdan qedexe kerdî û nasnameyê tirkbîyayîşî ferz kerd. Şarê kurdî no qebul nêkerd û xo ver da. Sey Şêx Seîdî û embazanê ci risîpîyê kurdan vera parçekerdişê Kurdîstanî têgêrayî. Dewleta tirke no xo rê kerd bahane û qirkerdişêk da destpêkerdene. Dewleta tirke hêrişê Şêx Seîd û embazanê ci kerd, ê darde kerdî. Bi nê hawayî Kurdîstan de prosesê qirkerdişan dest pêkerd. Dardekerdişê Şêx Sîdî û embazanê ci mojna ke karakterê dewlete senîn o. Rayber Apoyî dîyar kerdbi ke bi hêrişanê 1925 û dardekerdişê Şêx Seîdî qirkerdişê kurdan dîyayo destpêkerdene.

Dewleta tirke hema zî wayîra heman karakterê qirkerî ya. Nika nê polîtîkayî hetê AKP-MHPyî ra yenê caardene. Êyê ke planê dewleta tirke bin vistî Rayber Apo û PKKyî yê, têkoşînê azadîye yo. Bi nê têkoşînî verê qirkerdişê dewleta tirke ame girewtene û estbîyayîşê kurdan reyna ame mojnayene. Dewleta tirke fam kerd ke heta ke heta ke Têgêrayîşê Azadîye çin nêbo kurdî nênê qirkerdene. Coka dewleta tirke pêro îmkanê xo seba tasfîyekerdişê têgêrayîşê azadîye seferber kerdî. AKP-MHP seba ney ame awankerdene. 

Nika zî Îqtîdarê AKP-MHPyî sîyasetê qirkerdişî bi destekê kurdanê xayînan ano ca. Nê kesê xayînî seba ke zengîn bibê hetê AKP-MHPyî de cagênê. Şarê kurdî na xeta xayînan pûç kerda. Ney ra nika kesê xayînî xo sey neteweperwer mojnenê. Nê prosesê hêrişan, tecrîd, teda û îşkenceyî de nê kesî mîyanê zengînîye û rehetîyêka pîle de yê û ne bedelî danê ne zî çîyê qijî xo destî ra danê. Gelo nê senî qala kurdayetîye û neteweperwerîye kenê? Kurdayetî û welatperwerîya înan sexte yê. Ê kenê ke xayînîya xo binimnê. Kurdayetî û neteweperwerî ganî vera hêrişan vejîyê, hetê şarê xo de cabigêrê û wayîrê erjanê azadîye vejîyê. Hînî Kurdîstan de zemînêko winayên nêmendo ke nê xayînî xo binimnê. Şarê Kurdîstanî yo welatperwer do nê xayînan ra hesab biperso.

Ma sey Têgêrayîşê Azadîye serrgêra dardekerdişê înan de Şêx Seîdî û embazanê ci yad kenê. Seu ewladanê Şêx Seîd û embazanê ci, Seyîd Riza û Besêyan, Alîşêr û Zerîfeyan ma do têkoşînê înan ser bivisnê. Şarê Kurdîstanî do vera her planê tasfîyekerdişî û hêrişan ê îqtîdarê AKP-MHPyî xo ver bido, têkoşînî hîna pîl bikero, nêverdo ke polîtîlayê qirkerdişî raşt binê, kolonyalîzm û xayînîye do bin bikewê.''