Hemserekîya Konseya Rayberdişî ya KCKyî bi wesîleya serrgêra qirkerdişê Enfalî ke 37 serrî verî 14ê nîsane de Başûrê Kurdîstanî de hetê rejîmê Sadamî ra ame kerdene eşkerayîye daye û nê vatî:

''Qirkerdişê Enfalî ke hetê rejîmê Baasî ra Başûrê Kurdîstan de ame kerdene doman û cinî zî tede 182 hezar kurdî bi hewayêkê wehşîyî ameyî qetilkerdene. Enfal têna sûcê qirkerdişêkî nîyo eynî wextî de qirkerdişê cinîyan û qirkerdişê eko yo. Ma nê qirkerdişî û sîyaseto ke peyê ci de yo şermezar kenê  û kesanê ke qirkerdiş de dinyaya xo bedilnaye înan rê hûmayî rehmet wazenê, merdimanê ci û şarê kurdî rê serweşîye wazenê.

Sîyaset û zîhnîyeto ke estbîyayîş û azadîya kurdan înkar keno çiwext firsat vîneno qirkerdişê û hêrişanê sey Enfalî keno. Badê  Lozanî çar parçeyanê Kurdîstanî de vera kurdan sûcê qirkerdişî ameyî kerdene. Qirkerdişê Dêrsim û Gelîyê Zîlan, Helebçe, Enfal, Şingal,Sînemaya Amudê û tewr peynî de Rojawan û qirkerdişê dewa Berxbotanî yê Kobanê. Şarê kurdî vera zîhnîyet û sîyasetê qirkerî ke bingeyê ci de Lozan est o, têkoşîn û xoverdayîşo xurt rayra berd, bedelê giranî dayî û estbîyayîşê xo pawit û waştişê azadîye de israr kerd.

Seserra newî de zî gama ke herême newe ra yena dîzaynkerdene, plan û komployê hêzanê herême yê vera sîyaset û estbîyayîşê kurdan est ê. Wina wextê tarîxî de Rayber Apo seba ke şarê kurdî qirkerişanê neweyan ra bipawo vengdayîşê Haştîye û Komelê Demokratîkî kerd. Gerek ma sey şarê kurdî û heme şaranê herême wayîrê nê vengdayîşî bivejê û semedê azadîya Rayber Apoyî têkoşîn bikerê. Eke ma vengdayîşê Rayber Apoyî sey paradîgmaya têkoşînî bigîrê dest ma eşkenê verê Enfalanê neweyan bigîrê û azadîya şarê kurdî û şaranê herême bigîrê binê garantî. Na çarçewe de ma şehîdanê Enfalî newe ra yad kenê  û soz danê  ke ma do bi xurtkerdişê têkoşînê azadîye û komelê demokratîkî wayîrê vîrameyîşê înan bivejê.''