Konseya Serekîya Pêroyî ya KCKyî bi wesîleya serrgêra Komployê 15ê Sibate eşkerayîyêke daye û nê pare kerdî:

''Ma bi hersê pîlî Komployê Mîyanneteweyî şermezar û lanet kenê û xoverdayîşê Rayber Apoyî selam kenê. Ma şexsê Halît Oral û Vîyane Caf de şehîdanê xo yê qehremanan ê ke bi şîarê Şima nêeşkenê tîja ma tarîb bikerî bedenê xo dormeyê Rayberîye de kerd percîne adirî, înan yad kenê û sozê serkewtişî newe kenê.

Hêzanê komplokaran ê mîyanneteweyî yê ke serkêşîya Amerîka de Têkoşînê Azadîye yê Kurdîstanî yo ke sekêşîya Rayber Apo û PKKyî de yeno rayraberdene goreyê hesabanê xo sey tehlukeyî dî û  waşt nê astengî orte ra wedarê. Coka şexsê Rayber Apoyî de şarê kurdî girewt binê esaretî. Rayberîya ma bi têkoşînî cewab da komployî û planê înan pûç vetî. Hem Rayberîye, hem zî şar û têgêrayîşê kurdan pê têkoşînî komplo pûç vet. Esaretê 23 serran rîyê nê têkoşînî ra sey waştişê komplokaran nêbi.  Ewro her ca de fikrê Rayber Apoyî sey sîstemêkê neweyî yenê caardene.  Şexsê kurdan û cinîyan de heme bindestî naye ra îlham genê.

Hêzanê komplokaran waşt bi nê komployî Tirkîya û Kurdîstanî biaçarnê warê şewatî. Seserra 21. de waşt mabênê kurdan û tirkan şer vejê.  Coka no komplo têne vara kurdan nê vera tirkan zî ame kerdene. La Rayberîya ma çîyo ke destê ci ra ame kerd ke şarî yewbînan mekişê. Seba ke meseleya kurdî bi metodanê dmeokratîkan bêro çaresekerdene her îmkan şuxulna la dewleta tirke û hukmatê Erdoganî her rey pê hêrişî cewab da.  2015 de pêvînayîşî ameyî birnayene û hem zereyê sînorî hem zî teberê sînorî de hêrişê qirkerdişî dîyayî destpêkerdene. Pê nê hêrişan komplo ame aktuelkerdene. Sekewtişo ke bi komployî nêfîna dest wazenê nika bi hemleyanê qirkerdişî bifînî dest.

Dişmenîya hukmatê AKP-MHPyî ya vera kurdan têna têna zereyê sînoranê ci de nêmend. Her cayo ke kurdî tede estê de vila bîye.  Binê zûrê  têkoşînê vera terorî de her roje hêrişê Başûrê Kurdîstanî kenê, sîvîlan ser o bombayan varnenê. Rojawan de tim bi wesîyatanê hewayî domanî yenê qetilkerdene.  Şingal seba ke şarê êzidî wehşetê DAÎŞî ra xelisîyayo hêrişê qesasgirewtişî kenê. Kampa Mexmûrî de tim şarê ma dîyeno bombayan ver. Pê hêrişan kenê ke kurdan rê çok bidê dayene la kurdî bi hewayêkê qerardarî vera hêrişan têkoşîn kenê. Nê hêrişî ramojnenê ke faşîzmê AKP-MHPyî gangeş de yo.  Wextê hukmê sîyasetê qirkerdişî bîyo de û ewro ra tepîya xelisîyayîşê ci çîn o.

Şaro ke rayberê ci tepişte yo o zî tepişte yo. Coka ganî ma azadîya Rayberîya xo sey azadîya xobivînê. Heta ke Rayberîya ma tepişte bo heme munaqaşayê derheqê çareserî bêmana yê. Munaqaşayê çareserî yê ke tecrîdê Îmraliyî nêvînayîşî ra yenê ma pê bawer nîyê. Şaro ke wayîrê nasname, kultur û anorê xo vejîyeno û wazeno qederê xo bîgêro destê xo goş nê munaqaşayanê bêhelqana nêkewnê. Ewro roje roja têkoşînî ya. Semedê binfînayîşê komployî ganî têkoşîn bêro pîlkerdene. Nê 23 serran de dostê kurdan zafêr bîyî.  Ma veng danê heme dostanê xo ke wa pîya bi kurdan wayîrê Rayber Apoyî vejîyê û hêzanê komplokaran ra hesab bipersê.''