Hemserekîya Konseya Rayberdişî ya KCKyî derheqê rijîyayîşê rejîmê Baasî de eşkerayîyêke daye. Eşkerayîye wina ya:

''Rejîmê Baasî rijîya, hinî Sûrîye kewta dewrêkê neweyî. Şaranê Sûrîye seba cuya têdûşte, haştîye û demokrasîyî bedelê pîlî dayî. Ma wina temenî kenê ke hêvîya şaran do bivura cuya azade. 

Rijîyayîşê rejîmê Baasî ancî îsbat kerd ke pêro rijîmê winayênî mehkumê rijîyayîşî yê. Modelê dewleta netewe yo ke tekperestîye esas keno meseleya esase ya Rojhelatê Mîyanênî ya. Rayber Apoyî sîstemê dewleta netewe hol ercna, eşkera kerd ke no sîstem goreyê fitratê merdiman nîyo û peynî de do birijîyo û Rojhelatê Mîyanênî de verê sîstemê demokratîkî do bêro akerdene. Qewimîyayîşê Sûrîye ercnayîşê Rayber Apoyî îsbat kenê. Rejîmê Baasî rixmê ney zî raştîye nêdîye, sîstemê dewleta netewe de israr kerd, vurîyayîşo demokratîk nêkerd û axir rijîya.

Ma sey KCKyî seba ke sîstemê netewa dewlete yê Sûrîye bêro wedaritene û vurîyayîşê rejîmî bibo tim xîret kerd. Şarê kurdî zî bi têkoşînê xo seba Sûrîyeya Demokratîke xîre kerd û zemînê ney amade kerd. Ma zanenê ke Îdareyo Xoser ê Rojawanî zî seba ney xîret kena. La seba ke rejîmê Baasî ferasetê netewa dewlete de israr kerd, krîzê Sûrîye xorin bi, çareserîye taloq bîye û dejê pîlî ameyî antene.

Naye ra pey ganî seba caardişê Sûrîyeya Demokratîke xîret bêro kerdene ke tede pêro şarî xo azad hîs bikerê. No do tesîrê Rojhelatê Mîyanênî zî bikero û seba demokratîkbîyayîşê Sûrîye kede bido. Sey KCKyî seba ney têkoşîn û tewirê ma do dewam bikerê. Ferasetê dewleta netewe bingeyê pêro meseleyan o û nê meseleyî ancax bi caardişê neteweya demokratîke do çareser bibê.

Komel bi azadîya cinîyan do azad bibo. Azadîya cinîyan kok û manaya komelî îfade kenê. Seba demokratîkbîyayîşê Sûrîye azadîya cinîyan elzem a. Xeta azadîya cinîyan ra qetî tawîz do nêra dayene.

Dewleta tirke verê Sûrîyeya azade û demokratîke de astengêko tewr pîl o. Dewleta tirke coka hêrişê Sûrîye kena û rixmê rijîyayîşê rejîmê Baasî zî nê tewirê xo ra fek vera nêdana. Dewleta tirke sey rejîmê Baasî wayîra hişmendîya tekpereste ya. Dewleta tirke wazena ke şaranê Sûrîye qetil bikera. Coka dewleta tirke Artêşa Mîlî ya Sûrîye na ro. Ganî şarê Sûrîye nê kerdişanê dewleta tirke qebul nêkerê û vera hêrişanê dewleta tirke û Artêşa Mîlî ya Sûrîye na ro xo ver bidê. Ganî pêro şarê Sûrîye hetê xoverdayîşê şarê kurdî û Îdaeeyê Xoserî de cabigêrê. Ma venga hêzanê demokratîkan ê pêro dinya zî danê ke vera hêrişanê dewleta tirke tewir bigêrê, hetê şaranê Sûrîye û şarê kurdî de cabigêrê û paştîyêka xurtî bidê.

Sere de şarê kurdî ganî pêro şarê Sûrîye vera hêrişanê dewleta tirke û Artêşa Mîlî ya Sûrîye xoverdayîşê xo rê dewam bikerê. Wa şarê ma bingeyê Şerê Şarî yê Şorişgêrî de xo rêxistin bikerê, xopawitişê xo bîyarê ca. Xoverdayîşo winayên do ser bikewo.

Nê qewimîyayîşanê Sûrîye de têkoşînê şarê kurdî dîyarker o. Bi çinhesibnayîşê kurdan, nêşinasnayîşê kurdan ne Sûrîye ne zî Rojhelato Mîyanên mumkîn ê. Qetî Sûrîye de zî Rojhelatê Mîyanênî zî cayê şarê kurdî do est bê.

Ma bi na hîsan pêro şaranê Sûrîye fîraz kenê. Ma wina bawer kenê ke Sûrîyeyêka azada ke do pêro şarî tede azad û têdûşt bibê do bêra ronayene coka ma venga pêro kesan danê ke seba ney têbigêrê.''