Hemserekîya Konseya Rayberdişî ya KCKyî bi wesîleya 8ê Adare Roja Cinîyan ê Kedkaran a Dinya mesajêk weşana.

Mesaj wina yo:

''Seba azadîya Rayber Apoyo ke bîyo dost, embaz û hemrayo raştikên ê cinîyan, cinîyanê dinya têkoşîn û xîretêko pîl kerd. Ma nê cinîyan rê sipas kenê.

Ma sey Têgêrayîşê Azadîya Kurdîstanî 8ê Adare Roja Cinîyan fîraz kenê. Ma têkoşînê azadîya cinîyan selam kenê û reyna anê ziwan ke têgêrayîşê azadîye yê kurdan do tim hetê cinîyan de bibo.

Warê geşbîyayîşê komelî û merdimîye de cayêko zaf girîng û sereke yê keda cinîyan esto. Çunke xozaya cinîyan de komelkîkerdişî esto. Nê warî de pêro merdimîye seba pêro erjanê ke ameyê afernayene deyndarê cinîyan o. Xozaya cinîyan bena îfadeyê raştikênî yê cuya azade û raştîye. Naye ra zî cuya azade ya tewr manadar, raşt û azade do bi azadbîyayîşê cinîyan bêra caardene, eke îradeyê cinîyan bi hawayêkê tewr azadî tewrê cuye bibo no do bêro kerdene.

Seba ke cinîyî cuye azad kenê benê hedefê hişmendîya serdestîya camêrdan. Cinîyî temamîya tarîxî de bi zorbazî, teda, şîdet, dek û dolaban mehkumê kolonyalîzmî ameyî kerdene. Bi çinkerdişê xozaya cinîyan mabênê merdiman de ferqî ameyê awankerdene, rayîrê cuya kolonyalîste ameyo awankerdene. La no nêeşka têkilîya xurte ya cinîyan werte ra wedarno û warê geşbîyayîşê merdimîye de xozaya cinîyan rolêko sereke ard ca.

Nê prosesî de sîstemê modernîteya kapîtalîste mîyanê tarîxî de bîyo leweyê hêrişanê serê cinîyan. Sîstemê modernîteya kapîtalîste komelbîyayîşî werte ra wedarnayo. No nêzdîbîyayîş tewr zaf vera xozaya cinîyan o. Coka sîstemê modernîteya kapîtalîste berê xozaya cinîyan kolonyalîzmî rê akeno, xozaya cinîyan keno hacetêkî û manaya ci ya raştikêne rê dûrî visneno. Na zorbazî, şîdet û kolonyalîzmê nê sîstemî yena nimnayene û pêro çîyê ci sey azadîye yenê pêşkêşkerdene. La xêrê qerardarîya cinîyan û îdeolojîya azadîya cinîyan ra maskeya sexte ya modernîteya kapîtalîste her roje eşkera bena. Têkoşînê azadîya cinîyan xeta xo ya raştikêne vîneno û rayîrê kolonyalîzmî ra xelisîyayîşî akeno. Azadîya merdimîye bi azadîya cinîyan mumkîn a. Ma sey Têgêrayîşê Azadîye venga pêro merdimîye danê ke zêdêr paştî bide cinîyan.

Rayber Apoyî îdeolojîya azadîya cinîyan awan kerde, esasê teorîk û felsefîkî yê azadîye vetî werte û seba azadîya cinîyan hemkarîya pîle kerde. Seba rêxistinbîyayîşê cinîyan û geşkerdişê têkoşînê cinîyan nîşanê xîretê pratîkî da. Rayber Apo bi dost, embaz û hemrayo raştikên ê cinîyan û cinîyan reyde esasê azadîye de kom bi. Seba azadîya Rayber Apoyî pêro dinya de cinîyî têkoşîn kenê. Ma nê cinîyan rê sipas kenê.

Şorişê Azadîya Kurdîstanî hêz û motîvasyonê xo raştîya cinîya azade ra gêno. Rayber Apoyî Şorişê Azadîya Kurdîstanî nê esasî ser o awan kerdo. Coka Şorişê Azadîya Kurdîstanî beno şorişê cinîyan. Rêxistinbîyayîşê cinîyan û geşbîyayîşê têkoşînê rêxistinkerdişî yê cinîyan esasê cuya azade û armancê Şorişê Azadîya Kurdîstanî yo.

Xêrê têkoşînê serkêşîya cinîyan ra îqtîdaro faşîst ê AKP-MHPyî ameyo asta rijîyayîşî. Rijnayîşê îqtîdarê AKP-MHPyî reyde îqtîdarê dişmenê cinîyan zî do birijîyo, demokratîkbîyayîşê Tirkîya û Rojhelatê Mîyanênî û azadbîyayîşê Kurdîstanî do bêrê caardene. Bi na bawerîye ma reyna 8ê Adare pêro cinîyan rê fîraz kenê. Bi bawerîya ke azadîya cinîyan do azadîya merdimîye bîyara, ma têkoşînê înan rê serkewtiş wazenê.''