Hemserekîya Konseya Rayberdişî ya KCK’yî derheqê Rojakewtena Kurdistanî û Îranî de eşkerayîye daye.

Eşkerayîya KCK’yî wina ya: “Rojakewtena Kurdistanî û Îran de rîyê varayîşê zêde ra bi seyan merdiman cuya xo vîndî kerdê, keye, baxçe, hêga û karxaneyê bi hizaran keyeyan zirar dî. Rehma Homayî merdiman ê ke Rojakewtena Kurdistanî û Îran de cuya xo kerda vîndî rê bo. Wa sereyê keyeyan û merdimanê înan weş bo.

Wexto ke rastîyêka bi nê hawayî Kurdistan de vejîyaye werte, ganî şarê ma yê parçayanê bînan û teberê welatî paştdayîş bidê. Estbîyayîşê sînoran ganî ne nê paştdayîşî qels bikero ne zî ci rê bibo asteng. Bitaybetî parçe, herême û bajar ê ke nêzdî yê ganî hîna bi hawayêko berpirsîyarîye bikewê mîyanê têgêrayîşî. Şarê Kurdî yê teberê welatî zî muhîm o ke rewşêka winasîye de ca de dest bi xebatanê paştdayîşan bikero. Hiş û paştdayîşî yê şarê Kurdan xurt o, ganî no ruhê paştdayîşî seba Rojakewtena Kurdistanî her ca de bêro ramojnayene.

Ma dewleta Îranî ra hêvî kenê, felaketanê winayan de vernîya hetkarîya şarê Kurdî ya ke teberê sînoranê Îranî ra yena wa zehmetî mevejî û vernîya ci akerê. Nêzdîbîyayîşo ke -felaketanê winayan de do bêro ramojnayene, seba xurtbîyayîşê waye û biratîya mîyanê şaran muhîm a. Seba naye zî ganî hetkarîya şaranê Îranî û şaranê Kurdan a seba mexdûranê laserî bireso cayê xo. Ma sey Têgêrayîşê Azadîye yê Kurdî felaketanê winayan de timî leyê şarê xo de yê. Seba ke birînê şarê ma yê Rojakewtena Kurdistanî bêrê pîştene û şarê ma yê parçeyanê bînan paştdayîş bido ma dowezîfeyê xo bîyarê ca. Ma pê bawerê ke şarê ma do bi paştdayîş birînanê xo bipîşo û ma rayêna şarê xo yê zerar dîyayî rê vanê, derbazîye ba.”