Hemserekîya Konseya Rayberdişî ya KCK’yî bi wesîleya serrgêra şorişê Rojawanî eşkerayîyêka nuştekîye weşanaye û vat, “Bi nameyê Têgêrayîşê Azadîye yê Kurdan ma do her tim nê şorişî rê wayîr vejîyê û bi paradîgmaya Rayber Apoyî ya cimatê ekolojîk ê demokratîkî û azadîperwerîya cinîye ameyo afernayene û ma do tim hetgêrê ci bê. Ganî şarê ma yê heme perçeyan şorişî rê wayîr vejîyo û dej û bedelanê xo yê giranan ê se serran açarno coşê cuya demokratîk û azade.”

 Eşkerayîya Hemserekîya Konseya Rayberdişî ya KCK’yî de ame vatene, “Şorişê Rojawanî keweno serra xo ya 8’ine ke seba heme şaranê Rojakewtena Mîyanêne prosesê demokratîkbîyayîşî dabi destpêkerdene. Ma şarê Rojawanê Kurdistanî yo ke no şoriş kerdo pîroz kenê û şehîdanê ke pawitiş û averberdişê şorişî de rolo esasî kay kerdo bi minet û hurmet bi vîr anê û xazîyanê şorişî rê zî seba mucadeleyê înan ê nikayî û tîya ra tepîyayî serkewtiş wazenê.

 Şarê Kurdî bi şorişê 19’ê Temmuze yê 2012’î yê Rojawanî ramot ke şarêko demokratîk, şorişgêro serkêş ê Rojakewtena Mîyanêne yo. Pîya bi şarê Ereb û Suryanan şoriş açarna şorişê şaranê Sûrîye û bi nê hawayî seba ke şoriş agêro şorişê Sûrîye û Rojakewtena Mîyanêne şaran rê umîd aferna. Rojakewtena Mîyanêne de ke şar û bawerîyê cîyayî kerdê dişmenê yewbînan, no şoriş bîyo şorişêkê zihnîyetî ke biratîya şaran û bawerîyan a Rojakewtena Mîyanêne bica arda. Bi nê hawayî eşkera bi ke Rayber Apo tena rayberê şarê Kurdî nêyo, heman wextî de raybero şorişgêr ê Rojakewtena Mîyanêne yo.

 Şarê Vakur û Rojakewtena Sûrîye bi binfînayîşê DAÎŞ’î tena hêzêkê despotî yê Rojakewtena Mîyanêne bin nêfîna, heman wextî de organîzasyonêko taşeron zî bin fîna ke dişmenîya merdimîye keno. Şarê Vakurê Sûrîye mîyanê 7 serran de rîyê hêrişanê hêzanê dişmenê azadî û demokrasîyî ra 10 hezarî ra vêşêr şehîdî dayî û 20 hezarî ra vêşêr zî şerwanê înan xazî bîyî. Sere de sosyalîstî bi seyan enternasyonalîstî çar hetanê dinya ra ameyî û nê şorişgêrê demokratan ra xeylî kesî şehîd bîyî ke na yewe zî karakterê nê şorişî ramojnena. Şorişo demokratîk ê şaranê Vakurê Sûrîye heman wextî de bîyo şorişo demokratîk ê şaranê dinya. Na rastî zî ramojnena ke şoriş bin nêkeweno.

 Bi nameyê Têgêrayîşê  Azadîya Kurdan ma do her tim şorişî rê wayîr vejîyê ke bi paradîgmaya Rayber Apoyî ya cimatê ekolojîk ê demokratîkî û azadîperwerîya cinîye ameyo afernayene û ma do tim hetgêrê ci bê. Ganî şarê ma yê heme perçeyan şorişî rê wayîr vejîyo û dej û bedelanê xo yê giranan ê se serran açarno coşê cuya demokratîk û azade.

 Şehîdê Şorişê Rojawanî û şarê Vakur û Rojakewtena Sûrîye do bibê esasê şorişê demokratîkî yê Rojakewtena Mîyanêne û mucadeleyê cuya demokratîk û azade ya Rojakewtena Mîyanêne do qetîyen bi ser bikewo.”