KCKyî bi eşkerayîyêka nuştekîye netîceyê kombîyayîşê serraneyî yê Konseya Rayberdişî eşkera kerdî. Eşkerayîye wina ya:

''Kombîyayîşê ma yo serrane yê Konseya Rayberdişî ya KCKyî bi beşdarîya qîme ya endaman, bi hawayêkê serkewteyî ame kerdene.

Kombîyayîşê ma pêro pêro şehîdî bi rêzdarî û minetdarî yad kerdî û xeta Rayber Apoyî de pratîkê pêro waran ercnayî, birê girîngî girewtî. Kombîyayîşê ma tesbîtê ney kerd ke rixmê kêmasîyanê ma zî hemleya ma ya 'Wext wextê azadîye yo' bi hawayêkê serkewteyî derbaz bîye, bîye hêrsê vera komplogeran û vera komployî serra 24. de qerarê ney da ke têkoşînê seba rijnayîşê faşîzmî, azadîya Rayberîye û qedînayîşê îşxalî bi îradeyêkê xurtî bikerê û ser bivisnê.

Rojhelatê Mîyanênî de ke medenîyeto dewletperest uca de bi, rijîyayîşê nê medenîyetî sey nîşaneya asta rijîyayîşî ya sîstemê dewletperestîye ya bi serwerîya camêrdan ame ercnayene. Hêzê kapîtalîstî yê modernî bi çend vurnayîşanê qijan wazenê Rojhelatê Mîyanênî newe ra dîzayn bikerê û verê rijîyayîşê sîstemê kolonyalîzmî yê dewletperestî bigêrê. Rojhelatê Mîyanênî de krîzê kulturelî, komelkî û sîyasî bîyî. Semedo ke Şerê Dinya yo 3. nêqedîyayo ke merkezê ci Rojhelato Mîyanên o, nîşaneya ney a ke hêzê kapîtalîstî yê modernîstî û dewletê herême wayîrê projeyanê çareserîye nîyê. Sîstemê kolonyalîzmî yê îqtîdarperestî yê bi serwerîya camêrdan têna Rojhelatê Mîyanênî de, pêro dinya de meseleyan giran keno û merdiman mîyanê krîzanê sîyasî û komelkîyan de verdeno. Sere de cinîyî û kedkarî, pêro şar her firsend de eşkera kenê ke ê nêwazenê binê nê sîstemî de biciwîyê. Konseya ma ya Rayberdişî na raştîye ercnaye û reyna îfade kerd ke Konfederalîzmo Demokratîk sere de seba Rojhelatê Mîyanênî seba temamîya merdimîye tek rayîrê xelisîyayîşî yo.

Kombîyayîşê ma yê Konseya Rayberdişî esasê nê ercnayîşî ser de Hemleya 'Wextê Azadîye'  çarçewa 3 babetanê bingeyînan de bi hîratî ercnayî. Rewşa Rayber Apoyî, têkoşînê vera AKP-MHPyî û babetê bînî het hetî ra ameyî ercnayene, plansazîye ameye kerdene. Bêguman plansazîyê ma esasê xopawitişê vera faşîzmî, bi averbîyayîşê Şerê Şarî yê Şorişgêrî seba armancê azadkerdişê Kurdîstanî û demokratîkkerdişê Tirkîya û Rojhelatê Mîyanênî ameyî kerdene. Wezîfeyê rêxistinîye yo ke têkoşînê 2022î yo ke serra 50. ya têgêrayîşê Apogîrî yo, bi dersan kêmasîyan çareser bikerê û têkoşînê serkewteyî bikerê.

Serra 2021î  sere de vera dewleta tirke ya kolonyalîste, vera pêro hêzanê dişmenê kurdan û demokrasî bi têkoşînêkê pîlî derbaz bîye. Îqtîdaro faşîst ê AKP-MHPyî yo ke wazeno têkoşînê azadîye yê şarê kurdî tasfîye bikero û şarê kurdî qir bikero, ard verê rijîyayîşî.

Faşîzmê AKP-MHPyî serra 2021î de seba rijnayîşî, tecrîdê vera Rayber Apoyî, tedaya vera şarî giran kerda, zîndanan de teda zêdînaya ke her roje merdimî mirenê, bi nê hawayî tepişteyan rê teslîmîye ferz keno, sere de Herêmanê Pawitişî yê Medya de, hêrişê leşkerî zêdînayî û xîret kerd ke payan ser o bimano. Labelê faşîzmê AKP-MHPyî de serra 2021î de raştê têkoşînêkê xurtî ame. Dormeyê tewirê Rayber apoyî de her warê Kurdîstanî û dinya de têkoşînê seba azadkerdişê Rayber Apoyî pîl bi. Sere de cinîyî, ciwanî û kedkarî, şarê ma çarçewa tewirê Rayber Apoyî yê Îmraliyî de, vera hêrişanê faşîzmî tewirê xoverdayoxî û têkoşînî de israr kerd. Şerwanê demokrasî û azadîye yê zîndanan vera tedayanê teslîmîye bi ruhê 14ê Temmuza 1982î de vindertî û bi hawayêkê eşkerayî mojna ke faşîzmê AKP-MHPyî sey faşîzmê 12ê Êlule çin bikerê. Faşîzmê AKP-MHPyî waşt ke derbêka stratejîke bido gerîlayanê azadîye ro û bi nê hawayî weçînayîşan bikero û îqtîdarê xo rê dewam bikero. Labelê ewladê fedayî yê şarê kurdî hem Garê hem zî Metîna, Avaşîn û Zap de derbê tarîxîyî dayî artêşa tirke ya faşîste ro, têkoşîn her ca de aver berd û serra 2021î de zemînê rijnayîşê îqtîdarê AKP-MHPyî amade kerd.

Serra 2021î heman wextî de bîye a serre ke ajanîye paştdayîşê tewr zaf na serre de daye dewleta tirke ya kolonyalîste. Ne têna ablûqa û hêrişanê vera Herêmanê Pawitişî yê Medya de nê, ablûqa û hêrişanê vera Rojawan, Şingal û Mexmûrî de zî hetê dişmenan de ca girewt. Xelîfan de înan dafike naye ro û 8 gerîlayî şehîd kerdî. PDKyî bi meşrû û normalîzkerdişê hêrişanê vera Herêmanê Pawitişî yê Medya, Rojawan, Şingal û Mexmûrî paştdayîşo tewr pîl da îqtîdarê faşîstî yê AKP-MHPyî. Vera têgêrayîşê ma PDKyî dest pê hêrişan kerd, bi têkilîya bi dewleta tirke mîyanê şarê kurdî û dostan de bi sebebê nêrazîbîyayîşêkê pîlî. Kombîyayîşê ma, seba çinkerdişê hêrişanê AKP-MHPyî, teşhîr û tecrîdkerdişê hemkarîye-ajanîye sey hetêkê girîngî yê têkoşînî ercnayî.

Îqtîdarê faşîstî yê AKP-MHPyî rixmê paştdayîşê dewletanê teberî, zere de paştdayîşê komelî vînî kerd, serra 2022î de hêrişê xo zêdînayî û dewam keno. Seba ke weçînayîşan de ser bikewo sere de Herêmanê Pawitişî yê Medya de hêrişê her warê cuya demokratîke û azade kerd. Coka kombîyayîşê ma girîngîya xoverdayîşê bi hişmendîya komelê demokratîkî û azadîgîrî ya Rayber Apoyî, gerîlayan, şarê kurdî, dostan û waranê cuya demokratîke û azade yê sey Rojawan, Şingal û Mexmûrî armanc kerd.

Azadîya Abdullah Ocalanî

Kombîyayîşê ma tewirê Rayber Apoyî û şero psîkolojîk û taybet ê Rayber Apoyî, mesuldarîyê ma yê vera Rayber Apoyî, caardişê xeta serkewtişî ya Rayberê ma sey rojdemêkê cîyayî nîqaş kerdî. Wezîfeyê ke serra 24. ya komployî de serê esasê azadîya Rayber Apoyî de, azadîya Kurdîstanî û demokratîkkerdişê Rojhelatê Mîyanênî îfade kerde û nê warî de birê girîngî girewtî.

23 serranê esaretî yê Rayber apoyî de verê têkoşînê ma nêame girewtene, averşîyayîşê girîngî ameyî afernayene û fikrê Rayber Apoyî Kurdîstan, Rojhelatê Mîyanênî û pêro dinya de vila bîyî. Seba têgêrayîşê ma, şarê ma, dostanê ma û hêzanê ma yê dinya cayê rexnedayîşî yo ke ma hema zî azadîya Rayberîye nêvista destî. Esasê paradîgmaya komelê demokratîk, ekolojîk û azadîgîrîya cinîyan a Rayber Apoyî de, xeta sosyalîzmê demokratîkî yê Konfederalîzmê Demokratîkî heta astêka hetê şaran, cinîyan, kedkaran û dinya ra şinasîyaye. Kombîyayîşê ma de tesbîtê ney ame kerdene ke çarçewa nê fikran de pêro dinya de têkoşînê îdeolojîk-sîyasî de averşîyayîşêk bibo zî no averşîyayîş asta hêzê paradîgma de ya ke Rayber Apoyî mojnayo. Coka ma îfade kerd ke raştîya awanbîyayîş û hişmendîya sosyalîst-demokratîke ya Rayber Apoyî ganî bi hîra û tesîrînî bêra nîqaşkerdene û birê girîngî ameyî girewtene.

2022 serranê tewr krîtîkan ra ya

Eşkera yo ke serra 2022î do tarîxê ma yê têkoşînî de biba serranê tewr krîtîkan ra yewe. Nê wextî de ke Şerê Dinya yo 3. dewam keno û hêrişê dewleta tirke ya qirkere zêdîyenê, caardişê têkoşînî bi stratejîya Şerê Şarî yê Şorişgêrî, seba pawitişê destkewteyan û çinkerdişê hêrişan şert o. Coka ma bire daye ke têkoşînêko xurt do bêro kerdene. Ma îfade kerd ke şaş o ke pênaseyê hêzê çekdarî  sey hêzê leşkerî û serwerîya teknîkî bêro dîyene; hêzo esas projeyê cuya demokratîk û azade ya polîtîka îdeolojîya raşt a, têkoşînê azadîye yê şarê kurdî zî wayîrê ney o û serkewtiş do qetî ê têgêrayîşê ma yê azadîye bo.

Kombîyayîşê ma bi girîngî bale ante na babete ser ke kapîtalîzm û modernîteya ci seba merdimîye û şarê kurdî tehlukeyêko pîl o ke ganî vera ci têkoşîn bêro kerdene.

Modernîteya kapîtalîste komelbîyayîş vila kerdo û bi madîperestîye meseleyê komelkî û kulturelî giran kerdî. Kapîtalîzm û modernîteya ci nika ra komel û merdimî vurnayî sey robotan. Erjê kulturelî û komelkî yê merdimîye ke bi hezaran serran ameyî afernayene, bêmana kerd û bi nê hawayî têna kolonyalîzm serwer kerd, cuyêka madîpereste afernaye. Seke Rayber Apo vano cinîya ke bîya meta, cuye de zî vurîyaye sernameyê kapîtalîzmî. Na rewşe bingeyê paradîgmaya komelê demokratîkî, ekolojîk û azadîgîrîya cinîyan de, têkoşînê cuye yê Modernîteya Demokratîke seba komel û merdiman kerd têkoşînê estbîyayîşî.

Modernîteya kapîtalîste seba pêro merdimîye tewr zaf zî seba kurdan bîye hêrişê serê estbîyayîş û têkoşînî. Kurdîstan de cografyaya komelê neolotîkî, komelbîyayîş çimeyo tewr pîl ê hêzê kurdan o. Kurdî hêrikîyayîşê tarîxî de tim bi nê hêzê komelbîyayîşî vera her tewirê hêrişî weriştî we. Nêm se serra peyêne de kurdî bi nê komelbîyayîşî vera kolonyalîzmî xo ver danê. Kapîtalîzm bi vilakerdişê komelbîyayîşî çimeyo bingeyî yê kurdan çin keno. Modernîteya kapîtalîzmî bi nê hawayî vera şarê kurdî vurîya hacetê bingeyî yê şerê taybetî. Coka têkoşînê vera kapîtalîzmî û modernîte sey parçeyêkê girîngî yê têkoşînê ma yê demokratîkî verê şarê ma yê welatperwerî de yo.

Serra rijnayîşê faşîzmî, azadkerdişê Rayber Apoyî û qedînayîşê îşxalî

Kombîyayîşê ma qerardarîya xo bi hawayêkê xurtî mojnaye ke serra 2022î ya ke serra 50. ya têgêrayîşê Apogîran a, serê esasê Şerê Şarî yê Şorişgêrî de bikero serra rijnayîşê faşîzmî, azadkerdişê Rayber Apoyî û qedînayîşê îşxalî. Kombîyayîşê ma îfade kerd ke no bi komelê rêxistinbîyayeyî beno. Konfederalîzmo Demokratîk o ke Rayber Apoyî 2005 de îlan kerd, bi hêzkerdiş û xoîdarekerdişê şarî xo rê kerdêne esas ke xo biresno komelê rêxistinbîyayeyî. Na babete de averşîyayîşê girîngî ameybî kerdene zî babeta xoîdarekerdişî û xohêzkerdişê rêxistinbîyeyî yê şarî yê bi komun û meclîsan kêmasîyê cidîyî eşkera bîyî. Nê esasî ser de rexneyî ameyî kerdene ke hetê perwerdekerdiş, rêxistinkerdiş û xoîdarekerdişê komelî ra rayberîya raştikêne nêameye kerdene. Ma eşkera kerd ke no zî hişmendîya dewletpereste û îqtîdarpereste ra yo ke bawer kena ke bi dewlete do xo biresna soyalîzmî. Hetê bînî ra bi taybetî ame îfadekerdene ke şar zî ganî seba afernayîşê îmkananê cuye û îdareyî wa pabeyê dewrêkî nêmano. Têkoşîno xurt bi komelê demokratîkî yê rêxistinîye eşkeno bêro kerdene. Kombîyayîşê ma îfade kerd ke servistişê têkoşînê demokrasî û azadîye bi şarbîyayîşêkî pabeste yo û dîyar kerd ke wezîfeyo tewr bingeyî no yo ke esasê komun û meclîsan de sîstemo konfederal o demokratîk bêro awankerdene û no wezîfe dîyayo her kesî ke karanê KCKyî keno.

Kombîyayîşê mayê Konseya Rayberdişî reyna bi hîra îfade kerd ke Kurdîstano Azad û Rojhelato Mîyanên o Demokratîk bi çinkerdişê hişmendîya dewlete-netewe, esasê hişmendîya Neteweya Demokratîke de bi demokratîkbîyayîşê pêro welatan beno. Seba ney zî girîngîya têkilîya bi hêzanê demokrasî yê Tirkîya, Iraq, Sûrîye û Îranî girîngîya çareserîya meseleya kurdan îşaret kerda. Coka ê paştî danê xîretanê hêzanê Modernîteya Demokratîke ke Îdareyê Sûrîye û hêzanê demokratîkan reyde wazenê meseleya kurdan çareser bikera, Sûrîye demokratîke bikera û soz dana ke na babete de pêro mesuldarîyanê xo bîyara ca. Bawerîya xo reyna mojnena ke Iraq û Başûrê Kurdîstanî de zî mesele têna bingeyê demokratîkbîyayîşî de eşkîyena çareser biba. Heman nêzdîbîyayîş seba Îranî zî ame mojnayene.

Kombîyayîşê ma îrade û qerardarîya xo îfade kerd ke demokratîkbîyayîşê Tirkîya û çareserîya meseleya kurdan bingeyê îtîfaqê hêzanê demokrasî yê Tirkîya, bi têkoşînê vera faşîzmê AKP-MHPyî bena. Ame îfadekerdene ke têkoşînê vera AKP-MHPyî têna azadkerdişê Vakurê Kurdîstanî û demokratîkkerdişê Tirkîya nê, no têkoşîn heman wextî de têkoşînê azadkerdişê çar parçeyanê Kurdîstanî, pawitişê destkewteyan û demokratîkbîyayîşê pêro Rojhelatê Mîyanênî yo. Coka sere de hêzanê demokrasî yê Tirkîya ma venga pêro hêzanê cinî, ciwan û hêzanê demokrasî yê Rojhelatê Mîyanênî da ke tewrê têkoşînî bibê û têkoşînî xurt bikerê.

Kombîyayîşê ma yê Konseya Rayberdişî veng da ke têkoşîno ke 23 serran o vera komployê serê Rayber Apoyî yeno kerdene, serra 50. ya têgêrayîşê Apogîran de zî 15ê sibate ra dest pêbikero heta 8ê Adare, Newroze, Hewteyê Çêrîye, 4ê Nîsane, 1ê Gulane û pêro serra 2022î, bingeyê azadkerdişê Rayber Apoyî de bivurîyo têkoşînê azadkerdişê Kurdîstanî, demokratîkkerdişê Tirkîya û Rojhelatê Mîyanênî. Bi nê hawayî şerwananê azadîye yê apogîran, sempatîzanan, şarê ma yê welatperwerî û dostanê xo rê ma têkoşînê înan de serkewtiş wazenê.''