Hemserekîya Konseya Rayberdişî ya KCKyî seba Dr. Tarik Ziya Ekîncî û Alî Şukran Aktaşî mesajê serweşîye weşana.

Mesaj wina yo:

''Ma bi xemgînî pê hesîyê ke di welatperweranê ercîyayeyan ê kurdan Dr. Tarik Zîya Ekîncî û Alî Şukran Aktaşî dinyaya xo bedilnaya. Sere de ê keye û merdimanê nînan wa sereyê şarê kurdî weş bo.

Nê wird merdimanê têkoşeran têkoşînê azadîye û demokrasîyî rê hemkarîye kerde coka wefatê nînan seba ma û şarê ma xemgînî ya. Dr. Ekîncîyî hem dejê kurdan ê giranî hem zî xoverdayîşê vera înkar, asîmîlasyon û qirkerdişî dî û tewrê nê têkoşînî bi. Ey xeylêk kede daye têkoşînê kurdan. Ey têkoşînê demokrasîyî yê Tirkîya û sîyasetê demokratîkî rê zî kede daye. Alî Şukran Aktaş zî merdimêko têkoşer û ercîyaye bi. O vengdayîşê Rayber Apoyî ser o ame Tirkîya û seba çareserîya meseleya kurdan xebitîya. Ey bi nê karanê xo paştî daye wayûbiratîya şaran û netîceyê girîngî vistî destî.

Ma nê wird roşnvîr, welatperwer û merdimanê têkoşeran bi rêzdarî yad kenê. Ekîncîyî û Aktaşî têkoşînê ma yê demokrasîyî û azadîye rê kedê pîlî dayî. Ma zî do têkoşînê nînan ser bivisnê. Ma ancî şarê xo rê serweşîye wazenê.''