Hemserekîya Konseya Rayberdişî ya KCKyî seba Mehmet Akaro ke vera tecrîdê Îmraliyî bedenê xo dabi adirî ver mesajêk weşana. Mesaj de ame waştene ke wa çalakîyê xovêşnayîşî nêrê kerdene.

Mesajê Hemserekîya Konseya Rayberdişî ya KCKyî wina yo:

''Ma pê hesîyayê ke ciwanê bi nameyê Mehmet Akarî vera tecrîdê serê Rayber Apoyî Sûrê Amedî de bedenê xo dayo adirî ver û şehîd bîyo. Ma şexsê embaz Mehmet Akarî de pêro şehîdanê şoriş û demokrasî bi rêzdarî û minetî yad kenê, ma verê têkoşînê înan de sereyê xo anê war û şehîdan rê reyna sozê serkewtişî danê. Embaz Mehmet Akarî şehadetê xo ra verî mektuba xo de vato ke o na çalakîye vera tecrîdê serê Rayber Apoyî keno. Çend rojî verî embaz Veysî Ataşî zî çalakîyêka winayêne kerdbî û şehîd bibi. Sey têgêrayîş û şarê kurdî deynê ma yo ke ma wayîrê vîrameyîşanê nê şehîdan vejîyê û têkoşînê înan biresnê serfîrazîye.

Çîyê ke ameyê sereyê embaz Mehmet Akarî bi zelalî vet werte ke faşîzmê AKP-MHPyî senî vera şarê kurdî provakasyonan keno û şerê taybetî keno. Mehmet Akar ciwanêko kurd o welatperwer bi û sempatîya ci ya bi têgêrayîşê azadîye est bi. Sey her ciwanê/a kurdî/e embaz Akarî zî xîret kerdêne ke vera kolonyalîzmî têkoşîn bikero û waşt ke mesuldarîyanê xo bizêdîno. La rejîmê AKP-MHPyî yo ke rejîmê şerê taybetî yo, seba ke ciwananê kurdan bivisno mîyanê dafike û têkoşînê azadîye ra dûrî bivisno komplo provakasyonana keno. Nînan ra yew zî no yo ke îqtîdar keyeyan rê tesîr keno û verê ciwananê welatperweran gêno. Ciwano kurd o welatperwer Mehmet Akar zî raştê nê komplo û provakasyonî ame la sereyê xo nêard war. AKP-MHPyî kerd ke bi metodanê şerê taybetî û provakasyonî keyeyê ey ser ra waşt ke embaz Akar têkoşînî ra dûrî bibo. Bi nê hawayî zî îqtîdarî kerd ke wina bimojno ke ma ciwanan remnenê û bi rayîrê HDPyî ney kenê. La embaz Akarî dîyar kerd ke no provakasyonêk o û keyeyê ci xapîyayo. La îqtîdarê faşîstî na rewşe vurnaye hêrişê vera HDPyî. Îqtîdarê AKP-MHPyî pêro prvakasyon, şerê taybetî û operasyonan seba ke kurdan dewaya azadîye ra dûrî bivisno keno. Ma reyna venga derûdorî danê ke bi manîpulasyonanê AKP-MHPyî têmegêrê. Mekewê dafika înan. Ganî AKP-MHP û serekê şerê taybetî Suleyman Soylu nê tewirî ra fek vera bidê.

Nê polîtîkayê şerê taybetî bi îstîsmarkerdişê hîsanê tay kesan, bi manîpulekerdişê tay kesan û bi vilakerdişê pereyan yenê kerdene. Îqtîdaro faşîst tay kurdanê bêrûmetan dano xo ver û wazeno dişmenîya xo ya vera kurdan binimno. AKP-MHP teyna wazeno pêro kurdan qir bikero.  Coka nê operasyonan keno û çekê kîmyewîyî zî tede vera ciwananê kurdan her tewirê metodê qirkerî ano ca. Laj û cinîyê kurdî bi çekanê kîmyewîyan yenê qirkerdene. O çax no îqtîdar senî kurdan rê fayde bikero? Îqtîdar hîsanê keye û dadîyan zî keno babeta şerê taybetî û îstîsmarî keno. Nê warî de her kes ganî hişyar bibo û bizano ke xapîyeno. Ganî keyeyî bizanê ke bi nê tewirê xo ê do faydeyê domananê xo nêkerê. Mesuldarê meseleya kurdan û pêro dejanê şarê kurdî hukmatê AKP-MHPyî yo. Coka ganî keyeyî nê tewiran ra fek vera bidê û tewirê raştî bimojnê AKP-MHPyî.

Tewirê embaz Mehmet Akarî kerdişê şerê taybetî pûç kerdî

Akarî bi tewirê xo polîtîkayê qirkerdişê kurdan û kerdişê şerê taybetî pûç kerdî. Ganî no tewir û manaya ci hetê her kesî ra hol bêrê famkerdene. Şarê kurdî dewaya azadîye keno û dewaya şarê kurdî meşrû ya. Bedelê ci çi beno wa bibo şarê kurdî do qetî na dewa ra fek vera nêdo. Bi manîpulasyon, provakasyonan û şerê taybetî na dewa do nêqeda. La çira nînan de yeno israrkerdene? Faydeyê nê polîtîkayan kamî rê est o? Eşkera yo AKP-MHP, çete û hemkarê ci ney ra fayde gênê. Ganî bizanîyo ke ganî welatperwerî, demokratî, sosyalîstî, azadîgîrî û bawermendê rûmetê merdimatîye vera na rewşe bêtewir nêmanê. Ganî her kes mesuldarîya xo bîyaro ca. Nika ganî komelê Tirkîya nê îqtîdarî û rejîmê faşîstî ra bixeliso. Vera tecrîdê serê Rayber Apoyî teyna şarê kurdî nê pêro kesê ke vera faşîzmê îqtîdarî vindenê û wayîrê erjanê merdimatîye yê, ganî tewirê xo bimojnê û têbigêrê. Rayber Apo wayûbiratîya şaran, demokratîkbîyayîşê Tirkîya û cuya hempare ra yeno tecrîdkerdene. Coka kesê demokratî ganî vera tecrîdî têkoşîn bikerê. Heta ke paştî nêra dayene têkoşînê azadîye yê kurdan mumkîn nîyo ke Tirkîya demokratîk biba û warê demokrasî de aver şora.

Ganî şarê ma û ciwanî hîna zaf wayîrê Rayber Apoyî vejîyê

Şarê kurdî yo welatperwer û ciwanê Kurdîstanî ganî mesajê şehîdan ser o, bi xurtî wayîrê Rayber Apoyî vejîyê. Embaz Mehmet Akarî destpêk de mesajêk da ciwananê Amedî û venga înan da ke hîna zaf wayîrê têkoşînî vejîyê. Çalakîya xo ey saete 21.21 de kerde û şar û ciwananê Amedî rê mesaj da. Manaya nê mesajî zaf xorin a. Embaz Mehmet Akarî heman wextî de venga pêro şarê kurdî û ciwananê welatperweran da ke vera tecrîdê serê Rayber Apoyî hîna zaf têkoşîn bikerê. Ganî ciwan û şarê kurdî nê vengdayîşî esas bigêrê û hîna zaf wayîrê Rayber Apoyî vejîyê.

Ganî hînî çalakîyê xovêşnayîşî nêrê kerdene

Ma bi wesîleya şehadetê embaz Akarî reyna bi zelalî eşkera kenê ke ma çalakîyanê winayênan tesdîq nêkenê. Rayber Apoyî zî bi zelalî dîyar kerdbi ke o nê îradeyî ercîyaye vîneno la çalakîyanê winayênan tesdîq nêkeno û herinda înan de ganî çalakîyê cîyayî bêrê kerdene. Şarê kurdî û ciwanê kurdî ganî ney sey talîmatê Rayber Apoyî bigêrê û goreyê ney têbigêrê. Ganî çalakîyê xovêşnayîşî hînî qetî nêrê kerdene. Bêguman çalakîya embaz Mehmet Akarî mîsalê çêrîye, fedakarî û perwerî yo. Bi na manaya xo çalakîyêka pîl a la metodê çalakîyanê ke ma esas gênê ganî bi nê hawayî nêbê. Hînî têkoşînê ma aver şîyo, xeylêk waran de xebatê ma est ê. Ganî ciwanê kurdî ney bivînê û wina nêzdîyê ci bibê. Ciwanê kurdî seba pîlkerdişê têkoşînî ganî tewrê gerîlayan bibê û vera dişmenî têkoşîn bikerê. Êyê ke nêeşkenê wina bikerê zî ganî dew û şaristanan de têkoşîn bikerê, şar perwerde bikerê, hişyar bikerê, rêxistin bikerê û bi nê hawayî têkoşînî pîl bikerê. Ganî ciwanî her ca de xo perwerde bikerê, rêxistin bikerê û serkêşîya têkoşînî bikerê. Metodê raştî nê yê û ganî nê metodî bêrê esaskerdene. Ma reyna venga şar û dostanê xo danê ke tewirê xo yê vera tecrîdê serê Rayber Apoyî xurtêr bimojnê, bi berzkerdişê têkoşînî rejîmê faşîstî yê AKP-MHPyî birijnê û seba awankerdişê Tirkîyaya demokratîke têkoşînî geşêr bikerê.''