Goreyê xebera RojNewsî, tayê çimeyê ke herêma Behdînan de rîyê asayîşî ra nameyê xo nêdanê da zanayene ke, hêzanê pêşgermeyan 22’ê Hezîrane de Zaxo de 5 tumî teslîmê dewleta Tirkî kerdî.

Tumê ke ameyê teslîmkerdene, mîyanê înan de de sere de Girê Serzêrikî yo ke herêma Behdînan de yo. Nê tumî de nêzdîyê 20 serrî yo ke qerargehê pêşmergeyan estbîyî. La eynî wext de merkezê îstîxbaratan ê ke girêdayîyê Tirkîya yê zî estbî. No tum êdî bi temamî teslîmê dewleta Tirkî ame kerdene.

Nuqtayê bînî zî wina ameyî rêzkerdene: Hemverê Girê Baroxî de Girê Xemginî, herêma  Berwarîyan de corê dewanê Gîrîka û Qumrîye de Girê Casusî, nêzdîyê tunela ke Koyê Sipî de, vejîyayîşê Zaxoyî de ca gêna de di nuqtayî. Cayo ke tunelî estê de leyê pêşmergeyan de eskerê Tirkî û çi-mîyê eskeran estbîyî. Pêşmergeyan tîya ra dest ant û dewrê dewleta Tirkî kerd.

Goreyê RojNewsî, seba ke pêşmergeyan nê tumî û nuqtayî teslîmê artêşa Tirkî kerdê, hemwelatijanê herême reaksîyon da. Hemwelatijêkê herême vat, “Hukmatê Herêma Kurdistanî teyna bi nameyê xo esto. Zaf eşkera yo ke teberê nameyî de her çî destê dewleta Tirkî de yo.”

Kanîmasî de 6 nuqtayî dayê îşxalkaran

KDP’yî, 21’ê Hezîrane de, wextê serdayîşê serekê herême Neçîrvan Barzanî  yê Enqere de 6 nuqtayê tewr stratejîkî yê Kanîmasîyî teslîmê dewleta Tirkî kerdîbî. Nê heme nuqtayê stratejîkî bi nê hewayî ameyî teslîmkerdene û serê nînan de tumê Dîlman û Baroxê yenê. Serdayîşê Neçîrvan Barzanî ra rojêk tepîya, saetanê şodirî de eskerê Tirkî sey konvoyan nê tuman de amaybî cakerdene.