Qezaya Artemêtanî ya Wanî de Makbule Ozera 80 serre û astengdare pa mêrdeyê xo menga gulane de bi îdîaya 'hetkarîya rêxistine' ameybî tepiştene. Makbule Ozera ke Zîndanê Tîpê Tyî yê Wanî de tepişîyena, bi şikê janê Korona  wedarîyabî nêweşxane. Dima Ozere hêna şawîyaye zîndan.

Rixmê heme muracatanê avûkatan Ozere ne yena veradayene ne zî cezaya ci ya zîndanî açarîyena hepsê keyeyî.

Kênaya aye Naîme Ozer vizêer zîndan de dadîya xo zîyaret kerde û derheqê rewşa dadîya xo de Jinnewsî rê qisey kerd. 

 Naîme Ozer îfade kerd ke dadî û babîyê ci seba ke kurd ê tepişîyayê û nasnameyê xo ra semed zulmî vînenê. Naîme Ozer da zanayene ke embazanê koxûşî yê dadîya ci vato 'eke wina şêro Makbule xo kişena' û vat: ''Dadîya mi nêeşkena bi sereyê xo lazimîya xo peyda bikera. Xora a rayêke giraye war û baskê ci engilîsîyayî.  Cara a nêeşkayêne pay ra vindera nika zî destanê xo ra bîya. Dadîya mi vat a hînî nêeşkena daymîşê zîndanî biba. Ma qerqilîyenê. Dadîyê mi her roje şina nêweşxane. Pê zorî nişena wesayîtê rîngî. Dadîya mi zîndan de îşkence vînena.''

Naîme vat ke rewşa dadîya ci vera bena xirabêr û veng da ke wa Makbule Ozer bêra veradayene û  rayaumûmîye derheqê babete de wa hîsger biba.

Avûkata Makbule Ozer Dîlane Kunt zî da zanayene ke înan rayna seba hepsê keyeyî muracat kerdo û waşt ke wa Makbule Ozer bêra veradayene.