Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyabî verê Edlîyeya Riha de, lajê xo Ferît Şenyaşarî reyde nobeta edaletî kena. Nobeta edaletî roja 371. de dewam kena.

Ferît Şenyaşarî da zanayene ke hewteyê verênî de pawitoxanê heqanê merdiman û rêxistinanê huqûqî paştdayîşêko pîl mojna înan û vat: ''Derheqê dewa de Serekê Yewîya Baroyan a Tirkîya Erînç Sagkanî zî soz da ke nê warê huqûqî de paştî bidê ma. Sagkanî dima serdozger zîyaret kerd. Serdozger reyna edlîye ra rema. Ma heqdar ê, dewaya ma hînî bîya dewayêka komelkîye. Wekîlê AKPyî heta ke na dewa nêra zelalkerdene nêeşkenê vejîyê mîyanê şarî. Ma wazenê na bêedaletîye rojêke biqeda.''

Ferît Şenyaşarî pare kerd ke Nêweşxaneyê Dewlete yê Pirsûsî de qirkerdişêk ame kerdene û vat: ''Kesê ke no qirkerdiş kerdo rojêke do bêrê muhakemekerdene. Serdozgerê ke bira teqîbnêkerdişî daya do kiştoxan reyde bêro muhakemekerdene. O zî sûcî keno. O zî beno hemkarê nê qirkerdişî.''