Îrfan Kiliç Zîndanê Kandira de ame înfazkerdene?

Îrfan Kiliço ke ame vatene ke Zîndanê Kandira yê Tipê F’yî yê Hûmara 2’ine de xo vêşnayo, bedenê ci de rêçê îşkenceyî ameyî dîyene. Keyeyê Kiliçî vano ke lajê înan ameyo înfazkerdene.

Îrfan Kiliço ke Zîndanê Kandira yê Kocaelî de wefat kerd û sebebê mergê ci sey xo vêşnayişî ame  zanayene, keyeyê ci cenazeya ey girewt û da eşnawetene ke bedenê ey de rêçê îşkenceyî estê û beno ke Kiliç ameyo înfazkerdene.

Goreyê xebera Ajansê Mezopotamya MA Çewlîgij Îrfan Kiliço ke perey Zîndanê Kandira de wefat kerd û xebera mergê ey sey çalakîya fedaîye ameye vilakerdene cenazeya ci vizêr Xarpêt de teslîmê keyeyê ci bîye. Keyeyê Kiliçî meyîtê xo saetanê şanî de qezaya Bongilanî ya Çewlîgî de defin kerd. Keyeyê Kiliçî yo ke xovêşnayîşê lajê xo ra bawer nêkeno, verê şitişê meyîtî bi telefonî dimenê ci antî û ramot ke bedenê ey de rêçê îşkenceyî estê. Keyeyê Kiliçî şik keno ke lajê înan Îrfan Kiliç ameyo înfazkerdene.

Birayê Kiliçî Husamettîn Kiliço ke MA rê qisey kerd ard ziwan ke birayê ey rê îşkence ameyo kerdene û noto ke yeno vatene ey xo dima verdayo xebera înan nê notî ra çîna û vat ma dîmenê meyîtî antê ma do muracatê dozgerîye bikerê û babete zelal bikerê.