Komîteya Ekolojî ya KCKyî derheqê Konferansê Têgêrayîşanê Ekolojî de eşkerayîyêke daye.

Eşkerayîye wina ya:

''Têgêrayîşanê Ekolojî û Pawitoxanê Ekolojî 213 eçeleyê 2023yî de seba ameyoxê azadî yê Kurdîstanî û Tirkîya morê xo da binê prosesêkê neweyî. Ma nînan fîraz kenê û netîceyanê nê konferansî bi coş û kelecanî selam kenê. Konferans de ame tesbîtkerdene ke krîzo ekolojîk û hêrişî sîstematîk ê, coka çareserî û çare zî ganî rêxistinbîyaye bibê.

Konferansê Têgêrayîşanê Ekolojî ard ziwan ke;

1- Êyê ke seba cuya ekolojîke têkoşîn kenê, her çî ra verî ganî dûştê şerî bibê

2- Têkoşînê seba cuya ekolojîke, têkoşînê azadîya cinîyan ra cîya nîyo

3- Sîyaset krîteranê azadîya cinîyan û cuya ekolojîke ra cîya nêro kerdene

4- Krîterê cuya ekolojîke bi awanî û nasnameyê etnîkî, bawerî û sînorê neteweyî nêeşkenê bêrê dîyarkerdene, warê têkoşînî yo enternasyonalîst û global o.

5- Her çî ra ver ganî heqê cuye yê her kesî û her çî rê hûrmet bêro mojnayene.

Seba ke konferans prosesê weçînayîşan ra ver ame kerdene, qisey û pênaseyê 'sîyasîyî' vejîyayî vernî, rixmê ney zî konferans de ame îfadekerdene ke ganî têkoşînê cuya ekolojîke wa nêbo malzemeya sîyasî. Nasname û îdeolojîya ci se beno wa bibo sîyaseto ke wayîrê krîteranê ekolojî û azadîya cinîyan nîyo, mîyanê Têgêrayîşê Ekolojî de canêdo co. Goreyê asta qerardarîya konferansî no het hetê rojaneyî ra hem zî hetê tarîxî ra bi averşîyayêko zaf girîng.

Naye ra wezîfe û mesuldarî no yo ke qerarê nê cewherî wa bêrê caardene û rêxistinkerdene. Wext wextê ci yo ke vera hêrişanê hêzanê sermaye û modernîteya kapîtalîste tewir bêro mojnayene, vera xerakerdişê waranê ma yê cuye û zerarê giranî, vera çinkerdişê tarîxê ma ganî ma îradeyê cuya hempare waranê xo bikerê hêzê rêxistinbîyayeyî û têbigêrê. Bi na bawerî û qerardarî ma her keso ke kede dano, mesuldarîya xo ya wezîfeyê şorişgêrî ano ca bi hîsanê serkewtişî selam kenê.''