Dîwanê Hemserekîye yê KONRA GELî pê serrnameyê 'Rîyo raştikên ê Yewîya Ewropa (YE) û Konseya Ewropa (KE)' eşkerayîyêke daye.

Eşkerayîye bi kilmî wina yo:

''Nê wextî de ke dewleta Tirkîya pa îqtîdarê AKP-MHPyî faşîzm awan keno Sereka Komîsyonê YE Ursula von der Leyen û Serekê Konseya YE Charles Michel Tirkîya zîyaret kerde û netîceya pêvînayîşê bi Erdoganî eşkera kerde. Nînan têkilîyanê Dengizê Sipî û ekonomîkan ser o qisey kerd. Meseleyê heqanê merdiman, demokrasî, qeyûm, kurdan, dewaya qefilnayîşê HDPyî, bêvengkerdişê muxalefetî, wedaritişê Peymana Îstanbulî, alozîya ekonomî, kişîyayîşê cinîyan ê Tirkîya rojdemê YE û KE de nîyê.

Semedo ke YE û KE kerdişanê AKP-MHPyî peygoş kenê no îqtîdar wina rehet kurdan qetil keno. Coka YE û KE zî hemkarê îqtîdarê AKP-MHPyî yê. Verî zî 11-25ê çeleyî de CPT Tirkîya zîyaret kerde la nêşi Îmraliyî. No zî eşkera keno ke KE meseleya kurdan de polîtîkaya rîsîyatîye ana ca.

Yewîya Ewropa vera îşxalê Efrînî bêveng mende û bi nê hawayî bîye hemkarê sûcanê Efrînî yê dewleta tirke. Yewîya Ewropa cergan rê ardim kena ke herinda cayanê roniştoxanê Efrînî de keyeyan virazê. Yewîya Ewropa zî mesuldara vurnayîşê demografîya Efrînî ya.

Semedo ke Yewîya Ewropa bêşert paştî dana polîtîkayanê Tirkîya yê vera kurdan nê polîtîkayan meşrû kena. Heta ke Yewîya Ewropa paştî nêda cara Tirkîya nêeşkena nê polîtîkayan bîyara ca. Tirkîya semedo ke binê nameyê 'têkoşînê vera terorî' de  vera kurdan şer kena zere de zî mîyanê krîzê ekonomîkî de ya.

Yewîya Ewropa û Konseya Ewropa eşkayêne pê rolêkî Tirkîya de meseleya kurdan çareser bikerê la înan paştdayîşê îqtîdarê AKP-MHPyî tercîh kerd ke no îqtîdar vera kurdan konseptê şerî de israr keno. Nînan seba ke nefes bigêro îqtîdarî rê ardim kerd.

Rixmê nê ardim û paştdayîşî zî îqtîdaro faşîst ê AKP-MHPyî hînî nêeşkeno payan ser o vindero. Hêrsê şarê yê vera xizanîye, zulm, qirkerdiş û vêşanîye her roje zêdîyeno.  Şarê Kurdîstanî pê ruhê Newroze û Garê tewirê xo mojna. Tirkîya de zî pê ruhê 'Gezî' îtîrazî berz benê. Şarê Kurdîstan û Tirkîya pê ruhê Newroze û Gezî yew bîyî.

No proses çinbîyayîşê prosesê faşîzmî yo. Eke hêzê demokrasî rayîr nêdê AKP-MHPyî hêzê sey YE û KE zî do polîtîkayanê xo bivurnê.

Ma venga hêzanê demokrasî yê Kurdîstan û Tirkîya danê ke pê xo û şaranê xo bawer bibê, hêzê şima eşkeno faşîzm çin bikero. Rejîmo faşîst semedo ke zaf qels bîyo hende hêrişan keno. Ganî hêzê demokrasî rayberî û rêxistinîya şarî bikerê.

Ma ê kesanê pê ruhê Newroze û Gezî têkoşînê demokrasî û azadîye berz kenê selam kenê û nînan rê serkewtiş wazenê.''