Koordînasyonê Krîzî yê HDPyî yê Amedî eşkerayîya çapemenî daye. Hemserekê BDPyî yê Amedî Hayrettîn Altûn û Hemserekê HDPyî yê Amedî Gulîstane Atasoy û Zeyad Ceylan û Hemvervatoxê Koordînasyonî Abbas Şahîn eşkerayîye bîyî.

Destpêkî de Gulîstane Atasoy qisey kerd û dîyar kerd ke tena Amede de ney, herêmanê bînan ê erdlerzî de zî xebatê hetkarî û paştîdayîşî kerdî.

Hemvervatoxê Koordînasyonî Abbas Şahînî eşkerayîye wende û dîyar kerd ke îqtîdarê AKPyî erdlerzê Marmara ra heta nika 23 serrî yo ke dersêke nêgirewta û her cayê xoza kerda cayê rantî û şarê ma zî kerdî qurbanê rantê xo.

Şahînî wina dewam kerd, ‘‘Roja yewine ya erdlerzî de partîya ma bi kordînasyonê krîzî xo resnaye her cayê herêmanê erdlerzî û seferberîya hetkarî daye destpêkerdene. Şarê Amedî birinê xo piştê û hetkarîya herêmanê bînan kerde. Wina nîşanê her kesî da ke sîstemê rêxistinkerdeyî senî benê. Eke qeyûmî şaredarîyanê ma ser o çin bîyêne ma do birînanê şarê xo hîna lez bipiştêne. Dewleta ke 3 rojî nêameye herême, nika zî hetkarîyan rê asteng bena.’’

Şahînî wina peynîya eşkerayîye arde: ‘‘Ewro, hetêk ra ma hewl danê ke birînanê şarê xo bipêşê, hetêk ra zî ma vera sîstemê yewperestî têkoşînê xo xurt kenê û ma vanê ke ‘KEYEYÊ MI; KEYEYÊ TO YO’. Ma venga şarê xo danê ke wa paştîdayîşî xurt bikerê.

Eşkerayîye ra dima Hemserekê HDPyî yê Amedî qisey kerd û dîyar kerd ke, roja yewine ya erdlerzî de wezîfedarê dewlete çin bîyî û vat ‘‘Ma şarê xo rê zaf sipas kenê. Rêxistinê sivîlî yê bajarî û hêzê demokrasîyî bi hewayêko lezgîn xo resnayê herême. Hêzê demokrasîyî seba mexdûranê Amed û herêmanê bîna hetkarî kenê.’’

Ceylanî bale ante awanîyanê xesarinan ser o û vat, ‘‘Çi heyf ke Amed de xeylê awanîyan xesar girewto, gere ma xo biresnê şarê xo ke banê înan xesar girewto. Bi zore wazenê şarê ma koç bikerê. Vanê, ‘şêrê bajaranê bînan’. Gelo şar do bajaranê bînan de se bikero? Dermanê ma şarê ma yo. Ma pîya paştî bidê yewbînan. Bêrê ma pîya destê xo bidê yewbînan û hetkarîya şarê xo yê mexdûran bikerê.’’