Krîzo ekonomîko ke polîtîkayanê îqtîdarê AKP-MHPyî ra semed qewimîyeno, her ke şino tesîrê ci serê şarî de benê giranêr. Seba ke lîraya tirkan verê euro û dolarî de tim bêqîmet bena vaya her çî zî zêdîyena.

Roniştox û esnafanê Wanî derheqê babete de ANFyî rê qisey kerd. 

Dikandar Bariş Yegînî vat: ''Krîzî ra ma nêeşkenê çîyêkî biroşê. Goreyê parî karê rotişî tay ê. Gramê zerdî bîyo 700 lîra Çew nêeşkeno bizewijo. Çew de pere çin o ke veyve bikero.''

Dikandarî Emîn Sorgulî vat: ''Nê krîzî de ma senî bieşkê çîyêkî biroşê? Qîmetê lîra nêmendo. Ez nêeşkena çîyêk qezenç bikera. Mesrefê ma her roje zêdîyenê. Destê mi de malî zaf ê la çew nêhêrîneno. Meseleyê ma emser giranêr bîyî. Çunke krîzo ekonomîk est o.''

Roniştoxanê Wanî ra Şukru Palayî vat: ''Meaşo asgarî 11 hezar û 400 lîra yo. No pere çita rê vejîyeno? Kar zî çin o. Ê Erdoganî malê ci zaf ê. Vera weno. La ma mîyanê rewşêka zehmete de yê. Ma ney qebul bikerê zî Homa qebul nêkeno. Yew tewraya meqarna bîya 170 lîra. Ma nêeşkenê çîyêkî bihêrînê.''