Dimayo ke qeyûmî tayînê şaredarîye ameybî kerdene, çalakîyê kultur û hunerî zî ameybî qedexekerdene. Labelê dimayê weçînitişê 31’ê Adare şaredarîyî qeyûman ra ameyî girewtene û çalakîyê kultur û hunerî reyna dest pêkerdî.

Şaredarîya Bajarê Girdî ya Amedî, hewteyê verênî bi slogana “Cuye ya ma ya, vatiş ê ma yo” Parkê Koşûyolû de çalakîyê kultur û hunerî dayî destpêkerdene û do nê çalakîyî heta payîz dewam kerê. 

 'Îhtîyacîya Amedî bi Çalakîyanê Kulturî Esta’

Heman wextî de ronişteyê bajarî seba nê çalakîyan kêfweş ê. Nazê Dûmane ard ziwan ke dimayo ke qeyûmî ameybî tayînkerdene ê bi hesreta çalakîyanê kultur û hunerî bî û vat, “4 serranê peyênan de peynîya peynî hêrişê çalakîyanê kultur û hunerî zî kerd. Îhtîyacîya Amedî bi çalakîyanê bi nê hawayî esta. Ma wazenê ma estbê.”

 Beşdaran ra Necmettîn Sevîktek, Ayşan Karûş Zengîne, Fûat Guzel, Esma Efeturke, Kadriye Polate, Elîf Tûrane zî muhîmîya çalakîyanê kulturîyan ser o fikrê xo vatî û waşt ke çalakîyê kulturîyî hîna zaf bêrê organîzekerdene. Vedat Sevîmo ke Akademiya Ma Muzîkî de perwerde dîyo vat: “Heme parkî çalakîyanê kulturî rê ameybî qedexekerdene. Fealîyetê ma ameyêne astengkerdene. Nika reyna kuçe û mehlayanê Amedî de deyîrê Kurdî zimî danê. Ma zaf kêfweş ê.”