Dewleta tirke ya îşxalkere pê paştdayîşê PDKyî Kurojahro de dest pê hêrişê hîrayî kerd. Artêşa tirke pê paştdayîşê helîkopteran waşt herême de leşkeranê xo ca bikero. Mabênê îşxalkeran û gerîlayan de pêkewtişê giranî qewimîyenê.
Merkezê Îrtîbatî û Çapemenîye yê HDPyî derheqê hêrişê îşxalî yê dewleta tirke nê zanayîşî pare kerdî:
''Şewa 21ê nîsane de pêro pîya 9 helîkopter û skorskyan xeta Amedîye-Dêrelokî ya ke binê kontrolê PDKyî de ra warê Kurojahroyî bombarduman kerd. Pîya bi destpêkerdişê hêrişê helikopteran pê skorskyan zî leşkerî ameyî ronayene. Hêzanê ma yê Warê Xoverdayîşî Kurojahroyî mudahaleyê helîkopteran kerd û darbî dayê înan ro.
Saetanê ereyî yê şewe de artêşa tirke 10 helîkopterê bînî ardî û na herême de hêrişê xo giranêr kerdî. Netîceya mudahaleyê hêzanê ma de helîkopterêk ame darbkerdene. Gama ke helîkopterêkê artêşa tirke baregehê Sûrê yê Şêladizê de nişt û waşt merde û birîndaranê xo wedarê hetê hêzanê ma ra ame darbkerdene.
Helîkopteranê artêşa tirke serê waranê ke binê kontrolê PDKyî ra firdayî û hêrişê Warê Xoverdayîşî yê Kurojahroyî kerd. Pîya bi helîkopteranê hêrişî û skorskyan nê hêrişî de helîkopterê tîpê Cinokî (CH-47 Chinook) yê Amerîka zî ameyî şuxulnayene.
Nê hêrişê hîra û giranî hem Warê Xoverdayîşî yê Kurojahroyî de hem zî herêma Zapî de merhale û pêlê hêrişî yê neweyî îfade kenê. Herême de xoverdayîşê hêzanê ma yê gerîlayan û pêkewtişê giranî dewam kenê.''
