Qezaya Licê ya Amedî de, qeymeqamî 10 keyayî gure ra eştîbî. Ame zanayene ê keyayan ra 6 tenî agêrayî karê xo ser.

 Licê ya Amedî de, qeymeqamê qeza 10 keyayê ke weçînitişê 31’ê Adare de ameybî weçînitene gure ra eştîbî û derheqê înan de cipersayîş dabi destpêkerdene. Cipersayîşê derheqê keyayan qedîya. Dozgerîya Komar a Licê cipersayîşê sûcdarîya “têkilîya înan organîzasyonî dir esta” de, derheqê 6 keyayan de qerarê nêşopnayîşî da. Dimayê nê qerarî ra her 6 keyayî agêrayî karê xo ser.

Keyayê ke agêrayî karê xo ser nê yê: Fîkrî Ertaş, Hanîfî Gulen, Çetîn Dîrîn, Azîz Dogan, Mekîn Yalçin û Servat Polat. Keyayê ke derheqê înan de cipersayîş dewam keno nê yê: Keyayê Barava Bahrî Narîn, keyayê Heşedere Mahfûz Mayda, keyayê Kerwesî Abdulcebbar Çelîk û keyayê Firdeysî Vayez Altintop.