Ahmet Tektaşo ke dewa Xana Kelê ya Licê de serra 1947’î ra nata sere de dewa ci, çîyêk qeza de ameyê ciwîyayene, înfazanê bêmuhakemeyan ra heta vengkerdişê dewan, depremê Licê ra heta ameyîşvêşnayîşê Licê û kişîyayîşê Ceylan Onkole, derbeyê ke Tirkîya de bîyê û qewimîyayîşê sîyasîyî, hemeyê înan rojenûsê xo de qeyd kerdîbî, 90 serrîya xo de merd. Cenazeya Tektaşî dewa Xana Kelê ya Licê de gomê Puneynî de amî wedartene.

 ‘Mi Defterê Licê de Rastîyî Nuştî’

Belgefîlmê “Mi Defterê Licê de Rastîyî Nuştî” yê defterê rojenusê Tektaşî ke serra 1947 ra nata girewtêne û sey “Vîrê Licê” ameyêne zanayene amebi antene. Belgefîlmo ke serra 2010 de hetê rojnameger û îdarekar Ersîn Çelîkî ra amebi antene, xeylî cayan de amebi ramotene.Tektaşî meraqê xo bi vatişê “Serra 1947 de dewa ma de kesêk merd, heman demî de yewna kes ame dinya. Mi zî waşt ke nê qeyd bikerî la wendiş-nuştişê mi çinbi. Mi dorme ra tayê hetkarî girewte û ez bi nuştişî musaya û mi a roje defterê xo de nuşte. Ez wendiş-nuştiş leşkerî de mûsaya. Dimayo ke mi tezkere girewt û agêraya mi dest bi girewtişê rojenusî kerd. Mi dewe de ê ke merdê, ameyê dinya, veyveyî, qewimîyayîşê ecêbî yê dewe qeyd kerdî.“

 Pîya bi Defterê Xo Amebi Destbendkerdene

Tektaşî derbeya 12’ê Êlule 1980 de, Erdlerzê Licê yê 1975’î, înfazanê bêmuhakemeyan ra heta vengkerdişê dewan, kişîyayîşê fermandarê Cendirmeyê Herême Bahtîyar Aydinî ra heta ameyîşvêşnayîşê Licê çîyê ke qewimîyayê nuştê. Serra 1997 de gama ke erzîyeno serê dewe Tektaşî ra yeno persayene ‚ti çi ra nê çîyan nusenê‘ û pîya bi defterê xo yeno destbendkerdene. Tektaş vano, „rastîyî wina bî mi zî ê nuştî.“ Tektaş bi israrkerdişî defterê xo apey gêno. Tektaşo ke 90 serrîya xo de merd, xo ra dima vîrêko pîl verda.