Demê peyênî de artêşa tirke Şingal de têgêrayîşê xo zêdîna. Artêşa Iraqî Asayîşê Êzidxanî tehdît kerd û dewleta tirka ke naye rî paştî girewt û reyna hêrişê Şingalî kerd. Dewleta tirke ya îşxalkere bi wesayîtanê hewayî yê çekdaran ê bêmerdiman reyna Şingal da bombayan ver. Netîceya hêrişî de Fermandarê Yewîyanê Xoverdayîşê Şîngalî (YBŞ) Azad Êzdîn (Sileman Şemo Yusuf) û şerwanê YBŞyî Enver Tolhildan (Nacî Hecî Sebro) şehîd bîyî û di kesê ke nameyê înan nêameyî musayene birîndar bîyî. Dayê  Şemê û endama TAJÊ Nurê Şingalî vera dewleta tirke û tehdîtanê hukmatê Iraqî nêrazîbîyayîş mojna.

Dayê Şemê ard ziwan ke nê hêrişî pabesteyê pêkerdişê 9ê teşrîna verêne yo ke mabênê PDK, Iraq û Amerîka de ame kerdene yo û vat artêşa Iraqî hûzûrê Şingalî remnena. Dayê Şemê vat: ''Kenê ke verê fermananê neweyan abikerê.  Ganî heme mîrê êzidîyan kesê ke êzidîyan temsîl kenê vera neye bêveng memanê. Qey hukmatê Iraqî bi seyan leşkerê xo Şingal de ca kerdî, ganî ma nê bipersê. Ma zanê ke ê semedê pawitişê ma nêameyî. Wesayîtê nînan da domananê ma ro di domanan dinyaya xo bedilnaye û 27 kesî birîndar bîyî.  Êyê ke benê sebebê mergê domananê ma semedê pawitişê ma ya zî çînkerdişê ma yenê? Ma pêro eşkera kayê ke yenê kaykerdene vînenî. Ganî ma sey şarê Şingalî verê înan bigêrê û destûrê fermananê neweyan medê. Ma zanê ke nê hêrişî netîceya îtîfaqê PDK, dewleta tirke û hukmatê Iraqî yê. No îtîfaq  beno sebebê fermananê neweyan. Eke hukmatê Kazimî holîya ma wazeno wa her roje ciwanan û rojnamegeranê ma destbend mekero, herinda ciwananê ma de wa çeteyanê DAÎŞî muhakeme bikerê.''

Nurê Şingalî zî vat: ''Hukmatê Iraqî bîlasebeb tim hêriş keno. Ma sey cinîyan ê êzidîyan nê hêriş û zextan şermezar kenê. Ma do destûr medê ke dişmen plananê xo bîyaro ca. Ma serrgêra şehadetê Şehîd Zerdeşt Şingalî de waşt peykerê ci Şingal de ronê la hukmatê Iraqî destûr nêda. No zî leteyêkê pêkerdişê 9ê teşrîna verêne yo. Ma do sey şarê Şingalî nê kayanê dişmenî ya mexapîyê. Dişmen wazeno îradeyê êzidîyan bişikno la ma do destûrê ci medê.''