Delegeyê Heyetê Berzî yê Komeleya Kulturî ya Pîr Sûltan Abdalî û avûkat Cafer Kolumanî derheqê polîtîkayanê vera elewîyan û asta rêxistinbîyayîşê elewîyan de ANFyî rê qisey kerd. 

Avûkat Kolumanî pare kerd ke wedarnayîşê şerîatî û averberdişê laîktîye ra dima merkezê bawerîye yê elewîyan ameyî girewtene û vat: ''Elewîyan rê zaf heqaretî ameyî kerdene. Ronîyayîşê Mudirîya Karanê Dîyanetî zî mîyanê elewîyan de şiknayîşo diyîn viraşt.  Qirkerdişê Koçgirî û Dêrsimî ra dima mutewaya kulturê oxacî ameye vengkerdene û elewîyî bêrêxistin mendî. Na rewşe her ke şina bena giranêr. Seba ke dewlete bawerîya elewîyan vera xo sey gefî dîye hetê dewleta tirke ra ameye vengkerdene. Elewîyan modelê rêxistinbîyayîşê xo yê bawerîye aver berd. Bi taybetî Qirkerdişê Sêwasî ra dima elewîyan bire daye ke têkoşîn bikerê. No rêxistinbîyayîş hema zî dewam keno.''

Kolumanî îfade kerd ke dewlete wextê weçînayîşan de sozan dona elewîyan la dima nê sozan xo vîr a kena. Kolumanî vat: ''Hamnanê 2020î ra nata mufetîşî erşawîyayî cemxaneyan û înan vat ke wazenê goş bidê waştişanê elewîyan ser. La nê pêro veng vejîyayî. Ê wazenê têna rayanê elewîyan bigêrê. Elewîyî nê xîretan sey hemleyanê sîyasîyan vînenê. Coka ê duştê nê têgêrayîşan ê. Eke îqtîdaro sîyasî menfaatanê elewîyan biercno, ganî qîmet bido nasname û merkezanê ma yê bawerîye.''

Kolumanî da zanayene ke ganî elewîyî mîyanê xo de hişmendî û rêxistinbîyayîşêkê hemparî awan bikerê. Kolumanî dîyar kerd ke ganî na çarçewa armancê hemparî de ê bibê yew û dokumentê tewirî virazê.''

Kolumanî derheqê dokumentê tewirê hemparî de nê madeyî hûmaritî:

●Wa dewanê elewîyan de awankerdişê camîyan vindero.

● Cayê pîrozî yê hecî, bi taybetî zî perestgehê Haci Bektaşî Welî komelê elewîyan rê apey bêrê dayene.

● Serekîya Karanê Dîyanetî wa cade bêra betalkerdene, herinda ci de Heyetê Karanê Dîyanetî yo Berz bêro ronayene û bibo awanîyêka sivîle.

● Otêla Madimakî wa biba 'Muzeyê Şermî.'

● Wa dersê dînî yê mecbûrî bêrê wedaritene.

Avûkat Kolumanî ard ziwan ke ganî pêro dezgehê elewîyan vera sîstemê asîmîlasyonî û marjînalî bêrê yewca û dokumentê tewirî biweşanê. Kolumanî vat ke ê eşkenê her keso ke goreyê nê tewirî têgêreno de bibê yew.