Meclîsê Weşîye yê KCDyî derheqê tecrîdê giranî yê vera Rayberê Şarê Kurdî Abdullah Ocalanî û rewşa tepişteyanê nêweşan de eşkerayîyêka nuştekîye weşanaye.

Eşkerayîye de ame vatene ke tecrîdê Zîndanê Îmraliyî pêro zîndanan de vila bîyo û bi taybetî wextê pandemî de giran bîyo. KCDyî vist vîrî ke wextê janî de randewuyî ameyî betalkerdene, tedawî bi kelemçe ameye kerdene, gardîyanî goreyê tedbîran tênêgêrayî, pêvînayîşî bi keye û avûkatan ameyî astengkerdene, heqê tepişteyan ameyî astengkerdene û vayîyê berhemanê kantînan ameyî zêdînayene.

KCDyî vat: ''Zîndanan de bi taybetî vera doman û cinîyan îşkence û kerdişê xirabî zêdîyayî, kapasîte ra zêdê tepişteyî ameyî cakerdene. Dekewtişê zîndanan de cigêrayîşo rût, odayê bi sungerî û warê kamera, şîdet û îşkenceyî yenê kerdene.

Zîndanan de di hezar tepişteyê nêweşî û 600 tepişteyê nêweşê giranî estê. Emrê 5 hezar tepişteyan 65 ra zêdêr o. 2020 de 64 û 6 serranê peyênan de zî 103 tepişteyan zîndan de dinyaya xo bedilnaye. Rixmê raporê 'nêeşkenê zîndan de bimanê' yê nêweşxaneyan zî Dezgehê Tipê Edlîyî eqsê ci raporî dayî û nêverda ke tepişteyê nêweşî bêrê veradayene. Ma venga şarê xo danê ke wa paştdayîşê bi tepişteyanê sîyasîyan bizêdîno û vera tecrîdî rêxistinîya xo xurtêr bikero. Ma reyna îqtîdarî hişyar kenê û venga ci danê ke tepişteyê nêweşî, kal û pîrî, tepişteyê sîyasîyî wa vera bidîyê. Ganî îşkence û tecrîdê vera tepişteyanê sîyasîyan zî biqedo.''