Mexmûrijan ser o qedexeyê Hewlêrî

Asayîşê PDK’yî, Hewlêr de dimayê hêrişo ke hemverê xebatkaranê Serkonsolosxaneyê Tirkîya ame viraştene 4 rojî yo nêverdana Mexmûrijî şirê Hewlêr.

Paytextê Herêma Kurdistanî ya Federer a Iraqî Hewlêr de, restoranêk de, hemverê xebatkaranê Serkonsolosxaneyê Tirkîya hêrişêk amebi kerdene, hêriş de 1’ê înan xebatkarê konsolosxaneyî 3 tenan cuya xo vînî kerdebî. Dimayê hêrişî ra asayîşê PDK’yî, 4 rojî yo nêverdano çew Kampa Mexmûrî ra, ke binê kontrolê Neteweyê Yewbîyayeyî (NY) de ya, şiro Hewlêr.

Dimayê hêrişî ra trafîkê Hewlêr-Kerkûk, Hewlêr-Silêmanîye û Hewlêr-Maxmûrî ameybî girewtene. Demêk ra dima heme rayîrî ameybî akerdene, la rayîrê Hewlêr-Mexmûrî hewna zî girewte yo. Asayîşê PDK’yî kesê ke nêweş ê û halê acîlî de yê zî tede nêverdano çew Mexmûr ra vejîyo.

Hetêna ra Hewlêr de 18’ê Temmuze bişewe saete mabênê 01.30-02.00 de sereştişanê keyeyan de 16 cinîyê ciwanî ameybî destbendkerdene û ameybî berdene bi Asayîşê Hewlêrî. Wextê sereştişan de keyeyê ciwanan hetê hêzanê asayîşî ra ameybî serûbinkerdene û vilakerdene. Kesê ke ameybî tepiştene înan ra 11 kesî heman roje de, 5 kesî zî vizêr saetanê şewe de serbest ameyî verdadayene.