Mûş û qezayanê ci de namzedê hemşaredarîye yê HDP'yî şarî zîyaret kenî, problemanê înan goştarî kenê û derheqê projeyanê xo de qisey kenê. Hemwelatijê ke hukmatî rê hêrSê xo anê ziwan vanê ke ê do ser bikewê.

MÛŞ: Namzedê hemserekîye yê HDP’yî yê Mûşî seba weçînayîşan ê 31’ê Adare Mûş de saetanê şanî de ber bi ber gêrênê û şarî rê qalê projê û ferasetê xo yê şaredarîye kenê. Roj zî esnaf û keyeyan ra gêrênê. Parlamentera HDP’yî ya Mûşî Şevîn Coşkune, namzeda hemşaredarîye ya Mûşî Sîbel Gençe û îdarekerê HDP’yî çarçewaya xebatanê weçînayîşî de şîyî serdana keyeyan ê girewteyan. HDP’îyan vat, seba ke şaristanî pîya bivurnayê, înan dest ra çi bêro do bikerê.

KOP: Qezaya Kopî ya Mûşî de zî, bi beşdarbîyayîşê Vervatoxa Kongreya Şaran a Demokratîke (HDK) û parlamentera HDP’yî ya Mûşî Gulîstan Kiliç Koçyîgîte merkez de buroyê weçînayîşî ame akerdene. Akerdişê buroyî yo ke namzedê hemserekîye yê Şaredarîya Kopî Eylem Saruca û Adnan Topçu beşdarê ci bîyî reyde xeylê kesî zî tewrê ci bîyî. Akerdişê buroyî de Eylem Saruca qisey kerd û çalakîya Leyla Guvene silam kerde. Adnan topçuyî zî ard ziwan ke, qezaya Kopî de partîyê bînî vera înan ameyê têhet, labelê weçînayîşan ê 31’ê Adare de şar çi cewab hewca keno do bidero ci. Parlamentera HDP’yî ya Mûşî Gulîstan Kiliç Koçyîgîte zî bale ante serê muhîmîya grevê vêşanîye. Koçyîgîte waşt ke waştişê çalakwanan bêrê ca û wina dewam kerd, “Grevê vêşanîye êdî reştê sewîyêka krîtîke. Îqtîdar o ke xo nayo ra lal û kerrîye ganî êdî waştişanê çalakwananê grevê vêşanîye bîyaro ca.”Qiseykerdişan ra dima buroyê weçînayîşî ameyî akerdene û cinayîşê muzîkan reyde govendî ameyî kaykerdene.

GIMGIM: Qezaya Gimgimî ya Mûşî de zî namzedê hemşaredarîya Gimgimî Ulku Karaaslane û Mahmût Yalçin, kuçe bi kuçe, keye bi keye gêrayî û şîyî serdana şarî. Hemwelatijan ard ziwan ke, ê qeyûman ra zaf nerehet ê û roja 31’ê Adare de ê do cewabêko gird biderê ci.

MILAZGÎR: Qezaya Milazgîrî ya Mûşî de zî namzedê hemserekîye Erdal Çakar ve Munevver Ceylane û parlamentera HDP’yî ya Mûşî Gulîstan Kiliç Koçyîgîte şîyî serdana Şaredarîya Saripinarî. Parlamentere û namzedê HDP’yî qewexaneyan ra gêreyî û bado zî şîyî serdana keyeyan ê dewa Adaksuyî yê ke çend rojî raver ameybî tewqîfkerdene û reyna ameybî verdayene.