Îdarekarê Federasyonê Yewîya Nêastengdaran şîyî serdana hemsereka Şaredarîya Sûrî Fîlîz Bûlûttekîne. 

 Pêvînayîş de îdarekaran derheqê xebatanê federasyonî de hayîdarîyî dayî. Îdarekaran vat serra 2015 ra nata sere de Amed, înan xeylî bajaran de xebatî kerdê, nika binê bunyeya federasyonî de 12 komeleyî estê û zafeneyê îdarekaran ciwan ê.

 Îdarekaran bale ante serê kemasîya xebatan ê seba astengdaran ê dewrê qeyûmî û vat, “Rayîrê astengdaran ê ke seba astengdaran dewrê qeyûmî de ameyê viraştene eslê xo de astengdaran rê nêameyê viraştene, şaş ameyê viraştene. Gama ke astengdarêk xêza zerde şopneno yan gineno darêko ro yan zî dîregêk ro. No hal nêno qebûlkerdene. Ganî rayîrî bêrê wedartene û newe ra bêrê viraştene, pereyê şarî seba ke fikrê astengdaran nêame girewtene û ame xerckerdene hewa de şi.”