Roja 101. de Nobeta Edaletî ya Wanî dewam kerd ke seba ke tepişteyê nêweşî û tepişteyê ke înfazê înan ameyê vêşnayene wa bêrê veradayene yena kerdene.

Nobeta ewroyîne de cinîya tepişte Ebedîn Abîyî Zubeyde Abî û waya Fuat Borî Nurcane Bor ca girewt. Îdarekaranê Rêxistina HDPyî ya qezaya Artêmetanî zî ewro nobete zîyaret kerde.

Hemserekê HDPyî yê Artemêtanî Tahîr Şenî zîyaret de qisey kerd û pare kerd ke werte de huqûq nêmendo. Şenî vat: ''Ma tim hetê merdimanê tepişteyan de yê. Ma reyna venga selahîyetdaran danê ke wa tepişteyê nêweşî û êyê ke înfazê înan ameyê vêşnayene wa vera bidîyê. Ma tecrîdê Îmraliyî zî qebul nêkenê û tecrîdê vera Ocalanî şermezar kenê. Ganî CPT û Yewîya Ewropa tecrîdî rê vajê 'bes o.' ''