Sîyasetmedarê namdarî yê Başûrê Kurdîstanî Mehmûd Osmanî beşê diyînî yê roporajê xo de derheqê plan û dişmenîya dewleta tirke ya vera kurdan de qisey kerd.

Qiseykerdişê Mehmûd Osmanî rê beşêk wina yo: 

''Seba Tirkîya PKK bahane ya. Eke Tirkîya haştî û dîyalogan ra bawer bikerdêne pêro meseleyî do çareser bikerdêne û PKK zî şer nê sîyaset kerdêne. Tirkîya wazena kurdê Vakur û Başûrî bibê dişmenê yewbînan. Xora goreyê sîyasetî ganî mabênê Başûr û Tirkîya de dîyalogan bibê la ganî kurdî hêverî menfaatanê xo bifikirê. Dewleta tirke wazena kurdan çin bikera. Ganî PDK û YNK PKKyî reyde têkilîya xo xurt bikerê. O çax meseleyê kurdan çareser benê. 

Senî ke Tirkîya û Îran vera kurdan pîya têgêrenê ganî kurdî zî vera dişmenî pîya têbigêrê. Pê viraştişê baregehan na mesele çareser nêbena. Eke hêzê ma pêbikerê şer qedîyeno. Êyê ke wazenê meseleya kurdan çareser bikerê ganî goş bidê Abdullah Ocalanî. Ocalanî çend reyan bi rayîrê avûkatanê xo vat ke o eşkeno na mesele çareser bikero û projeyê xo zî pêşkêş kerd. La dewleta tirke o tecrîd kerd. Eke Ocalan azad bibo û dîyalogî dest pêbikerê herême de haştîye yena caardene û meseleya Rojawanî zî çareser bena. Çunke vanê Rojawan girêdayîyê PKKyî yê û terorîst ê. Ma nêzanenê ke kamyew kurd Tirkîya rê hol o.

Tirkîya vana kurdî çin ê. Na hîşmendîya neteperwere ya Tirkîya balkêş a. Erdogan tim vano yew dewlete, yew netewe û yew ziwan. Senî merdimê winasênî benê serdest, no mi rê zaf ecêb yeno. 

Goreyê mi ganî hînî kurdî bibê yw. Başûr de YNK, PDK û partîyê bînî estê; Vakur, Rojawan û Rojhelat de zî partîyê kurdî estê. Ganî nê partîyî bêrê têhet û wayîrê yew çarçewa bibê. Ganî ma hetkarîya yewbînan bikerê û nêbê dişmenê yewbînan. ''