Gerîlayê HPGyî Hatem Ozdemîr 2yê temmuza 2019î de qezaya Makuyî ya şaristanê Ûrmîye ya Rojhelatê Kurdîstanî de esîr kewtbi.

Mehkemeya Îranî bi sûcdarîya ''vera dewlete tewrê îsyanê çekdarî bîyo'' derheqê Ozdemîrî de cezaya îdamî dabî. Ceza ameye tesdîqkerdene.

Babîyê Ozdemîrî Abdurrahman Ozdemîro ke Agirî de ciwîyeno pare kerd ke ey 30ê gulane de zîndan de lajê xo dîyo û vat: ''Rewşa lajê mi hol a, o embazanê xo de heman koxûşî de maneno.

Cezaya îdamî ya ke dîyaya lajê mi keyfî ya. Seba ke lajê mi kurd o na bire dîyaya. Ma ney qebul nêkenê. Ma muracatê Mehkemeya Berze kerd. Dinya verê cezayanê îdamî yê Îranî de bêveng a. No nêno qebulkerdene. Vera na cezaya îdamî ez nêrazîbîyayîşan qîm nêvînena.''