Pêvînayîşî Rayberê Şarê Kurdî Abdullah Ocalanî dir 18’ê Hezîrane ra nata yenê astengkerdene. Avûkatanê Ocalanî a game ra heta nika 10 reyan muracat kerd, labelê nêame qebulkerdene. Na yewe sey newe ra ferzkerdişê tecrîdî amî şîrovekerdene. Parlamenterê HDP’yî yê Şirnexî Hasan Ozguneşî vat ke tecrîd 20 serrî yo bi hawayêkê bêmabênî dewam keno.

 Ozguneşî vat ke tecrîd mîyanê panc serranê peyênan de zaf ameyo şidênayene û vat, “bi çalakîya peyêne ya grevê vêşanîye dewlete hem mîyanê rayapêroyîye ya zereyî de û hem zî rayapêroyîye ya teberî de kewte tenge mîyan. Wextê peyênî de sistkerdişê tecrîdî zî netîceyê nê xoverdayîşî de bi. Hemverê nê xoverdayîşî de dewlete kewte tenge mîyan û nêçar mend eke game peyde bierzo.”

 ‘Do Bibo Sebebê Kaos û Tengezarî’

Ozguneşî ard ziwan tecrîdo ke AKP û MHP’yî vatibi ‘ma peynîya ci arda’ newe ra kewto dewre û vat, “Ma do prosesî bişopnê. Nika pêvînayîşê avûkatan û keyeyê Ocalanî yenê astengkerdene. Tirêm do no sey verî agêro tecrîdêkê mendeyî yan zî astengîyê seba çimtersnayîşî bê. Rayapêroyîye do nay ewe bivîno. Hukmatê AKP’yî bi nizdbîyayîşêkê bi hêrs û qesasgirewtoxî têgêreno. Çi heyf ke no hal do bibo sebebê virazîyayîşê kaos û tengezarî. Loma ganî hukmat bi hawayêkê hîna hesasî nizdê nê halî bibo. Kurdî û dostê înan, her kesê ke wayîrê wijdanî yê na yewe wazenê; wa tecrîd wedarîyo, Birêz Ocalan azad bibo.”

‘Ganî Goş Bidê Projeyanê Ocalanî’

Ozguneşî vat ke Ocalan lîderêk o ke Tirkîya ser o tesîrê ci esto û vat, “na yewe ra ganî goş bidê projeyanê ê.” Ozguneşî ard ziwan ke gama goş bidê vatişanê Ocalanî do kaosî ra bixelesîyê û Tirkîya de aşitî virazîyo.